06/06/2026
എൻ എസ് എസ് വൈക്കം യൂണിയന് രണ്ട് കോടിയുടെ ബജറ്റ്
*യുവജന - വനിതാ - വയോജന ക്ഷേമപദ്ധതികളുമായി എൻ എസ് എസ് യൂണിയൻ ബജറ്റ്*
വൈക്കം: സമുദായത്തിലെ യുവജനതയ്ക്ക് ദിശാബോധം നൽകുന്നതും വനിതാ - വയോജന ക്ഷേമത്തിന് ഊന്നൽ നൽകുന്നതുമായ ബജറ്റിന് എൻ എസ് എസ് യൂണിയൻ പൊതുയോഗം അംഗീകാരം നൽകി. താലൂക്ക് ആസ്ഥാനത്ത് നടന്ന ബജറ്റ് സമ്മേളനം യൂണിയൻ പ്രസിഡൻ്റ് പി ജി എം നായർ കാരിക്കോട് ഉദ്ഘാടനം ചെയ്തു. സെക്രട്ടറി അഖിൽ ആർ നായർ ബജറ്റ് അവതരിപ്പിച്ചു. വൈസ് പ്രസിഡൻ്റ് പി വേണുഗോപാൽ അധ്യക്ഷത വഹിച്ചു.
രണ്ട് കോടി രൂപാ വരവും അത്ര തന്നെ ചെലവും വരുന്ന ബജറ്റിൽ യൂണിയൻ നവതി ആഘോഷങ്ങളുടെ ഭാഗമായി യുവജനങ്ങൾക്ക് ജീവിത വിജയം പ്രദാനം ചെയ്യുവാൻ കഴിയുന്ന യുവത്വം വിവേകാനന്ദം പദ്ധതി, നിർദ്ധന വനിതകൾക്കുള്ള വിവാഹ സഹായം, ഭവന നിർമ്മാണ സ്ക്കീം, സാമ്പത്തിക ബുദ്ധിമുട്ട് അനുഭവിക്കുന്ന മിടുക്കരായ വിദ്യാർത്ഥികൾക്കുള്ള സൗജന്യ പഠന സഹായം , വയോജന സൗഹൃദ സംവിധാനം, വിവാഹ വേദി, പ്രതിഭാ സംഗമം തുടങ്ങി ഒട്ടേറെ പരിപാടികൾ വിഭാവനം ചെയ്യുന്നു.
താലൂക്കിലെ പതിമൂന്ന് പഞ്ചായത്ത് മേഖലകളിലും വൈക്കം മുനിസിപ്പാലിറ്റി മേഖലയിലും 97 കരയോഗങ്ങളിലും യൂണിയൻ നവതി ആഘോഷങ്ങളുടെ ഭാഗമായി വിവിധ ക്ഷേമ- വികസന പരിപാടികൾ സംഘടിപ്പിക്കുവാൻ യോഗം തീരുമാനിച്ചു.
കരയോഗ - യൂണിയൻ തലങ്ങളിൽ ഹ്യൂമൺ റിസോഴ്സ് സെൻ്ററുകൾ, ആദ്ധ്യാത്മിക വിഭാഗം, എന്നിവ ശക്തിപ്പെടുത്തും
യൂണിയൻ തലത്തിൽ സമ്പൂർണ്ണ ഡിജിറ്റലൈസേഷൻ, സോളർ സ്ഥാപിക്കൽ, പരിസ്ഥിത സൗഹൃദ ചെറുകിട വ്യവസായ സംരംഭക പ്രോത്സാഹനം എന്നിവയും വിഭാവനം ചെയ്യുന്നു.
ടി എ ജയകുമാർ, എൻ ജി ബാലചന്ദ്രൻ, എസ് ജയപ്രകാശ്, കൃഷ്ണൻകുട്ടി നായർ, മോഹൻദാസ് വെച്ചൂർ, ലക്ഷ്മണകുമാർ, രാധാകൃഷ്ണകുമാർ, മുരുകേശ് എസ് തുടങ്ങിയവർ പ്രസംഗിച്ചു...... ✒️ ബോസ് ഭാവന,വൈക്കം
