གཟའ་ལྷག་པ།

གཟའ་ལྷག་པ། གཟའ་ལྷག་པ་དང་ཁོ་བོའི་གོམ་སྟབས་ཆུང?

ཁྱེད་ཉིད་ཡང་བསྐྱར་དྲན། ངའི་སྙིང་གི་མཐིལ་དང་སྨྱུ་གུའི་རྩེ་མོར་ཉི་མ་ལྟར་ནམ་ཡང་གཟིམས་པ་མེད་པའི་ཨ་ཁུ་བདེ་མཆོག་ལགས་གློ་བུར་སྐ...
24/07/2026

ཁྱེད་ཉིད་ཡང་བསྐྱར་དྲན།

ངའི་སྙིང་གི་མཐིལ་དང་སྨྱུ་གུའི་རྩེ་མོར་ཉི་མ་ལྟར་ནམ་ཡང་གཟིམས་པ་མེད་པའི་ཨ་ཁུ་བདེ་མཆོག་ལགས་གློ་བུར་སྐུ་མ་བཞུགས་པའི་གཏམ་ཐོས་འཕྲལ། རང་དང་ཆེས་ཐག་ཉེ་བའི་ཤ་ཉེ་ཞིག་གཏན་དུ་ཁ་བྲལ་བ་ནང་བཞིན་རང་དབང་མེད་པར་མིག་ཆུ་ཤོར། རྔ་བ་ནས་ཛམ་ཐང་ལམ་དུ་འཁོད་པའི་ལུང་ཆེན་གྱི་ཆུ་འགྲམ་ཞིག་ཏུ་མདུན་ཐད་བྲག་གཟར་གྱི་ཤིང་སྡོང་དག་ལ་ཅེར་ནས་ཡུད་ཙམ་རིང་སྐྱོ་གདུང་ངང་ལུས།

ད་ལྟའི་དུས་འདིར་ཆེད་མཁས་པ་དང་ཞིབ་འཇུག་པ། དགེ་རྒན། མཁས་པ་སོགས་ཀྱི་མིང་ཐོབ་རྫིག་པོ་དང་། བརྗིད་པོ། དྲག་པོ་འཛིན་མཁན་ཧ་ཅང་མང་པོ་མཆིས། མི་གཅིག་གི་མཚམས་སྦྱོར་ལ་ཤོག་ངོས་གཉིས་གསུམ་ཅན་གྱི་ངོ་མཚར་བའང་ཤིན་ཏུ་མང་། ལྷག་པར་དུ་ཁ་ཤས་ཤིག་ལོ་ན་གཞོན་དུས་ནས་ཞིབ་འཇུག་དང་འབུམ་རམས་ཀྱི་མཛུབ་སྟོན་སློབ་དཔོན་ནམ་ཞིབ་འཇུག་པ་ཆེན་མོ་ལྟ་བུའི་ཁྲིར་ཕེབས་མཁན་ཡང་འདུག་པས་མཚོན་མ་འོངས་པའི་ཚེ་ནའང་འདི་འདྲ་མང་ནས་མང་དུ་འབྱུང་ངེས། འདི་ནི་དུས་ཀྱི་འཕེལ་ཕྱོགས་ཡིན་པས་དུས་རབས་ཀྱི་འགྲོས་དང་མཐུན་པར་བགྲོད་པ་ལ་མི་འོས་པ་དང་མི་འགྲིག་པ་དང་མ་གུས་པ་ཅི་ཡང་མེད་ཀྱང་། ཏག་ཏག་ང་ལ་མཚོན་ན་ཨ་ཁུ་བདེ་མཆོག་འདྲ་བ་འཇིག་རྟེན་ཐོབ་ཀྱིས་དབུལ་བ་གཅིག་ཤོར་བའི་སྐྱོ་གདུང་དང་ཕངས་སེམས་དེ་གཞན་དག་བརྒྱ་ཕྲག་ཤོར་བ་ལས་ཀྱང་ལྕི་བའི་ཚོར་བ་འདུག གཅིག་དུ་ན་ང་རང་ཉིད་ཀྱང་ཐོབ་རྣམ་པ་སྣ་ཚོགས་ཀྱི་འགྲན་རྩོད་ཀྱི་ཁོར་ཡུག་ནང་ཤི་འཐམ་རོ་འཐམ་དང་ཤ་ཐང་རུས་ཐང་ངང་ཟུག་སྟེ་རིག་གནས་གཤའ་མ་སྦྱོང་མཁན་ཞིག་གི་དག་གཙང་དང་རང་ཚུགས་སྔ་ནས་བོར་ནས་ཡོད་པའི་མི་ཕལ་བ་ཞིག་ཡིན་པས་འདིའི་མགོ་མཇུག་བར་གསུམ་གྱི་གོ་རིམ་དང་ངོ་གདོང་ལ་ཆ་རྒྱུས་གསལ་བོ་ཞིག་དང་ཟབ་མོ་ཞིག་ཡོད་པས་ཀྱང་ཡིན་ཤས་ཆེ།

ཉེ་བའི་ལོ་ཁ་ཤས་རིང་ཁྱེད་རང་སྐུ་དངོས་སུ་བཞུགས་དུས་སུ་ངས་ཁྱེད་ལ་བསྟོད་རྩོམ་ཁ་ཤས་བྲིས་མྱོང་། ཆེན་པོ་དག་གི་ངོ་བསྲུང་བའི་གཅམ་ཚིག་ལྟ་བུ་མིན། རང་ལ་ཅི་ཞིག་འཐོབ་འདོད་ཀྱི་ཧམ་སེམས་དེ་ལས་ཀྱང་མ་ཡིན། ཁྱེད་ཀྱི་ཡོན་ཏན་གྱི་དཔལ་དང་བླ་ན་མ་མཆིས་པའི་སྤྱོད་ཚུལ་ལ་སེམས་གཏིང་ནས་དགའ་བཀུར་གཤའ་མས་བསླངས་པའི་དད་སེམས་ཀྱི་མཆོད་པ་སྟེ། གལ་སྲིད་ཁྱེད་ནས་ངའི་རྩོམ་ཉོག་དེ་ཚོ་དངོས་སུ་ལན་གཅིག་མཐོང་ཡོད་པའམ་ཡང་ན་གཞན་གྱི་ངག་ནས་འདི་འདྲ་ཞིག་འདུག་ཅེས་ལན་གཅིག་ཐོས་མྱོང་ཡོད་པ་ཡིན་ཡང་ཕྲན་ཆུང་ང་ལ་མཚོན་ན་དེ་ཡན་གྱི་དགའ་བ་དང་བསོད་ནམས་ཤིག་གང་དུ་མཆིས།

ཀྱེ་ཤེས་རབ་ཀྱི་ལྷ་ཆེན་པོ་ལགས། ད་ངས་སྔོན་དུས་ཀྱི་བཀའ་གདམས་དགེ་བཤེས་ཚོའི་སྙིང་སྟོབས་འཛིན་ཅིང་རིག་གནས་ཀྱི་བཅུད་སྣུམ་པོས་ལུས་ངག་ཡིད་གསུམ་ཀུན་ནས་སིམ་པའི་དེང་བཞུགས་ཀྱི་མཁས་གྲུབ་ཅིག་གང་ནས་འཚོལ། གལ་སྲིད་ནམ་ཞིག་ཁྱེད་དང་ཁྱེད་འདྲ་བ་ཞིག་དང་ཡང་བསྐྱར་འཕྲད་ན་དེ་དུས་ངས་ཡང་བསྐྱར་སིལ་བུར་འཐོར་བའི་ལྷད་མ་ཞུགས་པའི་ཐ་སྙད་དག་ལྷན་དུ་བསྒྲིག་སྟེ་ཁོང་ལ་མཆོད་བསྟོད་ཡང་ཡང་འབུལ་མོས། ཆབས་ཅིག ཁྱེད་དང་ཁྱེད་ལྟ་བུར་ཆོས་བརྒྱད་སྙོམ་ལས་ཀྱིས་མ་གོས་པའི་དཔེ་ཆ་རྣལ་མ་ཞིག་ཏུ་འགྱུར་ཐུབ་པའི་སྨོན་ལམ་ཞིག་ཀྱང་འདེབས།

གུས་ཕྲན་ཁ་སྒང་སྟག་འབུམ་རྒྱལ་གྱིས།

དམ་པ་ཁོང་ལ་རྗེས་དྲན། ཆེན་པོའི་ངོ་བསྲུང་གཅམ་ཚིག་མིན།།ཅི་ཞིག་འཐོབ་འདོད་ཧམ་པ་མིན།། རྒན་ལ་དགའ་བཀུར་གཤའ་མ་ཡི།། དད་སེམས་ཚིག་ག...
17/07/2026

དམ་པ་ཁོང་ལ་རྗེས་དྲན།

ཆེན་པོའི་ངོ་བསྲུང་གཅམ་ཚིག་མིན།།
ཅི་ཞིག་འཐོབ་འདོད་ཧམ་པ་མིན།།
རྒན་ལ་དགའ་བཀུར་གཤའ་མ་ཡི།།
དད་སེམས་ཚིག་གི་མཆོད་པ་ཙམ།།

གདོང་ལ་བཅོས་མིན་གཤིས་སུ་བརྡོལ་བའི་འཛུམ་དང་། ཕྲག་ཏུ་མདོག་ཡལ་ཐེད་པོར་གྱུར་པའི་རས་ཁུག ཕྱག་ན་རིང་ཐུང་འཚམ་པའི་ལག་རྟེན་དང་བཅས་སློབ་གྲྭའི་སྒོའི་ཕྱི་ནང་དུ་དལ་དལ་ལྷོད་ལྷོད་ངང་འགྲོ་ཞིང་། ཆེས་སྤྱིར་བཏང་གི་བགྲེས་སོང་ཕལ་བ་གཉོམ་ཆུང་ཞིག་ལས་རྗེ་ཤར་གདོང་རིན་པོ་ཆེའི་བཀའ་གསུང་མེ་ཏོག་གི་ཟེའུ་འབྲུ་ཐུགས་ལ་ཆགས་ཤིང་དམ་ཚིག་རྡོ་རྗེ་ཡི་ཀ་ཆེན་སྙིང་ལ་བཙུགས་པའི་མཁས་གྲུབ་ཅིག་གམ། དེང་གི་དུས་འདིར་སུམ་རྟགས་ཟེར་ན་དང་པོར་ཁྱེད་ཡིད་ལ་འཁོར་ཞིང་ཁྱེད་འབོད་དུས་ཀྱང་སུམ་རྟགས་ཡིད་ལ་ངང་གིས་དྲན་པའི་མཁས་པ་ཆེན་པོའི་གདན་ཐོབ་འཛིན་པ་ཞིག ལྷག་པར་དུ་ཐུགས་ཡོན་ཏན་གྱི་ནམ་མཁའ་ལ་སྤྱོད་པ་ཉི་འོད་ཀྱི་དཀྱིལ་འཁོར་མཛེས་ཤིང་གསུང་སྤྲིན་དཀར་གྱི་ཕང་བ་ནས་དོན་ལེགས་བཤད་ཀྱི་སྦྲང་ཆར་རྒྱ་ཆེར་རུམ་པའི་ངེས་དོན་གྱི་དགེ་བའི་བཤེས་གཉེན་ཞིག་གི་ཚུལ་བཟུང་འདུག་པ་ཡིད་ལའང་འཆར་དཀའ་བ་དེ་ནི་ཁྱེད་ཀྱིས་ང་ལ་བཞག་པའི་ཆེས་ཐོག་མའི་བག་ཆགས་ལགས།

རྗེས་སུ་སློབ་ཁྲིད་ཀྱི་སྐབས་དག་ལ་དགེ་རྒན་བཀའ་དྲིན་ཅན་ཚོའི་ངག་ནས་ཁྱེད་ཀྱི་མཚན་སྙན་ཡང་དང་ཡང་དུ་གོ་ཞིང་མཛད་འཕྲིན་གྱི་ཆ་ཤས་རེ་རེ་དངོས་ཤུགས་གཉིས་ནས་ཡིད་ལ་སིམ་པའི་དད་འདུན་ལྕགས་ཀྱུས་ཉེ་བར་དྲངས་པ་ལས་སྐུ་ཉིད་སུ་ཡིན་ལ་དོ་སྣང་ཡང་དང་ཡང་དུ་བྱས་ཤིང་ག་དུས་ཤིག་ལ་ཉེ་སར་བཅར་མི་ཐུབ་ནའང་རིང་ས་ཞིག་ནས་མིག་གིས་རྒྱང་མཇལ་ཙམ་ཞིག་ཡིན་ཀྱང་ཨེ་ཐུབ་ལ་ཆེད་དུ་རེ་བ་དང་བརྩོན་ལེན་མང་པོ་བཏང་མྱོང་སྟེ། སྤྱིར་ང་དང་ང་འདྲ་བ་བློ་མིག་ལིང་ཏོག་གིས་བསྒྲིབས་པ་རྣམས་ཀྱིས་ཁྱེད་ཀྱི་ཕྱི་ནང་གསང་གསུམ་གྱི་ཡོན་ཏན་གྱི་ཆ་ཕྲ་མོ་ཙམ་ལའང་རྒྱུས་ལོན་ཐུབ་དཀའ་ནའང་། མཚན་གྱི་སྙན་པ་ཁོ་ནར་ཡིད་ཆེས་ཤིང་རྗེས་སུ་རྒྱུག་སླ་བའི་འཇིག་རྟེན་ཕལ་བའི་ངན་གཤིས་དེ་རྒྱུད་ལ་མ་བཅོས་རང་ཆས་སུ་མངའ་བའི་དབང་གིས་ཁྱེད་ཉིད་དང་མཇལ་འདོད་ཀྱི་སྨོན་འདུན་ཡང་ཡང་བཏང་བ་ལ་མཐར་དོན་སྨིན་གྱི་སྐལ་བ་བྱུང་བ་སྟེ། མ་གཞི་ཨ་ཁུ་བདེ་མཆོག་ཅེས་པའི་དགེ་སློབ་ཐམས་ཅད་ཀྱི་སྨྲ་བའི་ངག་དང་དད་པའི་སྙིང་ཁར་དབྱངས་ཅན་གྱི་ངག་དང་གངས་རིའི་ཟིལ་ལྟར་སྙན་སྙན་བརྗིད་བརྗིད་ངང་བཞུགས་པའི་སྐྱེས་བུ་ཁྱེད་རང་ནི་དེའི་སྔར་ཕྲན་གྱིས་སློབ་གྲྭའི་ཕྱི་ནང་དུ་ཐེངས་མང་པོར་མཐོང་མྱོང་བའི་བགྲེས་སོང་ཁོང་སྟེ། ལས་ངན་རྣམ་སྨིན་གྱི་ལན་པས་དུས་ཡུན་རིང་མོའི་བར་དུ་ཞལ་ངོ་དངོས་སུ་མ་ཟིན་པར་ལུས་པར་མ་གཏོགས་མཇལ་འདོད་རེ་སྒུག་གི་མིག་ལ་ཁྱེད་སྐུ་དགའ་སྟོན་སྔ་ནས་འཆར་འདུག

རིམ་གྱིས་ཁྱེད་ཀྱིས་གནངས་པའི་དཔེ་ཁྲིད་མང་པོ་ཞིག་ལ་དངོས་དང་དྲ་འབྲེལ་གང་རུང་གི་ལམ་ནས་ཉན་པའི་སྐལ་བ་དང་ལྡན་པར་གྱུར་ཅིང་། ལྷག་པར་ཁྱེད་དང་འབྲེལ་བའི་ངོ་མཚར་བའི་མཛད་པ་མང་པོ་ཞིག་བློ་ལྡན་དང་བློ་ལྡན་བརྒྱུད་པའི་ངག་ནས་གོ་ཐོས་མི་ཉུང་བ་བྱུང་བ་དང་འབྲེལ། ངས་ཀྱང་རང་གིས་གོ་ཚོད་ཤེས་ཚོད་བསམ་ཚོད་གསུམ་གྱི་སྒོ་ནས་ཨ་ཁུ་བདེ་མཆོག་ཅེས་ངས་ངག་ནས་ཡང་ཡང་གླེང་མྱོང་ལ་སེམས་ལའང་ཡང་ཡང་འཆར་མྱོང་བར་མ་ཟད་ཀྱི། དེ་ལས་ཀྱང་སྔོན་ཆད་ཁྱེད་ཀྱི་མཚན་ཙམ་ཐོས་པ་ནས་ད་ལྟར་རང་གིས་དངོས་སུ་རྒྱུས་ལོན་བྱེད་ཐུབ་པ་བྱུང་བས། སྔོན་ཆད་གྲགས་ཚོད་ཙམ་གྱིས་རྗེས་སུ་མོས་པ་ལས་ད་ནི་ཁྱེད་ལ་དཔྱད་པ་འདྲེས་མའི་དད་པ་བཅོས་མ་མ་ཡིན་པ་ཞིག་ངང་གིས་སྐྱེས།

ཁྱེད་རང་སློབ་གྲྭ་ཆེན་མོའི་དགེ་རྒན་ཞིག་སྟེ། མཐོ་དམའ་དང་མྱུར་བུལ་གྱི་འགྲན་རྩོད་ཧ་ཅང་ཆེ་བས་སྤྱིར་ཡིན་ན་ཁྱེད་ལ་རིམ་པ་མི་འདྲ་བའི་ལས་གཞི་སྣ་ཚོགས་དང་། བརྗོད་བྱ་མི་གཅིག་པའི་བརྩམས་ཆོས་མོད་པོ། ལུང་རིགས་དུ་མ་སྤུངས་པའི་དཔྱད་རྩོམ་གྲངས་མང་ཞིག་ངེས་པར་དགོས་ལ། ལྷག་པར་དུ་ཁྱེད་ལ་ཆེད་མཁས་པ་དང་། མཛུབ་སྟོན་པ། སྣེ་འཁྲིད་པ་སོགས་འཇིགས་འཇིགས་རྫིག་རྫིག་གི་ཆོ་ལོ་མང་པོ་ཞིག་ངེས་པར་དགོས་ནའང་། ཁྱེད་ལ་དེ་དག་གཅིག་ཀྱང་མེད་པར་ཐ་ན་དཔྱད་རྩོམ་ཚར་གཅིག་ཙམ་ཡང་མེད་པས། སློབ་དཔོན་ཆེན་མོ་དང་ཞིབ་འཇུག་པ་གྲགས་ཆེན་གཞན་དང་གཞན་ལ་བསྡུར་ཚེ་ཁྱེད་རང་ཧ་ཅང་དབུལ་བོ་ཞིག་སྟེ་ལྷག་བསམ་རྣལ་མ་ཞིག་དང་ཤེས་རབ་དངོས་མ་ཞིག་ལས་ཅི་ཡང་མི་འདུག

ཁྱེད་རང་དུས་རབས་གསར་བའི་ལས་བྱེད་པ་ཞིག་སྟེ། ཉི་མ་དང་ཟླ་བའི་བར་ཐག་ཉེ་ཞིང་རི་རབ་དང་གླིང་ཕྲན་གྱི་ཁ་ཐག་བསྟུངས་པའི་ལོ་ཟླ་འདིར་སྤྱིར་ཡིན་ན་མི་ཡུལ་ནས་མི་ཡུལ་བརྒལ་ཅིང་གྲོང་ཁྱེར་དང་གྲོང་ཁྱེར་བསྐྱུར་དགོས་ལ། ལྗོངས་དང་ལྗོངས་བཀོད་ཀྱི་མཛེས་པ་ལ་རོལ་མྱོང་བག་ཡངས་ཀྱི་བདེ་སྐྱིད་ཅིག་ཕྱི་རུ་ཅི་ཐུབ་ཀྱིས་ངོམ་དགོས་པ་དང་། ལྷག་པར་དུ་གར་འགྲོ་འཁོར་རིགས་རྫིག་པོ་དང་། གར་འདུག་མགྲོན་ཁང་རྒྱས་སྤྲོས། ཅི་བཟའ་ཟས་མཆོག་གོང་ཆེན་སོགས་ངེས་པར་དགོས་ནའང་། ཁྱེད་ལ་དེ་དག་གཅིག་ཀྱང་མེད་པར་ཐ་ན་ཟི་ལིང་གི་ལུང་མདོར་ཆགས་པའི་ལན་གྲུ་གྲོང་ཁྱེར་དུའང་ཐེངས་གཅིག་ཙམ་ལའང་འགྲོ་མ་མྱོང་བས། ད་ལྟའི་མི་རང་ག་བ་ཞིག་གི་འཚོ་བ་དང་བསྡུར་ཚེའང་ཁྱེད་རང་ཧ་ཅང་ཐབས་ཆག་ཅིག་སྟེ་བག་ཡོད་གསོན་པོ་ཞིག་དང་ཆོག་ཤེས་བདེན་པ་ཞིག་ལས་ཅི་ཡང་མི་འདུག

ཁྱེད་རང་དགེ་སེམས་མངའ་བའི་གཏོང་སྦྱིན་པ་ཞིག་སྟེ། སྤྱིར་ཡིན་ན་ཁྱེད་ཀྱིས་སྦྱིན་པ་གསུམ་གྱི་གཏོང་བ་སྤྱི་དང་། བྱེ་བྲག་ཏུ་ཟང་ཟིང་གི་སྦྱིན་པ་གཏོང་སྒང་ལ་གསར་འགོད་པ་མང་པོ་དང་། བརྙན་མིག་ཆེ་ཆུང་མང་པོ། ལྷག་པར་དུ་གསར་ལམ་དང་འཕྲིན་སྟེགས་ཆེ་མ་ཆུང་གསུམ་ནས་རང་གི་མཛད་རྗེས་དག་ཅི་ཐུབ་གང་ཐུབ་ཀྱིས་གཞན་ལ་ས་ཁྱབ་རྡོ་ཁྱབ་ཏུ་སྒྲོགས་དགོས་པ་དང་། ལྷག་པར་དགེ་བའི་རྩ་བ་འདི་ལ་བརྟེན་ནས་ནི་རང་ལ་སྙན་པར་སྨྲ་བ་དང་ཚིགས་སུ་བཅད་པ་སོགས་ལན་མང་འོང་བའི་རེ་བ་དང་འཚོལ་སྙེག་བྱེད་དགོས་ནའང་། ཁྱེད་ལ་དེ་དག་གཅིག་ཀྱང་མེད་པར་ཐ་ན་གཞན་གྱིས་ཁྱེད་ལ་ཚུར་བསྟོད་པའི་མེ་ཏོག་གི་མཆོད་པ་ཙམ་ཕུལ་ནའང་དགའ་བར་མི་འགྱུར་བས། འཇིག་རྟེན་གྱི་མི་མང་པོ་ཞིག་དང་བསྡུར་ཚེ་ཁྱེད་རང་ཧ་ཅང་རྒྱུན་ལྡན་མིན་པ་ཞིག་སྟེ་ཐུགས་རྒྱང་རིང་མོ་ཞིག་དང་སྤྱོད་པ་དག་གཙང་ཞིག་ལས་ཅི་ཡང་མི་འདུག

རྩོམ་སྒྲིག | ཟ་མ་ཏོག་འཕྲིན་སྟེགས།

[རྗེས་དྲན] དགེ་རྒན་ཆེན་མོ་བདེ་མཆོག་ལགས་སྐུ་གཤེགས་པར་མྱ་ངན་ཞུ། རྗེས་དྲན་ཡིད་ཀྱི་རླབས་ཕྲེང་། བོད་ཀྱི་རིག་གཞུང་སྤྱི་དང་ཁ...
17/07/2026

[རྗེས་དྲན]

དགེ་རྒན་ཆེན་མོ་བདེ་མཆོག་ལགས་སྐུ་གཤེགས་པར་མྱ་ངན་ཞུ།

རྗེས་དྲན་ཡིད་ཀྱི་རླབས་ཕྲེང་།

བོད་ཀྱི་རིག་གཞུང་སྤྱི་དང་ཁྱད་པར་དུ་བརྡ་སྤྲོད་སྨྲ་བ་ལ་གཞན་དྲིང་མི་འཇོག་པའི་ཁྱུ་མཆོག སྔར་མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་བདེ་མཆོག་ལགས་སྤྱི་ལོ༢༠༢༦ལོའི་ཟླ༧པའི་ཚེས༡༧ཉིན་ཏེ་དགུང་གྲངས་བརྒྱད་ཅུ་གྱ་དྲུག་སྟེང་སྐུ་གཤེགས་པར་གདུང་སེམས་དྲག་པོས་མྱ་ངན་ཞུ།

བདེ་མཆོག (1941-2026) 1941ལོར་མདོ་སྨད་ས་ཡི་ཐིག་ལེ་བིས་མདོ་ཕྱོགས་སུ་འཁྲུངས། དགུང་ལོ་གསུམ་པ་ནས་བཟུང་བིས་མདོ་དགོན་ཆེན་དུ་ཕེབས་པ་དང་། དགུང་ལོ་བཅུ་པའི་སྟེང་དགོན་པའི་ཚོགས་ལ་དངོས་སུ་ཞུགས། དེ་ནས་དགུང་ལོ་བཅོ་བརྒྱད་བར་དུ། དགེ་བའི་བཤེས་གཉེན་ལྷ་སྡེ་ཨ་ཁུ་བརྩོན་འགྲུས་ནོར་བུ་ཚང་དང་། ཤུགས་ཚང་ཨ་ཁུ་ཐུབ་བསྟན་དོན་གྲུབ་སོགས་བསམ་སྦྱོར་གཉིས་ཀྱིས་ལེགས་པར་བསྟེན་ཏེ། དགོན་པའི་ཞལ་འདོན་དང་། བསྡུས་གྲྭ། དབུ་མེད་ཀྱི་བྲིས་རྒྱུན་སོགས་ལེགས་པར་སྦྱངས། དགུང་ལོ་བཅོ་བརྒྱད་དེ་སྤྱི་ལོ1958ལོར་དགོན་པ་ལ་གཏོར་སྐྱོན་བྱུང་བ་དང་ལྷན་དུ། མཚོ་སྔོན་ཞིང་ཆེན་དགེ་ཐོན་སློབ་གྲྭར་ཕེབས་ནས་སློབ་གཉེར་གནང་། སློབ་གྲྭའི་དགེ་རྒན་ཨ་ཁུ་ཐུབ་བསྟན་སོགས་བསྟེན་ནས་བོད་ཀྱི་རིག་གནས་སོགས་སློབ་གཉེར་མཛད། དགུང་ལོ་ཉེར་གཅིག་སྟེ། སྤྱི་ལོ1961ལོར་སློབ་གྲྭར་གཏོར་སྐྱོན་བྱུང་བས། མཚོ་ལྷོ་ཁུལ་དགེ་ཐོན་སློབ་གྲྭར་ཕེབས། སློབ་གྲྭའི་དགེ་རྒན་ཨ་ཁུ་སངས་གོ་ཚང་དང་ཨ་ཁུ་བན་གོ་དང་། ཨ་ཁུ་དབང་འབུམ་རྒྱལ་ཚང་། ཨ་ཁུ་ལྷ་མོ་ཚེ་བརྟན་སོགས་ཀྱི་མདུན་ནས་རིག་གནས་དང་ཆབ་སྲིད་སོགས་སྦྱངས། སྤྱི་ལོ1965ལོའི་ཟླ7པར་སློབ་འབྲིང་མཐར་ཕྱིན་ཏེ། སྲིད་གཞུང་གི་བཀོད་སྒྲིག་ལྟར་མཚོ་ལྷོ་ཁུལ་ཞིན་ཧེ་རྫོང་གི་དཔལ་ཁ་སོགས་སུ་དགེ་རྒན་གྱི་དངོས་སྦྱོང་ལོ་གཅིག་ལ་གནང་། སྤྱི་ལོ1966ལོར་མཚོ་སྔོན་མི་རིགས་སློབ་འབྲིང་སྟེ་དེང་གི་མཚོ་སྔོན་མི་རིགས་སློབ་ཆེན་གྱི་གྲ་སྒྲིག་སློབ་གྲྭ་རུ་ཕེབས་ནས་དགེ་རྒན་གྱི་ཕྱག་ལས་གནང་བའི་མགོ་ཚུགས། སྤྱི་ལོ1969ལོ་ནས་མཚོ་སྔོན་མི་རིགས་སློབ་ཆེན་དུ་ཕེབས་ནས་སློབ་གྲྭ་ཆེན་མོའི་དགེ་རྒན་མཛད། སྤྱི་ལོ1972ལོ་ནས་སྤྱི་ལོ1974ལོའི་བར། མཚོ་སྔོན་མི་རིགས་སློབ་གྲྭ་ཆེན་མོའི་རྒྱ་ཡིག་སྡེ་ཁག་ནས་སློབ་གཉེར་གནང་། སྤྱི་ལོ1974ལོ་ནས་སྤྱི་ལོ2004ལོའི་བར་གྱི་ལོ་ངོ་སུམ་ཅུ་ལྷག་གི་རིང་ལ། སློབ་གྲྭ་དེའི་གྲངས་ཉུང་མི་རིགས་སྐད་ཡིག་སྡེ་ཁག་ནས་དགེ་རྒན་གྱི་ཕྱག་ལས་གནང་ཞིང་། སྔ་རྗེས་སུ་དགེ་བའི་བཤེས་གཉེན་ཆེན་པོ༧རྗེ་ཤར་གདོང་བློ་བཟང་བཤད་སྒྲུབ་རྒྱ་མཚོ་རིན་པོ་ཆེ་མཆོག་དང༧རྡོ་རྒྱ་སྐུ་ལོ་སོགས་་སློབ་དཔོན་དུ་བསྟེན་ནས་ཚད་མ་རིག་པ་དང་། ནང་བསྟན་ཆོས་ལུགས་སོགས་ལ་སྦྱང་བ་མི་དམན་པ་མཛད། སྤྱི་ལོ1994ལོ་ནས་བཟུང་། རབ་འབྱམས་པའི་ཞིབ་འཇུག་སློབ་མའི་དགེ་རྒན་གྱི་འགན་བཞེས། ཁོང་གི་སློབ་ཁྲིད་གཙོ་བོ་ནི་བོད་ཀྱི་བརྡ་སྤྲོད་རིག་པ་དང་། བོད་བརྒྱུད་ནང་བསྟན་གྱི་བྱུང་འཕེལ་ལོ་རྒྱུས་སོགས་ཡིན། ཁོང་གིས་སྔ་རྗེས་སུ་མཚོ་སྔོན་བརྙན་འཕྲིན་ཁང་དང་། བོད་ཁུལ་གྱི་སློབ་གྲྭ་ཆུང་འབྲིང་མང་པོར་ཕེབས་ནས་སུམ་རྟགས་ཀྱི་ཁྲིད་རྒྱུན་སྤེལ་ཞིང་འཆད་ཁྲིད་མཛད།སྤྱི་ལོ2016ལོར་ཁོང་གི་བརྡ་སྤྲོད་རིག་པའི་སློབ་ཁྲིད་དངོས་སུ་འོད་སྡེར་ལ་བཀོད་ནས་འགྲེམ་སྤེལ་བྱས། སྤྱི་ལོ2004ལོར་དངོས་སུ་ལས་འཁྱུར་ངལ་གསོ་གནང་ནའང་། ད་ལྟའི་བར་དུ་མཚོ་ལྷོ་དང་མགོ་ལོག རྔ་བ་སོགས་བོད་རིགས་ས་ཁུལ་གྱི་སློབ་གྲྭ་ཆུང་འབྲིང་མང་པོར་ཕེབས་ནས་སུམ་རྟགས་གཉིས་གཙོ་བྱས་པའི་བོད་ཀྱི་རིག་གནས་སྣ་མང་གི་སློབ་ཁྲིད་གནང་མུས་སུ་མཆིས། ཁོང་ནི་བོད་ཀྱི་སྲོལ་རྒྱུན་རིག་གནས་ལ་ནང་བྱན་ཆུད་ཅིང་། སློབ་མ་སྐྱོང་བའི་ཐབས་ལ་མཁས་པའི་དགེ་བའི་བཤེས་གཉེན་ཆེན་པོ་ཞིག་ཡིན་པར་མ་ཟད། དེང་རབས་ཀྱི་སྤྱི་ཚོགས་བསླབ་བྱ་དང་། བསམ་བློ་ཀུན་སྤྱོད་བཟང་པོ་གོང་དུ་སྤེལ་མཁན་གྱི་བསམ་བློའི་དེད་དཔོན་ཆེན་པོའང་ཡིན།

སྤྱི་ལོ2026ལོའི་ཟླ7པའི་ཚེས17ཉིན་སྐུ་གཤེགས།

༄༅། །སྐད་ཡིག་གི་འཇིག་ཉེན་དང་། བར་དོའི་འཕྲང་སྒྲོལ།རྩོམ་པ་པོ། དྷཱིཿ ལྷ་ལྡན།འཇིག་ཉེན་ལ་འཇིག་ཉེན་ཉིད་དུ་ངོ་འཚལ་ཞིང་དཔྱོད་ཤེས...
12/07/2026

༄༅། །སྐད་ཡིག་གི་འཇིག་ཉེན་དང་། བར་དོའི་འཕྲང་སྒྲོལ།

རྩོམ་པ་པོ། དྷཱིཿ ལྷ་ལྡན།

འཇིག་ཉེན་ལ་འཇིག་ཉེན་ཉིད་དུ་ངོ་འཚལ་ཞིང་དཔྱོད་ཤེས་དང་ཤེས་རབ་ཀྱིས་འཚོ་བའི་མི་རིགས་ཤིག་ལ་མཚོན་ན་འཇིག་ཉེན་ཆེ་ཕྲ་གང་ཡང་ཉེན་བརྡ་ཙམ་ལས་ཅི་ཡང་མིན་ལ། དེ་ནི་ལེགས་ལམ་དུ་ཕྱིན་པའི་སྒུལ་ཤུགས་ཤིག་ཀྱང་ཡིན་སྲིད་མོད། གནས་ལུགས་གནས་ལུགས་ཉིད་དུ་ཁས་མི་ལེན་པའི་ཨུ་ཚུགས་ལྕགས་ཀྱི་ཐོ་ལུམ་ལས་སྲ་ཞིང་། འཇིག་ཉེན་འཇིག་ཉེན་ཉིད་དུ་ངོ་མི་འཚལ་བའི་རྨོངས་བློ་མཚན་མོའི་མུན་ནག་ལས་རྔམས་མཐུག་པའི་མི་རིགས་ཤིག་ལ་མཚོན་ན་འཇིག་ཉེན་ཕྲ་མོ་དག་ཀྱང་དུས་ཀྱི་འཐོར་རླུང་བཞིན་ཤུགས་དྲགས་པས། དེ་ཡི་སྲོལ་དང་གོམས་གཤིས། སྐད་ཡིག་དང་རིག་གནས། འཚོ་གནས་དང་བླ་སྲོག་མཐའ་དག་རྨང་ནས་རློག་པར་བྱེད་དོ། །

གཞན་དུ་མི་རིགས་རང་སྟེང་ནས་འདོར་བར་མི་བཟོད་ཅིང་སེམས་ཀྱི་རྩ་བར་ཟུག་པའི་རིག་གཞུང་ཞིག་ཡིན་ཕྱིན། ལྐོག་མར་སྲོག་ཕྱིན་ལྟ་བུའི་ཆོས་རིག་དག་གི་ཚེ་སྲོག་ཀྱང་སླར་ཡང་སྨིན་པར་ངེས་པས་ཕྱི་རྐྱེན་ཙམ་གྱིས་ནམ་ཡང་རློག་པར་དཀའ་སྟེ། རིང་ས་ནས་བཤད་ན་མི་ལོ་ཉིས་སྟོང་ལ་ཉེ་བའི་རིང་ཟམ་ཐག་ཆད་པར་གྱུར་པའི་ཡ་ཧུ་དཱ་པའི་སྐད་ཡིག་གི་ཚེ་སྲོག་སླར་ཡང་འཇིག་རྟེན་དུ་མངོན་ཞིང་རྒྱས་པར་གྱུར་པ་དང(རྩོམ་པ་པོ་དམིགས་བུས་བསྒྱུར་བའི«ཧེབ་རེའི་སྐད་འདས་ལོག་བྱུང་བ»ཞེས་པ་མཇུག་གི་འཕྲོས་དོན་དང་བཅས་པར་ཅིས་ཀྱང་གཟིགས།)། ཉེ་ས་ནས་བཤད་ན་རང་རེའི་ལོ་རྒྱུས་སྟེང་དུ་ནང་བསྟན་མགོ་རྟིང་སློག་པའི་ལས་འགུལ་ཇི་སྙེད་ཅིག་བྱུང་ཡང་སླར་ཡང་བསྐྱར་དར་བྱུང་བའི་གནས་ལུགས་དེ་དག་གིས་ཀྱང་བདེན་པ་གང་ཉིད་གསལ་བཤད་བྱས་ནས་ཡོད་པས་ན། སྐད་ཡིག་དང་རིག་གཞུང་ཞིག་གི་ཆགས་འཇིག་དང་འཕེལ་འགྲིབ་ནི་ཕྱི་རྐྱེན་ལས་ཀྱང་བདག་པོ་རང་སྟེང་ནས་ཡོང་བ་རབ་ཏུ་ཤས་ཆེ་ཞིང་སྟོབས་དང་ལྡན་པ་ཡིན་ནོ། །

ད་ལྟའི་རང་རེའི་སྐད་ཡིག་དང་རིག་གཞུང་གི་འཇིག་ཉེན་མང་ཕྱོགས་ཀྱང་གཞོན་རབས་པའི་རིན་ཐང་ལྟ་བའི་གནས་གྱུར་དང་། རྒན་རབས་པའི་རིས་ཆད་ཕྱོགས་གཅོད་ཀྱི་འདུ་ཤེས། ཀུན་ཀྱང་ཨ་གསར་ལད་ཟློས་ཀྱི་བླུན་གཤིས་སོགས་ཕྱི་རྐྱེན་ལས་ཀྱང་ནང་རྐྱེན་རབ་ཏུ་ལྕི་བའི་ཚོད་དུ་གདའ་བས། “མཐོང་ན་འཇིགས་པ་བདེན་པའི་གཅེར་བུ་ལ། །རང་མགོ་སྐོར་བའི་གོས་ཀྱིས་མི་གཡོག་པར། །”གནས་ལུགས་གནས་ལུགས་ཉིད་དུ་ཁས་འཆེ་ཞིང་། འཇིག་ཉེན་འཇིག་ཉེན་དུ་ངོ་འཚལ་བའི་འདུ་ཤེས་ཙམ་ཞིག་ནི་ཅིས་ཀྱང་ཡོད་པ་གལ་ཆེ་ཞིང་། དཔྱོད་པ་དང་ལྡན་པ་དག་གིས་ནི་དམ་ཚིག་དེ“སྲོག་ལ་བབ་ཀྱང་འབད་པས་སྲུང་བར”བྱེད་མོད། “མཁས་པའི་དམ་ཚིག་དང་པོ”རུ་བགྲངས་པའི་ལྡོག་ཟླར་གྱུར་པ་གང་ཡིན་པ་དེ་ནི་བླུན་པོའི་སྤྱི་ཚོགས་སུ་ངེས་པས། རེ་བ་ཕྲ་བའི་སྤྱི་ཚོགས་དེར་འཇིག་ཉེན་བདེན་དོན་གྱི་གཅེར་བུ་མདུན་དུ་ལྷགས་ཀྱང་ད་དུང་རང་མགོ་སྐོར་བའི་གོས་ཀྱིས་གཡོགས་ནས་རང་སྣང་རླུང་ལ་བསྐུར་བའི་སྐྱིད་གླུ་ལེན་གྱིན་སྡོད་ཅིང་། ཉེན་བརྡ་གཏོང་བའི་སྐྱེ་བོ་དག་ཀྱང་དགྲ་བཞིན་ཏུ་ལྟ་ཞིང་དམོད་པར་བྱེད། དེ་ནི་ཨོ་ལི་ཧྥེར་དང་རྔ་བྱ་གཞན་དག(གྲོགས་རྩོམ་པ་པོ་བྱང་སྐར་གྱིས་བསྒྱུར་བའི«ཨོ་ལི་ཧྥེར་དང་རྔ་བྱ་གཞན་དག»ཅེས་པར་གཟིགས།)ཅེས་པའི་བསྟན་དོན་དང་ཚུལ་མཚུངས་ཏེ། མི་དེ་རིགས་ལ་བདེན་པ་བདེན་པ་ཉིད་དུ་ཁས་འཆེ་བའི་སྤོབས་པ་དང་། འཇིག་ཉེན་འཇིག་ཉེན་ཉིད་དུ་ངོ་འཚལ་བའི་དཔྱོད་ཤེས་ཀྱིས་ཡོངས་སུ་དབུལ་བ་ཡིན་པས། འཇིག་ཉེན་དེ་དག་གི་མདུན་དུ་མགོ་བོ་བཏུམ། མིག་ཟུང་བཀབ་སྟེ་སྟོང་སྣང་གི་འཇིག་རྟེན་བཞེངས་བསྐྲུན་བྱས་ཏེ་མུ་ནས་མུ་རུ་མུན་ནག་གི་ཁྲོད་དུ་གནས་འཆའ་ཞིང་། འཇིག་ཉེན་གྱི་མདུན་དུ་སྲེག་པ་རྡོ་སྒུར་བྱས་ཏེ་འཆི་རུ་འཇུག་པར་བྱེད་དེ། སྔོན་ཆད་ཀྱང་འཇིག་ཉེན་ཆེན་པོ་དག་གཅིག་རྗེས་གཉིས་མཐུད་དུ་རང་རེའི་མདུན་དུ་ལྷགས་སྐབས་ཀྱང་། “ཡུ་བུ་ཅག་ནི་གངས་རིའི་ར་བས་བསྐོར་བའི་ཡལ་གྲུ་ཡིན་པས་གནོད་ཅིང་འཚེ་བ་ཡོང་མི་སྲིད་ཚུལ་དང་། ལྷ་དང་ཆོས་ཀྱི་སྲུང་མས་བྱ་ར་མཛད་ངེས་པས་གེགས་དང་བར་ཆད་བཟོ་མི་ཐུབ”ཚུལ་གྱི་སྟོང་སྐད་བསྒྲགས་ནས་རང་སྣང་སྐྱིད་ལ་བསྐུར་ནས་བསྡད་པ་དེ་ལྟའོ། །

མ་གཞི་འཇིག་རྟེན་འདིའི་ཤེས་རྨོངས། ཀླ་ཀློ། འཇིག་ཉེན། ནག་ཉེས། དུཿ ཁ། ཉམས་རྒུད་སོགས་ཇི་སྙེད་ཅིག་ཡོད་པ་མཐའ་དག་མ་རིག་པའམ། གཏི་མུག་གམ། རྨོངས་པ་ཞེས་སུ་གྲགས་པ་འདི་ལས་བྱུང་བ་ཁོ་ནར་ངེས་པས། “འཇིག་རྟེན་རྒུད་པ་ཇི་རྙེད་པ། །དེ་ཡི་རྩ་བ་མ་རིག་པ། །”ཞེས་སུ་བསྩལ་བའི་ནང་པའི་ལྟ་བ་དེ་ནི་ཆོས་དང་རིག་གནས། རིགས་དང་རྒྱལ་ཁབ་ཀྱི་དབྱེ་མཚམས་མེད་པའི་ཀུན་ཁྱབ་ཀྱི་བདེན་པ་ཆེན་པོ་ཞིག་ཡིན། བདེན་པ་ཆེན་པོ་དེའི་ངོས་ནས་བལྟས་ན་བདེན་དོན་བདེན་དོན་ཉིད་དུ་ཁས་མི་ལེན་ཞིང་། འཇིག་ཉེན་འཇིག་ཉེན་ཉིད་དུ་ངོ་མི་འཚལ་བའི་གཏི་མུག་ནི་ཉམས་རྒུད་ལས་ཐར་བའི་སྒོ་མོ་བཙན་གྱིས་འགོག་པའི་གཏི་མུག་ཆེན་པོ་ཡིན་ཞིང་། རང་ཉིད་ཀྱི་གནས་བབ་ཙམ་ཡང་ངོ་མི་འཚལ་བའི་སྐྱེ་བོ་དེ་ནི་གཏན་ནས་གཏན་དུ་སྐྱོབ་ཐབས་བྲལ་བ་ཡིན་པས་ན་ནང་བསྟན་དུ་ཡང་བདེན་པ་བཞི་ལས་ཐོག་མར“སྡུག་བསྔལ་ཤེས་པར་བྱ”ཞེས་བསྟན་པ་དེ་ཡིན་ཏེ། རང་ཉིད་ནད་པ་ཡིན་པ་ཙམ་ཡང་ངོ་མི་འཚལ་བའི་བླུན་ཞིང་རྨོངས་པ་དག་གིས་ནི་སྨན་པ་འཚོལ་བ་དང་སྨན་བསྟེན་པ་སོགས་ཀྱི་ཐབས་ཙམ་ཡང་དོན་དུ་གཉེར་བར་མི་ཤེས་ན། ནད་དང་བྲལ་བའི་བདེ་འབྲས་ཀྱི་དཔལ་ལ་རོལ་པ་ནི་དེ་བས་ཀྱང་རྨི་ལམ་ཙམ་དུ་ཟད་དོ། །

བདེན་པ་བཞི་ཞེས་པ་དེ་ནི་ཆོས་ལུགས་འགྲེལ་རྒྱག་སྟངས་ཙམ་ཞིག་མ་ཟད་ཀྱི། འཇིག་རྟེན་མི་ཆོས་ཀྱི་ལམ་འབྲས་སྤྱི་བྱེ་ཡོངས་ལའང་སྦྱོར་དུ་ཡོད་པ་ཞིག་སྟེ། དཔེར་མཚོན་ན་མི་རིགས་ཤིག་རྗེས་ལུས། ཀླ་ཀློ། གདུག་རྩུབ། དབུལ་ཕོངས་སོགས་ཀྱི་འོབས་སུ་གནས་པ་ནི་སྡུག་བསྔལ་བདེན་པ་ཡིན་ལ། དེ་ཡི་རྩ་བ་མ་རིག་པ་སྟེ། ཤེས་རྨོངས། ཁྲིམས་རྨོངས། སྒྱིད་ལུག །བག་འཁུམས། རྙིང་ཞེན། ཨུ་ཚུགས་སོགས་ནི་ཀུན་འབྱུང་བདེན་པ་ཡིན་ཞིང་། དེ་ཡི་གཉེན་པོར་ཤེས་རིག་སྦྱོང་བ་དང་། ཁྲིམས་ལ་སློབ་པ། བརྩོན་འགྲུས་བསྐྱེད་པ། བློ་སྒོ་འབྱེད་པ་སོགས་ནི་ལམ་གྱི་བདེན་པ་དང་། སྡུག་བསྔལ་དེ་དག་ལས་གྲོལ་བའི་སྔོན་ཐོན་དང་། ཤེས་དཔལ། ཀུན་སྤྱོད། འབྱོར་ཕྱུག་སོགས་ཀྱི་རྒྱལ་སར་འབྱོར་བ་ནི་འགོག་པའི་བདེན་པ་ཡིན་ཞིང་། རྫོགས་ལྡན་གྱི་འབྲས་བུ་དེ་མངོན་དུ་འགྱུར་དགོས་ན་ཐོག་མར་རང་ཉིད་ཀྱི་གནས་བབ་ངོས་ཟིན་ཅིང་སྡུག་བསྔལ་ཤེས་པར་བྱ་བ་ནས་མགོ་བརྩམ་དགོས་པ་སྟེ། རང་ཉིད་རྗེས་ལུས་དང་། ཀླ་ཀློ། ཤེས་རྨོངས་སོགས་ཀྱི་འོབས་སུ་ལྷུང་ནས་ཡོད་པར་ངོ་འཚལ་བ་ནི་དེ་ལས་གྲོལ་བའི་འཇུག་སྒོ་གཅིག་པུ་དེ་ཡིན་ནོ། །
དེ་ལྟར་བསྟན་ན་རང་རེའི་སྐད་ཡིག་དང་རིག་གཞུང་གི་བདེན་པ་བཞི་ཡང་ཞར་ལ་རྟོགས་པར་འགྱུར་ཏེ། སྐད་ཡིག་དང་རིག་གཞུང་མཐའ་དག་འཇིག་ཉེན་འཐོར་རླུང་དྲག་པོའི་གསེབ་ཏུ་ཚུད་ཅིང་ལྐོག་མར་སྲོག་ཕྱིན་ལྟ་བུའི་ཚད་དུ་གནས་པ་ནི་སྡུག་བསྔལ་བདེན་པ་ཡིན་ལ། རང་རེའི་རིན་ཐང་ལྟ་བའི་གནས་གྱུར་དང་། རིས་གཅོད་ཕྱོགས་ཆད་ཀྱི་འཐེན་འཁྱེར། བག་འཁུམས་སྒྱིད་ལུག་གི་བསམ་བློ། ཨ་གསར་ལད་ཟློས་ཀྱི་བླུན་གཤིས། རང་སྣང་རླུང་སྤུར་གྱི་སྟོང་འདང་། རང་མགོ་རང་གཡོག་གི་རྨོངས་བློ་སོགས་ནི་ཀུན་འབྱུང་བདེན་པ་དང་། རིགས་ཀྱི་འདུ་ཤེས་གསོ་བ་དང་། སྐད་ཡིག་གི་རིན་ཐང་རྟོགས་པ། བཀོལ་སྤྱོད་ཀྱི་ལག་ལེན་ཞིབ་པ། རང་སྐད་སྨྲ་བའི་སྤོབས་པ་མཐོ་བ་སོགས་ནི་ལམ་གྱི་བདེན་པ་ཡིན་ལ། དེ་ལྟར་ལམ་གྱི་བདེན་པ་ཉམས་སུ་བླངས་པའི་འབྲས་བུར་སྐད་ཡིག་དང་རིག་གཞུང་གི་བསྟན་པ་སླར་ཡང་རྒྱས་ཤིང་རེ་བའི་འབྲས་བུ་བརྟན་པར་གྱུར་པ་ནི་འགོག་པའི་བདེན་པའོ། །

ད་དུང་ཡང་ཧེབ་རེའི་སྐད་འདས་ལོག་བྱུང་བར་ཡང་རང་རེས་ཉམས་ལེན་གྱི་མཐིལ་དུ་བཅོལ་འོས་པའི་སྐད་ཡིག་གི་ལམ་བདེན་ཁ་ཤས་གསལ་ཏེ། ད་ཡང་ཕྱི་ལོའི་སྔོན་གྱི་ལོ༧༠པར་རོམ་བཙན་རྒྱལ་གྱིས་ཡ་ཧུ་དཱ་པ་དག་བཅོམ་ཞིང་འཛམ་གླིང་གང་སར་ཁ་འཐོར་དགུ་ཐོར་བཏང་སྟེ་ཡ་ཧུ་དཱ་པའི་གཅིག་གྱུར་གྱི་ཕ་སྐད་མ་ཡིག་མི་མངོན་དབྱིངས་སུ་ཐིམ་རྗེས་ཀྱི་མི་ལོ་ཆིག་སྟོང་དགུ་བརྒྱ་ང་གཅིག་སོང་བའི་འཕྲོ་སྟེ། ཕྱི་ལོ༡༨༨༡ལོར་ཕུགས་སེམས་ཀྱི་རི་བོ་བརྟན་ཅིང་སྙིང་སྟོབས་ཀྱི་གོ་མཚོན་སྲ་བའི་ཡ་ཧུ་དཱ་པའི་ཕོ་རྒོད་ཅིག་གིས་ཡ་ཧུ་དཱ་པའི་ཕ་སྐད་མ་ཡིག་གི་ཚེ་སྲོག་སླར་ཡང་གསོ་བར་བྱས། ཁོང་གིས་ཉམས་ལེན་གྱི་མཐིལ་དུ་བཟུང་བའི་ལམ་གྱི་བདེན་པ་གཙོ་བོ་ནི་ཕྱོགས་གསུམ་ནས་མངོན་ཏེ། ཐོག་མར་ཧེབ་རེའི་སྐད་ཀྱི་ཐ་སྙད་ཀྱི་ཚིག་མཛོད་བསྒྲིགས་པ་དང་། དེ་རྗེས་ཧེབ་རེའི་སྐད་ཀྱི་སློབ་གྲྭ་བཙུགས་པ་དང་། རང་ཉིད་ཀྱི་ཁྱིམ་ཚང་ནས་མགོ་བརྩམས་ཏེ་ཧེབ་རེའི་སྐད་ཁོ་ནས་གཏམ་གླེང་བྱེད་པའི་སྒྲིག་སྲོལ་བཞག་པ་སྟེ། འདི་དག་ནི་བླ་མ་སྔ་མའི་ཉམས་ལེན་སློབ་མ་ཕྱི་མའི་མིག་དཔེ་ཁོ་ནར་ངེས་ཏེ། ཕ་སྐད་མ་ཡིག་དེ་འདྲའི་ཉམ་ཐག་གི་གནས་སུ་ད་དུང་མ་སླེབས་ཤིང་ཡར་འགྲོ་མར་འགྲོའི་ས་མཚམས་རྟ་ཁ་སྲབ་ཀྱིས་བསྒྱུར་བའི་དུས་ཚིགས་བར་དོའི་ས་མཚམས་ལྟ་བུའི་དུས་འདིར། བར་དོ་འཕྲང་སྒྲོལ་གྱི་གདམས་པ་ལ་ཉམས་ལེན་གྱི་མཐིལ་བཅོལ་མིན་ནི་མི་རིགས་ཤིག་གི་ཤི་གསོན་གྱི་གདམ་ག་ཁོ་ནར་ངེས་སོ། །

ཕྱི་ལོ2026.7.10ཉིན་དྷཱིཿ ལྷ་ལྡན་གྱིས།

༄༅། །«འཛམ་གླིང་སྤྱི་བསང»དང་འབྱུང་འགྱུར་གྱི་སེམས་ཁྲལ།རྩོམ་པ་པོ། དྷཱིཿ ལྷ་ལྡན།དེ་རིང་ནི་བོད་ཟླ་ལྔ་པའི་ཚེས་བཅོ་ལྔ་རེད། བོད་...
30/06/2026

༄༅། །«འཛམ་གླིང་སྤྱི་བསང»དང་འབྱུང་འགྱུར་གྱི་སེམས་ཁྲལ།

རྩོམ་པ་པོ། དྷཱིཿ ལྷ་ལྡན།

དེ་རིང་ནི་བོད་ཟླ་ལྔ་པའི་ཚེས་བཅོ་ལྔ་རེད། བོད་ཡུལ་གང་ས་ནས་འཛམ་གླིང་སྤྱི་བསང་གི་ཉིན་མོ་རེད་ཟེར་ནས་རི་རྩེ་ན་དར་མདུང་གི་རུ་དར་སྤུངས། ལག་ནས་སྟག་སེང་ཁྱུང་འབྲུག་གི་རླུང་རྟ་མཆོད། ངག་ནས་ཀི་བསོ་ལྷ་རྒྱལ་གྱི་ཀི་སྒྲ་སྒྲོག་གིན་འདུག་པས། བོད་མི་ཡོངས་རྫོགས་ཁ་དོག་གཅིག་པའི་འཇིག་རྟེན་ཞིག་ཏུ་ངང་གིས་མཐོང་ཐུབ་པར་གྱུར་ལ། རྣམ་པ་འདིས་ནི་སྔོན་ཆད་ཐུ་བྷོད་བཙན་པོའི“མི་ཐུབ་སེངྒེ་དཀར་མོའི་དམག་དཔུང”གིས་མཐའ་ཡི་དགྲ་བོ་དག་གླང་ཆེན་གྱིས་འདམ་བུའི་ཉག་མ་བཅོམ་པ་ལྟར་བཏུལ་རྗེས། མདའ་མདུང་གི་རུ་མཚོན་དག་ཕྱོགས་གཅིག་ཏུ་སྤུངས་ནས་རྒྱལ་ཁའི་ཀི་སྒྲས་གནམ་ས་འགེངས་ཀྱིན་པའི་རྣམ་པ་དེ་ཡང་འདི་འདྲ་མིན་ནམ་སྙམ་པར་བྱེད་དེ། མཁས་དབང་དགེ་ཆོས་ཀྱིས། “མི་བཟད་དགུན་གྱི་རླུང་དང་ལྷན་ཅིག་ཏུ། །མི་སྡུག་ཁ་བའི་ཡུལ་ནས་ཕྱིར་ཐོན་པའི། །མི་ཐུབ་སེངྒེ་དཀར་མོའི་དམག་དཔུང་ལ། །མི་ཡི་དབང་པོ་འཇིགས་པ་ཅིས་མ་བདེན། །”ཞེས་ང་རྒྱལ་གྱིས་ཐུགས་རྒྱུད་ཡོངས་སུ་ཁེངས་པའི་ཞལ་གསུང་དྲོན་མོ་ཞིག་གནང་བ་དེ་ཡང་ཡིད་ལ་ཡང་ཡང་དྲན་པར་གྱུར་ཏོ། །

ད་ལྟའི་ལྷ་བསང་དུ་གྲགས་པ་ཕལ་མོ་ཆེ་ནི་བོན་གྱི་ལུས་པོ་ལ་སངས་རྒྱས་ཆོས་ལུགས་ཀྱི་རྣམ་ཤེས་གྲོང་འཇུག་བྱས་པ་ཞིག་སྟེ། བོད་ཀྱི་གདོད་མའི་ལྷ་མཆོད་མཚུན་གསོལ་གྱི་རྣམ་པ་དེ་ལ་སངས་རྒྱས་ཆོས་ལུགས་ཀྱི་བརྗོད་སྙིང་དང་ལྷ་ཚོགས་བཞུགས་གསོལ་བྱས་པ་ཞིག་ལས། སངས་རྒྱས་ཤྭཀྱ་ཐུབ་པའི་ཆོས་ལུགས་རང་ལ་ནི་ད་ལྟའི་ལྷ་བསང་གི་རྣམ་པ་ཅན་ཞིག་ཁྱོན་ནས་མེད་དེ། དེ་ཡང་མོ་རྩིས་གཡང་གསུམ་བོན་པོའི་དེ་ག་རང་སོར་བཞག་ཅིང་སངས་རྒྱས་ཆོས་ལུགས་ཀྱི་བརྗོད་སྙིང་གི་སྲོག་གསར་བ་ཞུགས་པ་ཇི་བཞིན། ལྷ་བསང་འདི་ཡང་བོན་དང་བོད་ཀྱི་གདོད་མའི་ལྷ་གསོལ་མཚུན་མཆོད་ཀྱི་རྣམ་པ་དེ་ལ་སངས་རྒྱས་ཆོས་ལུགས་ཀྱི་སྲོག་གསར་དུ་བཅུག་པ་ཁོ་ནར་ངེས་སོ། །སྔོན་གྱི་མཁས་པ་འགའ་རེས་བསང་གི་ཁུངས་སུ་འདྲེན་གྱིན་པའི་འདུལ་བ་ལུང་དང་ཀླུ་སྒྲུབ་ཀྱི་གསུང་དེ་དག་མང་ཕྱོགས་ནི་བདུག་སྤོས་དང་སྤོས་སྦྱོར་གྱི་རྣམ་གཞག་ཅིག་ལས་བསང་གི་གོ་དོན་དང་རྣམ་པ་སོགས་ཁྱོན་ནས་མེད་ལ། བཀའ་བསྟན་དག་ཏུ་བསང་གཏོར་ཞེས་ཆུ་ཡིས་གཙང་མར་བྱེད་ལུགས་བཤད་པ་སོགས་ཀྱང་དོན་དག་གཞན་ཞིག་ཡིན་ནོ། །

བོན་པོའི་ཡུལ་ལྷ་གསོལ་མཆོད་ཀྱི་རྣམ་པ་དེ་ལ་ས་དགེ་བཀའ་སྙིང་ཇོ་ནང་དང་བཅས་པའི་མཁས་པ་དག་གིས་སངས་རྒྱས་ཆོས་ལུགས་ཀྱི་ལྟ་གྲུབ་དང་ལྷ་ཚོགས་སྲོག་ཏུ་བྱས་པའི་བསང་གསོལ་བགྲངས་ལས་འདས་པར་བརྩམས་ཏེ། དེ་རིང་འཛམ་གླིང་སྤྱི་བསང་དུ་འབོད་པ་འདི་ཡང་ཀརྨ་པ་རང་བྱུང་རྡོ་རྗེས་སོག་ཆུ་ཁར་ཟམ་པ་འཛུགས་སྐབས་འཛམ་གླིང་སྤྱིའི་འཇིག་རྟེན་ལས་འདས་མ་འདས་ཀྱི་ལྷ་ཚོགས་ཡོངས་ལ་བསང་མཆོད་ཅིག་བྲིས་པ་དེ་ལས་རིམ་པར་དར་བར་གྲགས་སོ། །

མདའ་མདུང་གི་རུ་དར་སྤུངས་པའི་ལ་རྩེ་ནི་མདའ་མདུང་སོགས་དམག་གི་རུ་མཚོན་དང་རུ་དར་ཁོ་ནས་གྲུབ་ཅིང་། ལྷ་བསང་གཏོང་བའི་རྣམ་པ་ཡང་ཀི་བསོ་ལྷ་རྒྱལ་གྱི་འབོད་སྒྲ་སྒྲོག་པའི་རྣམ་པ་དག་གང་ལ་བལྟས་ནའང་། ལྷ་བསང་གཏོང་བའི་སྲོལ་འདི་ནི་བོད་བཙན་པོའི་དམག་དཔུང་གི་རྒྱལ་ཐོབ་པའི་དགའ་སྟོན་དང་འབྲེལ་བ་ཡོད་པར་གོར་མ་ཆག་སྟེ། བཙན་པོའི་རུ་དམག་དག་གིས་མདའ་མདུང་གི་རུ་མཚོན་ལག་ཏུ་བཟུང་ཞིང་དམག་སྡེ་སོ་སོའི་རུ་དར་མཁའ་རུ་ཕྱར་ཏེ་མཐའ་བཞིའི་དམག་ལ་གཡུལ་འཁྲུག་བྱེད་ཅིང་། ནམ་ཞིག་མི་མཐུན་དགྲ་ཕྱོགས་ཀྱི་གཡུལ་ལས་རྣམ་པར་རྒྱལ་སྐབས་མདའ་མདུང་རུ་དར་དང་བཅས་པ་ཕྱོགས་གཅིག་ཏུ་སྤུངས་ནས་རྒྱལ་ཁའི་ཀི་སྒྲ་དང་དགའ་བའི་འབོད་སྒྲ་སྒྲོག་པ་དང་། རྒྱལ་ཁ་དེ་ནི་ཡུལ་ལྷ་དགྲ་ལྷ་དག་གི་དཔུང་གཉེན་དང་འབྲེལ་བ་ཡོད་པར་བཟུང་ནས་ཡུལ་ལྷ་དེ་དག་ལ་ཇ་དང་ཟས་ཀྱིས་མཆོད་ཅིང་བསྟོད་པ་དང་། རང་ཉིད་ཀྱི་རྒྱལ་ཁ་ལ་བཀའ་དྲིན་ཞུ་ཞིང་ཕྱིས་སུ་མགོན་སྐྱབས་བྱེད་པའི་རེ་འབོད་བྱེད་པ་ལས། རིམ་གྱིས་རིམ་གྱིས་མདའ་མདུང་དང་དར་ཆ་སོགས་རུ་མཚོན་དང་རུ་དར་གྱིས་གྲུབ་པའི་ལ་རྩེ་ཞེས་པ་འདི་བྱུང་ཞིང་། ཡུལ་ལྷ་སོགས་ལ་མཆོད་བསྟོད་བྱེད་པའི་དམངས་སྲོལ་དེ་ཡང་དེ་རིམ་གྱིས་དར་བར་མངོན་ཏེ། མཁས་དབང་དགེ་ཆོས་ཀྱིས་འབྲོག་བོད་ཀྱི་ཁང་སྟེང་དུ་དར་ལྕོག་སློང་བའི་ཚུལ་སོགས་ཀྱང་རུ་དར་ལས་བྱུང་བ་ཡིན་པར་གསུངས་པ་ལྟར་རོ། །

འདི་ལྟར་བརྟག་ཅིང་དཔྱད་ན་ལྷ་བསང་གཏོང་བ་འདི་ནི་སྲིད་ཀྱི་དཔའ་སྤོབས་མཚོན་པའི་རུ་དར་གྱི་རྔམ་བརྗིད་དང་། བོན་ཀྱི་གྲོལ་ཕུགས་སྟོན་པའི་ལྷ་བསང་གི་མཛེས་སྡུག །བན་གྱི་ཤེས་རབ་མཚོན་པའི་ལྟ་གྲུབ་ཀྱི་གཟི་དཔལ་ཏེ་བན་བོན་སྲིད་གསུམ་གྱི་རྣམ་པ་གཅིག་ཏུ་བསྡུས་པའི་ལོ་རྒྱུས་ཀྱི་རི་མོ་ཡག་པོ་ཞིག་ཡིན་པས། ཕྲན་ནི་སྟག་ཤར་ཚོའི་ལྷ་བསང་གཏོང་བའི་ཀི་སྒྲ་ལ་ཉན་པར་སྤྲོ་ཞིང་། ལྷ་དུད་དཀར་པོ་སྤྲིན་དང་འདྲེས་པའི་མཛེས་སྡུག་ལ་ལྟ་བར་དགའ། ད་དུང་ཕ་ཁུ་རི་རྒྱལ་ལྷུན་པོ་ལྟ་བུ་དག་གིས་སྨྲ་ལྕེ་དག་ཅིང་ཚིག་འབྲུ་གསལ་བ། རྣ་ལ་སྙན་ཞིང་སྦྱོར་བ་ལེགས་པ། གདངས་འགྲོས་འཚམས་ཤིང་འགྱུར་ཁུག་ལྡན་པའི་སྙན་ངག་ལས་ཀྱང་སྙན་ངག་ལྟ་བུའི་ལྷ་བསང་མཆོད་བསྟོད་ཀྱི་ངག་རིག་གི་སྒྱུ་རྩལ་དེ་ལ་དེ་བས་ཀྱང་ཉན་པར་སྤྲོ་སྟེ། རོལ་མོའི་རམ་འདེགས་དང་འགྲོགས་ད་ལྟའི་གཞས་མ་གཏམ་ཞིག་ཏུ་ཡང་སྣང་བས། འདི་དང་སྟོན་བཤད་སོགས་བོད་ལ་གཞས་མ་གཏམ་གྱི་ལོ་རྒྱུས་ནི་རབ་ཏུ་སྔ་བར་འདུག་གོ་ཞེས་ཀུ་རེ་ཞིག་ཀྱང་སྨྲ་བར་བྱའོ། །

དེ་ལྟར་བསམ་གཞིག་གཏོང་གིན་གཏོང་གིན་བདག་སེམས་ཀྱི་རྟ་ཕོ་འཛམ་གླིང་སྤྱི་བསང་གི་མ་འོངས་ལ་ཕྱོགས་པར་གྱུར་ཅིང་། སེམས་ལ་ལྗིད་ཏིག་ཏིག་གི་དྲི་བ་མང་པོ་ཞིག་གཅིག་རྗེས་གཉིས་མཐུད་དུ་འཚང་ནས་ཡོང་སྟེ། ད་ལྟ་ནི་ཚེ་དང་དུས་ངན་པ་ལ་ཡོངས་སུ་བབ་པ་ལགས་པས། གངས་ཅན་པའི“དཔའ་བོ་སྟག་གི་རི་མོ་ཡལ། མོ་བཙུན་ངོ་ཚའི་གཡང་ལུག་བུད། ཡ་རབས་ཀྱི་སྲོལ་མི་སྲུང་། མ་རབས་ཀྱི་སྤྱོད་པ་བསྐྱང་། ཕུགས་ཀྱི་ཁེ་མི་བརྩི། འཕྲལ་གྱི་རྩིས་བཏང་། ལེགས་པའི་སྲོལ་མི་འཛིན། ཉེས་པའི་དཔེ་འདྲེན། མཁས་པའི་གཞུངས་མི་སྲུང་། རྨོངས་པའི་རྗེས་སུ་འཇུག །བཟང་པོའི་དོ་མི་བྱེད། ངན་པའི་ཡ་བ་བྱེད་པ”ཤ་སྟག་གིས་གང་ཞིང་། འཇིག་རྟེན་མི་ཆོས་ཀྱི་བསྟན་པ་ནི་ཉམས། རང་གི་སྐད་དང་ཡི་གེ་ནི་བོར། གནའ་སྲོལ་དང་རིག་གནས་ནི་གཡུག །མཁས་པ་ལ་སྨོད། མཛངས་པ་ལ་བསྡོ། རྒྱུ་འབྲས་དང་བདེན་པ་སྲུང་མཁན་རྣམས་ཀྱི་དབུ་འཕང་ནི་དམའ། གནས་ལུགས་དང་དྲང་བདེན་སྨྲ་མཁན་རྣམས་ཀྱང་ཅི་བས་ཀྱང་ཉམ་ཆུང་། བླུན་པོ་ཁྲེལ་མེད་དག་གི་རླུང་རྟ་དར། རྫུན་དང་རྫུས་པ་དག་གི་ངོ་སོ་མཐོ། དངུལ་སྒོར་གྱི་སླད་དུ་ཕ་དང་མ་ལ་ཡང་རྒོལ་བར་ཐེ་མི་ཚོམ་ཞིང་། ཐོབ་དང་གོ་སའི་ཆེད་དུ་མི་རིགས་དང་དད་མོས་ལའང་རྒྱབ་འགལ་བྱེད་པར་བག་མི་ཚ་བའི་དུས་འདིར། རང་རེའི་སྐད་ཡིག་དང་རིག་གནས། སྲོལ་རྒྱུན་དང་གོམས་གཤིས་མཐའ་དག་ཀྱང་བདག་པོ་མེད་པའི་ཁྱིམ་གཞིས་ལྟ་བུ་ཞིག་ཏུ་ངང་གིས་འགྱུར་གྱིན་གདའ་བས། ད་སྟེ་མི་རིང་བའི་དུས་སུ་སྲིད་ཀྱི་དཔའ་སྤོབས་མཚོན་པའི་ལབ་ཙེ་འདི་དག་རླུང་ཁ་ནས་དབྱིངས་སུ་ཡལ་རྗེས། ང་ཚོའི་བུ་རབས་ཚ་རྒྱུད་དག་གིས་སླར་ཡང་མདའ་མདུང་གི་རུ་དར་སྤུངས་པའི་ལབ་ཙེ་བསླངས་ནས་ཀི་བསོ་ལྷ་རྒྱལ་གྱི་དཔའ་སྐད་སྒྲོག་སྲིད་དམ།

བྲག་ངོས་སུ་བརྐོས་པའི་དད་མོས་ཀྱི་སྙིང་སྟོབས་མཚོན་པའི་གཟུངས་སྔགས་ཀྱི་ཡིག་འབྲུ་རེ་རེ་ཆར་རླུང་གིས་དག་རྗེས། ང་ཚོའི་བུ་རབས་ཚ་རྒྱུད་དག་གིས་སླར་ཡང་དབྱངས་གསལ་སོ་བཞི་ཡི་བྱིན་རླབས་འཁྱིལ་བའི་རྡོ་བརྐོ་བརྩིགས་ནས་མ་ཎི་ཡི་གེ་དྲུག་མའི་རིག་སྔགས་བཟླ་སྲིད་དམ། ང་ཚོའི་མི་རབས་འདིའི་ཐོད་རུས་ལ་ཐིམ་རྗེས་གཙུག་ལག་ཁང་གི་ཡ་ཐེམ་ན་བྲག་རི་ལྟར་བརྩིགས་པའི་གླེགས་བམ་འདི་དག་གི་ཞལ་ཁ་སླར་ཡང་ཕྱེ་མཁན་ཡོད་སྲིད་དམ། དབྱངས་གསལ་སོ་བཞིའི་བསྟན་པ་ག་ཚོད་གནས་སྲིད་དམ། བྲག་རི་ལྟར་བརྩིགས་པའི་གླེགས་བམ་འདི་དག་གི་ཞལ་ཁ་འབྱེད་མཁན་མི་རབས་ཅི་ཙམ་ལ་ཡོད་སྲིད་དམ། ནམ་ཞིག་གངས་ཅན་པའི་སྐད་ཡིག་དང་ཆོས་རིག་ཡོད་ཚད་གད་སྙིགས་ཙམ་དུ་གྱུར་ནས་ཀ་ངོ་ང་ངོ་མི་ཟིན་པའི་མི་རབས་ཤིག་གིས་འདི་དག་ནི་བདག་གི་མེས་པོ་དག་གི་ཡི་གེ་ཡིན་འདུག་ཟེར་བའི་དུས་ཚོད་ཅིག་ཡོང་སྲིད་དམ། ང་ཚོས་འདི་ལྟར་བྲིས་ཤིང་བཤད་བཤད་པ་མཐའ་དག་ཀྱང་བུ་རབས་ཚ་རྒྱུད་ཁོ་ཚོར་བརྡ་མི་འཕྲོད་པའི་ཤོག་གུའི་ཕུང་པོ་ཙམ་དུ་འགྱུར་སྲིད་དམ།

དེ་ལྟར་ནང་སེམས་ལ་ལན་མི་རྙེད་པའི་དྲི་བ་འདི་དག་གིས་ཡོངས་སུ་གཙེ་བཞིན་འབྲི་འདོད་ཀྱི་འདུན་པ་ཡང་ཡོངས་སུ་ཡལ་བར་གྱུར་ཏེ། མཇུག་ཏུ་ཁ་བ་གངས་ཅན་པའི་དབྱངས་གསལ་གྱི་ང་རོ་དང་ཆོས་རིག་གི་བྱིན་རླབས་འདི་དག་ཉི་ཟླའི་ཚེ་ཚད་དང་མཉམ་པར་གྱུར་ཅིག་ཅེས་ཀྱང་སྨོན་ནོ། །

བོད་རབ་རྒྱན་མེ་རྟ་ལོའི་ཟླ་ལྔ་པའི་ཚེས་བཅོ་ལྔ་ཉིན་དྷཱིཿ ལྷ་ལྡན་གྱིས།

སུ་ནི་རྒང་དང་སུ་ནི་ཝ་མོ་རེད། མེ་ལྕེ། བདུན་ཕྲག་གསུམ་ལྷག་གི་ཡར་སྔོན་དུ། ཁོ་བོསཞེས་པའི་རྩོམ་ཐུང་ཞིག་བྲིས་ཏེ་སྤེལ་བ་ན། ཀློག་...
04/06/2026

སུ་ནི་རྒང་དང་སུ་ནི་ཝ་མོ་རེད།

མེ་ལྕེ།

བདུན་ཕྲག་གསུམ་ལྷག་གི་ཡར་སྔོན་དུ། ཁོ་བོསཞེས་པའི་རྩོམ་ཐུང་ཞིག་བྲིས་ཏེ་སྤེལ་བ་ན། ཀློག་པ་པོའི་ཁྲོད་དུ་བསམ་ཚུལ་འདྲ་མིན་ཅི་རིགས་བྱུང་ཞིང་། ད་རུང་སྐོར་ཞིག་གིས་འུ་ཅག་ལ་མཚོན་ན་སུ་ནི“རྒང”རེད་ཅེས་དང་། སུ་ནི“ཝ་མོ”རེད་ཅེས་དང་། ཡང་ན་སུ་ནི“རི་བོང་བློ་ལྡན”རེད་ཅེས་མང་དུ་དྲིས་བྱུང་ངོ་། །

རྩོམ་ཐུང་དེར་ཞུས་ཟིན་པ་ལྟར། བྷིར་ལིན་གྱིས་གསུངས་པའི“རྒང”ནི་དེང་སང་ཡིན་ན་མཁས་པའམ་ཆེད་མཁས་པ་ལ་གོ་བ་དང་། “ཝ་མོ”ནི་དེང་སང་ཡིན་ན་བསམ་བློ་བའམ་ཤེས་ཡོན་ཅན་ལ་གོ་བ་རེད། ལར“རྒང”ཡིན་ནའང་འདྲ། “ཝ་མོ”ཡིན་ནའང་རུང་། མི་རིགས་དང་སྤྱི་ཚོགས་གང་ཞིག་གི་ངོས་ཐད་ནས་གླེང་ནའང་འདི་གཉི་ག་མེད་དུ་མི་རུང་བ་ཡིན་ཞིང་། ང་རང་ཚོར“རྒང”གལ་ཆེན་པོ་ཡིན་པ་དེ་བཞིན་དུ། ང་རང་ཚོར“ཝ་མོ”ཡང་གལ་ཆེན་པོ་ཡིན་པ་སྨོས་ཅི་དགོས།

དེ་ཡང“རྒང”དང“ཝ་མོ”ལྟ་བུའི་ཡོན་ཏན་པ་ནི་ང་རང་ཚོ་ལ་མང་པོ་ཡོད་པ་དང་། ཁོ་བོས་བརྗོད་པའི“རི་བོང་བློ་ལྡན”ཡང་ང་རང་ཚོ་ལ་མང་པོ་ཡོད། ཉེ་རབས་ཀྱི་ཆ་ནས་བཤད་ན། འཇུ་མི་ཕམ་ནི“རྒང”ཞིག་ཡིན་ལ། དགེ་བཤེས་ཤེས་རབ་རྒྱ་མཚོ་ཡང“རྒང”ཞིག་ཡིན་པ་དང་། དེ་བཞིན་དུ་དགེ་འདུན་ཆོས་འཕེལ་ཡང“རྒང”ཞིག་ཡིན་པ་རེད། དེང་རབས་ཀྱི་ཆ་ནས་བཤད་ན། ཚེ་ཏན་ཞབས་དྲུང་ནི“རྒང”ཞིག་ཡིན་ལ། དམུ་དགེ་བསམ་གཏན་ཡང“རྒང”ཞིག་ཡིན་པ་དང་། དེ་བཞིན་དུ་དུང་དཀར་བློ་བཟང་འཕྲིན་ལས་ཀྱང“རྒང”ཞིག་ཡིན་པ་རེད། ད་རབས་ཀྱི་ཆ་ནས་བཤད་ན། བཙན་ལྷ་ངག་དབང་ཚུལ་ཁྲིམས་ནི“རྒང”ཞིག་ཡིན་ལ། དཔའ་རིས་སངས་རྒྱས་ཀྱང“རྒང”ཞིག་ཡིན་པ་དང་། དེ་བཞིན་དུ་མཁར་རྨེའུ་བསམ་གཏན་རྒྱལ་མཚན་ཡང“རྒང”ཞིག་ཡིན་པ་རེད།

ད་དུང་། མ་གཞི“རྒང”ཡིན་པ་ལ“ཝ་མོ”ཡི་ཁྱད་ཆོས་འབུར་དུ་ཐོན་འདུག་པ་དེ་འདྲའང་ཡོད་དེ། དཔེར་ན་དགེ་འདུན་ཆོས་འཕེལ་དང་དུང་དཀར་བློ་བཟང་འཕྲིན་ལས་ལྟ་བུ་ཡིན་ཞིང་། ཡང་མ་གཞི“ཝ་མོ”ཡིན་པ་ལ“རྒང”གི་མཁས་ཉམས་ལྡན་པ་དེ་འདྲའང་ཡོད་པ་ནི། དཔེར་ན་དོན་གྲུབ་རྒྱལ་དང་འབྲོང་བུ་ཚེ་རིང་རྡོ་རྗེ་ལྟ་བུའོ། །

དེང་སང་གི“ཝ་མོ”ཡི་ཕྱོགས་ནས། ཞོགས་དུང་ནི“ཝ་མོ”རུ་བགྲང་ཆོག་པ་དང་། བདུད་ལྷ་རྒྱལ་ཡང“ཝ་མོ”རུ་བགྲང་ཆོག་ལ། དེ་བཞིན་དུ་ཚ་བ་མདའ་སྨྱུག་ཀྱང“ཝ་མོ”རུ་བགྲང་ཆོག་པ་ཞིག་ཡིན། ཡང“རི་བོང་བློ་ལྡན”གྱི་ཕྱོགས་ནས། ད་ལྟའི“གྲོང་ཆོག”ལ་འདུར་རྒྱུག་བྱེད་པའི་ཨ་མཆོད་ཚོ་དང་། ལས་གཞིའམ་བྱ་དགའ་སྣ་ཚོགས་ཧབ་ཐོབ་རྒྱག་པའི་ཡོན་ཏན་པ་རྣམས་ནི“རི་བོང་བློ་ལྡན”གྱི་རྣམ་ཐར་སྐྱོང་མཁན་འཁྲུལ་མེད་ཡིན་ནོ། །

ཡོན་ཏན་པ་སྐོར་ཞིག་མཚམས་ལན་རེར“རྒང”བཅའ་འདོད་པ་དང་། ཡང་མཚམས་ལན་རེར“ཝ་མོ”བཅའ་འདོད་པ་དེ་འདྲ་ཡོད་ལ། ཡོན་ཏན་པ་སྐོར་ཞིག་སྔོན་ཆད“ཝ་མོ”ཡིན་པ་ལ་དེང་སང“རྒང”ཉན་པ་དང་། ཡང་སྔོན་ཆད“རྒང”ཡིན་པ་ལ་དེང་སང“རི་བོང་བློ་ལྡན”དུ་གྱུར་པ་དེ་འདྲའང་ཡོད། མ་ཟད། སོ་སོ“ཝ་མོ”ཡིན་བཞིན་དུ“རྒང”ཞིག་བཅའ་རྒྱུ་ཟེར་ནས་འཁྱོངས་གི་མེད་པ་དང་། སོ་སོ“རི་བོང་བློ་ལྡན”ཡིན་བཞིན་དུ“ཝ་མོ”ཞིག་བཅའ་རྒྱུ་ཟེར་ནས་འཁྱོངས་གི་མེད་པ་དེ་འདྲའང་ཡོད་དོ། །

རྒྱ་ཡེ་བཀྲ་བྷོ་ལ་ཆ་བཞག་ན། སྐབས་ལ་ལར“རྒང”ཞིག་བཅས་ན་སྙམ་གྱི་ཡོད་པ་དང་། སྐབས་ལ་ལར“ཝ་མོ”ཞིག་ཨེ་འཁྱོངས་ལྟ་གི་ཡོད་ལ། ཡང་སྐབས་ལ་ལར“རི་བོང་བློ་ལྡན”གྱི་བརྟུལ་ཞུགས་ནར་མར་འཛིན་གྱི་ཡོད། འཇུ་སྐལ་བཟང་གི་སྟེང་ན“ཝ་མོ”ཡི་ཆ་མང་དུ་བདོག་ནའང་། ཁོང་ནི“རྒང”ཞིག་བཅའ་འདོད་ཅི་བས་ཀྱང་ཆེ་ཞིང་། དྲང་མོར་བཤད་ན་འཇུ་སྐལ་བཟང་གི་གྲུབ་འབྲས་གཙོ་ཆེ་ཤོས་དེ། བསམ་བློ་བ་ཞིག་གི་བརྟུལ་ཞུགས་བཟུང་ནས་གསར་རྩོམ་ཟམ་མ་ཆད་པར་གནང་བའི་ཕྱོགས་ན་ཡོད་པ་ལས། མཁས་པ་ཞིག་བཅས་པའི་ཕྱོགས་ན་དེ་འདྲའི་མོད་པོ་ཞིག་ཨེ་ཡོད་སྙམ།

སྐབས་འདིར་ཅིས་ཀྱང་ངེས་དགོས་པ་ཞིག་ལ། ང་ཚོ“རྒང”ཞིག་བཅས་ནའང་འདྲ། “ཝ་མོ”ཞིག་བཅས་ནའང་ཆོག “རི་བོང་བློ་ལྡན”ཞིག་བཅས་ནའང་བླ། གང་ལྟར་རིགས་ཞེན་དཀར་པོ་ནི་ང་རང་ཚོའི་གཟུངས་གཞུག་དང་། དབྱངས་གསལ་སོ་བཞི་ནི་ང་རང་ཚོའི་བླ་སྲོག་ཡིན་པ་དེ་ནམ་ཡང་བརྗེད་མི་རུང་ངོ་། །

གཞན་ཡང་། “རྒང”དང“ཝ་མོ”གཉིས་སམ། “རྒང”དང“རི་བོང་བློ་ལྡན”གཉིས་ལ་མུ་བཞི་བརྩིས་ཚེ་བརྗོད་གཞི་འདི་ལྷག་ཏུ་ཇེ་གསལ་ལ་འགྲོ་བར་ཕན་མོད། དེས་མང་པོ་ཞིག་ལ་ཕོག་ཐུག་བཟོས་འགྲོ་བས་ན་རེ་ཞིག་སྐྱུར་བ་ལགས་སོ། །

ཕྱི་ལོ2026ལོའི་ཟླ6པའི་ཚེས1ལ།

རྒང་དང་ཝ་མོ། ད་དུང་རི་བོང་བློ་ལྡན་གྱི་ཚོགས། མེ་ལྕེ། དབྱིན་ཇིའི་རང་དབང་རིང་ལུགས་ཀྱི་བསམ་བློ་མཁན་ཨེ་ཟེ་ཡ་བྷིར་ལིན(Isaiah B...
04/06/2026

རྒང་དང་ཝ་མོ། ད་དུང་རི་བོང་བློ་ལྡན་གྱི་ཚོགས།

མེ་ལྕེ།

དབྱིན་ཇིའི་རང་དབང་རིང་ལུགས་ཀྱི་བསམ་བློ་མཁན་ཨེ་ཟེ་ཡ་བྷིར་ལིན(Isaiah Berlin，以赛亚·伯林，1909—1997)ལགས་ཀྱིས་དུས་རབས་བཅུ་དགུ་པའི་ནང་གི་ཨུ་རུ་སུའི་བསམ་བློའི་བྱུང་འཕེལ་སྐོར་གླེང་སྐབས། རྒང་དང་ཝ་མོ་གཉིས་ལ་དཔེ་བཞག་སྟེ་ཡོན་ཏན་པ་རྣམས་རྩ་བའི་ཆ་ནས་རིགས་ཆེན་པོ་གཉིས་སུ་བཀར་འདུག རིགས་དང་པོ་སྟེ་རྒང་ལྟ་བུའི་ཡོན་ཏན་པ་ནི་ཤེས་བྱ་སྣ་གཅིག་ལ་ནང་བྱན་ཆུད་ཅིང་མཁས་པའམ། ཡང་ན་རང་ཉིད་ཀྱི་བསམ་བློའི་མ་ལག་ཅིག་འཛུགས་པར་གཞོལ་ཏེ་གཞན་གང་ལ་ཡང་ཁ་ཡ་མི་བྱེད་པ་ལ་ཟེར་བ་དང་། རིགས་གཉིས་པ་སྟེ་ཝ་མོ་ལྟ་བུའི་ཡོན་ཏན་པ་ནི་ཤེས་བྱ་ཡོན་ཏན་མང་པོ་ཞིག་ལ་སྤྲོ་བ་འཕེལ་ཞིང་། དེས་མི་ཚད་གནད་དོན་གང་མང་ཞིག་གདོང་གིས་བསུས་ཏེ་བསམ་བློའི་འོད་ཟེར་ཕྱོགས་བཞིར་འཕྲོ་བ་ལ་ཟེར་བའོ། །

ཁོང་གིས་ད་དུང་རྒང་ལྟ་བུའི་ཡོན་ཏན་པའི་མཚན་གཞི་ལ་ཕི་ལ་ཐོ(柏拉图)དང་ཧེ་ཀེལ(黑格尔)སོགས་དང་། ཝ་མོ་ལྟ་བུའི་ཡོན་ཏན་པའི་མཚན་གཞི་ལ་ཨ་རི་སི་ཏོ་ཏལ(亚里士多德)དང་མོན་ཐན(蒙田)སོགས་བཞག་འདུག་ལ། ཡང་ཁོང་གིས་ཨུ་རུ་སུའི་རྩོམ་མཁན་ཐོལ་སི་ཏོའེ(托尔斯泰)ལགས་ལ་དཔྱད་པ་གཏོང་སྐབས་ན་རེ། ཁོང་ཉིད་མ་གཞི་ནས“ཝ་མོ”ཞིག་ཡིན་ནའང་། ཐོལ་སི་ཏོའེ་ནི“རྒང”ཞིག་བཅའ་འདོད་ཤིན་ཏུ་ཆེ། མཐའ་མར་ཐོལ་སི་ཏོའེ་ཁོང་ཝ་མོ་ཡག་པོ་ཞིག་འཁྱོངས་ཡོད་པ་ལས། རྒང་ཡག་པོ་ཞིག་ལར་ནས་འཁྱོངས་མེད་ཅེས་གསུངས་སོ། །

རང་ཅག་གི་སྣང་ངོར་རྒང་ནི་ཕྱི་རྩུབ་ནང་འཇམ་དང་། ཝ་མོ་ནི་གཡོ་སྒྱུ་ཟོལ་ཟོག་གི་མཚོན་བྱེད་ཅིག་ཏུ་གྱུར་ཡོད་ནའང་། བྷིར་ལིན་ལགས་ཀྱིས་ནུབ་ཕྱོགས་པའི་ཐུན་མིན་གྱི་བཤད་སྲོལ་ལྟར་སྲོག་ཆགས་འདི་གཉིས་དཔེ་རུ་བཀོད་དེ་ཡོན་ཏན་པ་དག་རིགས་གཉིས་སུ་དགར་ཅིང་། ཁོང་གི་རྣམ་དཔྱོད་ཀྱི་རྩལ་ལ་བརྟེན་ནས་རྒང་དང་ཝ་མོའི་སྐོར་གྱི་ལྟ་བ་དེ་ཕུན་སུམ་ཚོགས་པ་དང་གྱ་ནོམ་པར་བཏང་འདུག་གོ །

དེང་སང་གི་སྐད་ཆ་ལྟར་བཤད་ན། “རྒང”ནི་མཁས་པའམ་ཆེད་མཁས་པ་རེད་ལ། “ཝ་མོ”ནི་བསམ་བློ་བའམ་ཤེས་ཡོན་ཅན་རེད། ལས་རིགས་ཀྱི་ཆ་ནས“རྒང”གིས་རིག་གཞུང་གཙོ་བོར་གཉེར་བ་དང་། “ཝ་མོ”ཡིས་བསམ་བློ་གཙོ་བོར་འཛིན་པ་ཡིན། ཁོར་ཡུག་གི་ཆ་ནས“རྒང”ནི་དུས་བདེ་ཞོད་འཇགས་དང་རྒན་མོ་གསེར་འཁུར་གྱི་སྐབས་ལ་མང་པོ་འབྱུང་བ་དང་། “ཝ་མོ”ནི་སྡེ་གཟར་སྐྱས་འུར་དང་ཟང་ཟིང་ལང་ལོང་གི་སྐབས་ལ་མང་དུ་འབྱུང་བར་བཤད། ཤན་སྟོབས་ཀྱི་ཆ་ནས“རྒང”གི་ཤུགས་རྐྱེན་དང་མཚན་སྙན་གྲགས་དེ་སོ་སོའི་ཚེ་ཐོག་འདི་ལ་རྒྱས་པ་དང་། “ཝ་མོ”ཡི་ཤུགས་རྐྱེན་དང་མཚན་སྙན་གྲགས་དེ་སོ་སོ་འཇིག་རྟེན་དཀར་ངོགས་དང་ཁ་བྲལ་རྗེས་གཞི་ནས་རྒྱས་མགོ་ཚུགས་ཀྱི་ཡོད་དོ། །

བོད་ཁ་བ་ཅན་གྱི་སྤྱི་ཚོགས་ཁྲོད། “རྒང”ངམ་མཁས་པ་བྱོན་མྱོང་ཡོད་ལ། “ཝ་མོ”འམ་བསམ་བློ་བའང་བྱོན་མྱོང་ཡོད། དུས་དེ་རིང་ཡང་བསམ་བློ་ཁོ་ན་གླེང་བའི་ཤེས་ཡོན་ཅན་ཡོད་ལ། རིག་གཞུང་རྐྱང་བ་གཉེར་བའི་ཆེད་མཁས་པའང་ཡོད། དེ་མིན་ད་དུང“རི་བོང”ཡང་ཡོད་དེ། “རི་བོང”དེ་ནི་བློ་རིག་གསལ་བ་དང་སྤྱང་གྲུང་ལྡན་པ། དུས་ལ་བསྟུན་ཤེས་པ་དང་མྱི་ལ་འགྲོགས་མཁས་པ། རང་དོན་མི་འཕྱུག་པ་དང་གཞན་དོན་མི་སེམས་པ་འབའ་ཞིག་ཡིན། “རྒང”ཡང་མ་ཡིན་ལ“ཝ་མོ”འང་མ་ཡིན་པའི“རི་བོང”བློ་ལྡན་ནི་ལོ་འདི་ཚོར་ཤིན་ཏུ་མང་ངོ་། །

ཧ་ལས་དགོས་པ་ཞིག་ལ། སྔོན་ཆད“ཝ་མོ”ཡིན་པ་ལ་ད་ལྟར“རྒང”དུ་གྱུར་པ་དང་། སྔོན་ཆད“རྒང”ཡིན་པ་ལ་ད་ལྟར“རི་བོང”དུ་གྱུར་པའང་ཉུང་ཉུང་མིན། དེ་ཡང་། “རི་བོང”བློ་ལྡན་གྱི་མཐར་ཐུག་གི་དམིགས་བྱ་ཉག་གཅིག་ནི་ཇི་སྐད་དུ། ཙ་རིའི་གནས་སྐོར་བྱེད་པ་མིང་གི་དོན། །ཚ་གྲང་དཀའ་ཐུབ་བྱེད་པ་ལྟོ་ཡི་དོན། །ཛ་ཡའི་གསུང་རབ་ཀློག་པ་ཡོན་གྱི་དོན། །ཝ་ལེར་བསམས་ན་ཐམས་ཅད་ནོར་གྱི་དོན། །ཞེས་པ་ལས་མ་འདས་སོ། །

སྤྱིར་ཡིན་ན་སོ་སོ“རྒང”ལྟ་བུའི་མཁས་པ་བཅའ་བའམ། “ཝ་མོ”ལྟ་བུའི་བསམ་བློ་བའི་བརྟུལ་ཞུགས་འཛིན་པའམ། “རི་བོང”བློ་ལྡན་ལྟ་བུའི་ཡོན་ཏན་པ་བཅའ་བ་ནི་མྱི་རང་རང་གི་འདོད་མོས་དང་གདམ་ཀ་ཞིག་ཡིན་པས། དེ་ལ་སུས་ཀྱང་ཐེ་གཏོགས་བྱེད་མི་ཆོག་ཅིང་སུས་ཀྱང“ཁ་ལག་སྲིང”མི་ཆོག་པ་བདེན་མོད། ཡིན་ནའང་བོད་རང་གི“ས་ཆུ”དང་། དུས་བབ་དང་། ཁོར་ཡུག་སོགས་ལ་དམིགས་ནས་བཤད་ན། ཁ་སང་དེ་རིང་ང་རང་ཚོ་ལ་མཁོ་ངོ་མ་ནི“ཝ་མོ”དང“རྒང”ཡིན་པ་ལས། “རི་བོང”བློ་ལྡན་གྱི་ཚོགས་ནི་མ་ཡིན་ཞིང་། ཡང་གཅིག་བཤད་ན་ང་རང་ཚོར“རི་བོང”ལས་ཀྱང“རྒང”མཁོ་ལ། “རྒང”ལས་ཀྱང“ཝ་མོ”མཁོ་བ་ཡིན་ནོ། །

ཕྱི་ལོ2026ལོའི་ཟླ5པའི་ཚེས8ལ།

Address

Dharmshala
176219

Website

Alerts

Be the first to know and let us send you an email when གཟའ་ལྷག་པ། posts news and promotions. Your email address will not be used for any other purpose, and you can unsubscribe at any time.

Shortcuts

Share

Category