གཟའ་ལྷག་པ།

གཟའ་ལྷག་པ། གཟའ་ལྷག་པ་དང་ཁོ་བོའི་གོམ་སྟབས་ཆུང?

སུ་ནི་རྒང་དང་སུ་ནི་ཝ་མོ་རེད། མེ་ལྕེ། བདུན་ཕྲག་གསུམ་ལྷག་གི་ཡར་སྔོན་དུ། ཁོ་བོསཞེས་པའི་རྩོམ་ཐུང་ཞིག་བྲིས་ཏེ་སྤེལ་བ་ན། ཀློག་...
04/06/2026

སུ་ནི་རྒང་དང་སུ་ནི་ཝ་མོ་རེད།

མེ་ལྕེ།

བདུན་ཕྲག་གསུམ་ལྷག་གི་ཡར་སྔོན་དུ། ཁོ་བོསཞེས་པའི་རྩོམ་ཐུང་ཞིག་བྲིས་ཏེ་སྤེལ་བ་ན། ཀློག་པ་པོའི་ཁྲོད་དུ་བསམ་ཚུལ་འདྲ་མིན་ཅི་རིགས་བྱུང་ཞིང་། ད་རུང་སྐོར་ཞིག་གིས་འུ་ཅག་ལ་མཚོན་ན་སུ་ནི“རྒང”རེད་ཅེས་དང་། སུ་ནི“ཝ་མོ”རེད་ཅེས་དང་། ཡང་ན་སུ་ནི“རི་བོང་བློ་ལྡན”རེད་ཅེས་མང་དུ་དྲིས་བྱུང་ངོ་། །

རྩོམ་ཐུང་དེར་ཞུས་ཟིན་པ་ལྟར། བྷིར་ལིན་གྱིས་གསུངས་པའི“རྒང”ནི་དེང་སང་ཡིན་ན་མཁས་པའམ་ཆེད་མཁས་པ་ལ་གོ་བ་དང་། “ཝ་མོ”ནི་དེང་སང་ཡིན་ན་བསམ་བློ་བའམ་ཤེས་ཡོན་ཅན་ལ་གོ་བ་རེད། ལར“རྒང”ཡིན་ནའང་འདྲ། “ཝ་མོ”ཡིན་ནའང་རུང་། མི་རིགས་དང་སྤྱི་ཚོགས་གང་ཞིག་གི་ངོས་ཐད་ནས་གླེང་ནའང་འདི་གཉི་ག་མེད་དུ་མི་རུང་བ་ཡིན་ཞིང་། ང་རང་ཚོར“རྒང”གལ་ཆེན་པོ་ཡིན་པ་དེ་བཞིན་དུ། ང་རང་ཚོར“ཝ་མོ”ཡང་གལ་ཆེན་པོ་ཡིན་པ་སྨོས་ཅི་དགོས།

དེ་ཡང“རྒང”དང“ཝ་མོ”ལྟ་བུའི་ཡོན་ཏན་པ་ནི་ང་རང་ཚོ་ལ་མང་པོ་ཡོད་པ་དང་། ཁོ་བོས་བརྗོད་པའི“རི་བོང་བློ་ལྡན”ཡང་ང་རང་ཚོ་ལ་མང་པོ་ཡོད། ཉེ་རབས་ཀྱི་ཆ་ནས་བཤད་ན། འཇུ་མི་ཕམ་ནི“རྒང”ཞིག་ཡིན་ལ། དགེ་བཤེས་ཤེས་རབ་རྒྱ་མཚོ་ཡང“རྒང”ཞིག་ཡིན་པ་དང་། དེ་བཞིན་དུ་དགེ་འདུན་ཆོས་འཕེལ་ཡང“རྒང”ཞིག་ཡིན་པ་རེད། དེང་རབས་ཀྱི་ཆ་ནས་བཤད་ན། ཚེ་ཏན་ཞབས་དྲུང་ནི“རྒང”ཞིག་ཡིན་ལ། དམུ་དགེ་བསམ་གཏན་ཡང“རྒང”ཞིག་ཡིན་པ་དང་། དེ་བཞིན་དུ་དུང་དཀར་བློ་བཟང་འཕྲིན་ལས་ཀྱང“རྒང”ཞིག་ཡིན་པ་རེད། ད་རབས་ཀྱི་ཆ་ནས་བཤད་ན། བཙན་ལྷ་ངག་དབང་ཚུལ་ཁྲིམས་ནི“རྒང”ཞིག་ཡིན་ལ། དཔའ་རིས་སངས་རྒྱས་ཀྱང“རྒང”ཞིག་ཡིན་པ་དང་། དེ་བཞིན་དུ་མཁར་རྨེའུ་བསམ་གཏན་རྒྱལ་མཚན་ཡང“རྒང”ཞིག་ཡིན་པ་རེད།

ད་དུང་། མ་གཞི“རྒང”ཡིན་པ་ལ“ཝ་མོ”ཡི་ཁྱད་ཆོས་འབུར་དུ་ཐོན་འདུག་པ་དེ་འདྲའང་ཡོད་དེ། དཔེར་ན་དགེ་འདུན་ཆོས་འཕེལ་དང་དུང་དཀར་བློ་བཟང་འཕྲིན་ལས་ལྟ་བུ་ཡིན་ཞིང་། ཡང་མ་གཞི“ཝ་མོ”ཡིན་པ་ལ“རྒང”གི་མཁས་ཉམས་ལྡན་པ་དེ་འདྲའང་ཡོད་པ་ནི། དཔེར་ན་དོན་གྲུབ་རྒྱལ་དང་འབྲོང་བུ་ཚེ་རིང་རྡོ་རྗེ་ལྟ་བུའོ། །

དེང་སང་གི“ཝ་མོ”ཡི་ཕྱོགས་ནས། ཞོགས་དུང་ནི“ཝ་མོ”རུ་བགྲང་ཆོག་པ་དང་། བདུད་ལྷ་རྒྱལ་ཡང“ཝ་མོ”རུ་བགྲང་ཆོག་ལ། དེ་བཞིན་དུ་ཚ་བ་མདའ་སྨྱུག་ཀྱང“ཝ་མོ”རུ་བགྲང་ཆོག་པ་ཞིག་ཡིན། ཡང“རི་བོང་བློ་ལྡན”གྱི་ཕྱོགས་ནས། ད་ལྟའི“གྲོང་ཆོག”ལ་འདུར་རྒྱུག་བྱེད་པའི་ཨ་མཆོད་ཚོ་དང་། ལས་གཞིའམ་བྱ་དགའ་སྣ་ཚོགས་ཧབ་ཐོབ་རྒྱག་པའི་ཡོན་ཏན་པ་རྣམས་ནི“རི་བོང་བློ་ལྡན”གྱི་རྣམ་ཐར་སྐྱོང་མཁན་འཁྲུལ་མེད་ཡིན་ནོ། །

ཡོན་ཏན་པ་སྐོར་ཞིག་མཚམས་ལན་རེར“རྒང”བཅའ་འདོད་པ་དང་། ཡང་མཚམས་ལན་རེར“ཝ་མོ”བཅའ་འདོད་པ་དེ་འདྲ་ཡོད་ལ། ཡོན་ཏན་པ་སྐོར་ཞིག་སྔོན་ཆད“ཝ་མོ”ཡིན་པ་ལ་དེང་སང“རྒང”ཉན་པ་དང་། ཡང་སྔོན་ཆད“རྒང”ཡིན་པ་ལ་དེང་སང“རི་བོང་བློ་ལྡན”དུ་གྱུར་པ་དེ་འདྲའང་ཡོད། མ་ཟད། སོ་སོ“ཝ་མོ”ཡིན་བཞིན་དུ“རྒང”ཞིག་བཅའ་རྒྱུ་ཟེར་ནས་འཁྱོངས་གི་མེད་པ་དང་། སོ་སོ“རི་བོང་བློ་ལྡན”ཡིན་བཞིན་དུ“ཝ་མོ”ཞིག་བཅའ་རྒྱུ་ཟེར་ནས་འཁྱོངས་གི་མེད་པ་དེ་འདྲའང་ཡོད་དོ། །

རྒྱ་ཡེ་བཀྲ་བྷོ་ལ་ཆ་བཞག་ན། སྐབས་ལ་ལར“རྒང”ཞིག་བཅས་ན་སྙམ་གྱི་ཡོད་པ་དང་། སྐབས་ལ་ལར“ཝ་མོ”ཞིག་ཨེ་འཁྱོངས་ལྟ་གི་ཡོད་ལ། ཡང་སྐབས་ལ་ལར“རི་བོང་བློ་ལྡན”གྱི་བརྟུལ་ཞུགས་ནར་མར་འཛིན་གྱི་ཡོད། འཇུ་སྐལ་བཟང་གི་སྟེང་ན“ཝ་མོ”ཡི་ཆ་མང་དུ་བདོག་ནའང་། ཁོང་ནི“རྒང”ཞིག་བཅའ་འདོད་ཅི་བས་ཀྱང་ཆེ་ཞིང་། དྲང་མོར་བཤད་ན་འཇུ་སྐལ་བཟང་གི་གྲུབ་འབྲས་གཙོ་ཆེ་ཤོས་དེ། བསམ་བློ་བ་ཞིག་གི་བརྟུལ་ཞུགས་བཟུང་ནས་གསར་རྩོམ་ཟམ་མ་ཆད་པར་གནང་བའི་ཕྱོགས་ན་ཡོད་པ་ལས། མཁས་པ་ཞིག་བཅས་པའི་ཕྱོགས་ན་དེ་འདྲའི་མོད་པོ་ཞིག་ཨེ་ཡོད་སྙམ།

སྐབས་འདིར་ཅིས་ཀྱང་ངེས་དགོས་པ་ཞིག་ལ། ང་ཚོ“རྒང”ཞིག་བཅས་ནའང་འདྲ། “ཝ་མོ”ཞིག་བཅས་ནའང་ཆོག “རི་བོང་བློ་ལྡན”ཞིག་བཅས་ནའང་བླ། གང་ལྟར་རིགས་ཞེན་དཀར་པོ་ནི་ང་རང་ཚོའི་གཟུངས་གཞུག་དང་། དབྱངས་གསལ་སོ་བཞི་ནི་ང་རང་ཚོའི་བླ་སྲོག་ཡིན་པ་དེ་ནམ་ཡང་བརྗེད་མི་རུང་ངོ་། །

གཞན་ཡང་། “རྒང”དང“ཝ་མོ”གཉིས་སམ། “རྒང”དང“རི་བོང་བློ་ལྡན”གཉིས་ལ་མུ་བཞི་བརྩིས་ཚེ་བརྗོད་གཞི་འདི་ལྷག་ཏུ་ཇེ་གསལ་ལ་འགྲོ་བར་ཕན་མོད། དེས་མང་པོ་ཞིག་ལ་ཕོག་ཐུག་བཟོས་འགྲོ་བས་ན་རེ་ཞིག་སྐྱུར་བ་ལགས་སོ། །

ཕྱི་ལོ2026ལོའི་ཟླ6པའི་ཚེས1ལ།

རྒང་དང་ཝ་མོ། ད་དུང་རི་བོང་བློ་ལྡན་གྱི་ཚོགས། མེ་ལྕེ། དབྱིན་ཇིའི་རང་དབང་རིང་ལུགས་ཀྱི་བསམ་བློ་མཁན་ཨེ་ཟེ་ཡ་བྷིར་ལིན(Isaiah B...
04/06/2026

རྒང་དང་ཝ་མོ། ད་དུང་རི་བོང་བློ་ལྡན་གྱི་ཚོགས།

མེ་ལྕེ།

དབྱིན་ཇིའི་རང་དབང་རིང་ལུགས་ཀྱི་བསམ་བློ་མཁན་ཨེ་ཟེ་ཡ་བྷིར་ལིན(Isaiah Berlin，以赛亚·伯林，1909—1997)ལགས་ཀྱིས་དུས་རབས་བཅུ་དགུ་པའི་ནང་གི་ཨུ་རུ་སུའི་བསམ་བློའི་བྱུང་འཕེལ་སྐོར་གླེང་སྐབས། རྒང་དང་ཝ་མོ་གཉིས་ལ་དཔེ་བཞག་སྟེ་ཡོན་ཏན་པ་རྣམས་རྩ་བའི་ཆ་ནས་རིགས་ཆེན་པོ་གཉིས་སུ་བཀར་འདུག རིགས་དང་པོ་སྟེ་རྒང་ལྟ་བུའི་ཡོན་ཏན་པ་ནི་ཤེས་བྱ་སྣ་གཅིག་ལ་ནང་བྱན་ཆུད་ཅིང་མཁས་པའམ། ཡང་ན་རང་ཉིད་ཀྱི་བསམ་བློའི་མ་ལག་ཅིག་འཛུགས་པར་གཞོལ་ཏེ་གཞན་གང་ལ་ཡང་ཁ་ཡ་མི་བྱེད་པ་ལ་ཟེར་བ་དང་། རིགས་གཉིས་པ་སྟེ་ཝ་མོ་ལྟ་བུའི་ཡོན་ཏན་པ་ནི་ཤེས་བྱ་ཡོན་ཏན་མང་པོ་ཞིག་ལ་སྤྲོ་བ་འཕེལ་ཞིང་། དེས་མི་ཚད་གནད་དོན་གང་མང་ཞིག་གདོང་གིས་བསུས་ཏེ་བསམ་བློའི་འོད་ཟེར་ཕྱོགས་བཞིར་འཕྲོ་བ་ལ་ཟེར་བའོ། །

ཁོང་གིས་ད་དུང་རྒང་ལྟ་བུའི་ཡོན་ཏན་པའི་མཚན་གཞི་ལ་ཕི་ལ་ཐོ(柏拉图)དང་ཧེ་ཀེལ(黑格尔)སོགས་དང་། ཝ་མོ་ལྟ་བུའི་ཡོན་ཏན་པའི་མཚན་གཞི་ལ་ཨ་རི་སི་ཏོ་ཏལ(亚里士多德)དང་མོན་ཐན(蒙田)སོགས་བཞག་འདུག་ལ། ཡང་ཁོང་གིས་ཨུ་རུ་སུའི་རྩོམ་མཁན་ཐོལ་སི་ཏོའེ(托尔斯泰)ལགས་ལ་དཔྱད་པ་གཏོང་སྐབས་ན་རེ། ཁོང་ཉིད་མ་གཞི་ནས“ཝ་མོ”ཞིག་ཡིན་ནའང་། ཐོལ་སི་ཏོའེ་ནི“རྒང”ཞིག་བཅའ་འདོད་ཤིན་ཏུ་ཆེ། མཐའ་མར་ཐོལ་སི་ཏོའེ་ཁོང་ཝ་མོ་ཡག་པོ་ཞིག་འཁྱོངས་ཡོད་པ་ལས། རྒང་ཡག་པོ་ཞིག་ལར་ནས་འཁྱོངས་མེད་ཅེས་གསུངས་སོ། །

རང་ཅག་གི་སྣང་ངོར་རྒང་ནི་ཕྱི་རྩུབ་ནང་འཇམ་དང་། ཝ་མོ་ནི་གཡོ་སྒྱུ་ཟོལ་ཟོག་གི་མཚོན་བྱེད་ཅིག་ཏུ་གྱུར་ཡོད་ནའང་། བྷིར་ལིན་ལགས་ཀྱིས་ནུབ་ཕྱོགས་པའི་ཐུན་མིན་གྱི་བཤད་སྲོལ་ལྟར་སྲོག་ཆགས་འདི་གཉིས་དཔེ་རུ་བཀོད་དེ་ཡོན་ཏན་པ་དག་རིགས་གཉིས་སུ་དགར་ཅིང་། ཁོང་གི་རྣམ་དཔྱོད་ཀྱི་རྩལ་ལ་བརྟེན་ནས་རྒང་དང་ཝ་མོའི་སྐོར་གྱི་ལྟ་བ་དེ་ཕུན་སུམ་ཚོགས་པ་དང་གྱ་ནོམ་པར་བཏང་འདུག་གོ །

དེང་སང་གི་སྐད་ཆ་ལྟར་བཤད་ན། “རྒང”ནི་མཁས་པའམ་ཆེད་མཁས་པ་རེད་ལ། “ཝ་མོ”ནི་བསམ་བློ་བའམ་ཤེས་ཡོན་ཅན་རེད། ལས་རིགས་ཀྱི་ཆ་ནས“རྒང”གིས་རིག་གཞུང་གཙོ་བོར་གཉེར་བ་དང་། “ཝ་མོ”ཡིས་བསམ་བློ་གཙོ་བོར་འཛིན་པ་ཡིན། ཁོར་ཡུག་གི་ཆ་ནས“རྒང”ནི་དུས་བདེ་ཞོད་འཇགས་དང་རྒན་མོ་གསེར་འཁུར་གྱི་སྐབས་ལ་མང་པོ་འབྱུང་བ་དང་། “ཝ་མོ”ནི་སྡེ་གཟར་སྐྱས་འུར་དང་ཟང་ཟིང་ལང་ལོང་གི་སྐབས་ལ་མང་དུ་འབྱུང་བར་བཤད། ཤན་སྟོབས་ཀྱི་ཆ་ནས“རྒང”གི་ཤུགས་རྐྱེན་དང་མཚན་སྙན་གྲགས་དེ་སོ་སོའི་ཚེ་ཐོག་འདི་ལ་རྒྱས་པ་དང་། “ཝ་མོ”ཡི་ཤུགས་རྐྱེན་དང་མཚན་སྙན་གྲགས་དེ་སོ་སོ་འཇིག་རྟེན་དཀར་ངོགས་དང་ཁ་བྲལ་རྗེས་གཞི་ནས་རྒྱས་མགོ་ཚུགས་ཀྱི་ཡོད་དོ། །

བོད་ཁ་བ་ཅན་གྱི་སྤྱི་ཚོགས་ཁྲོད། “རྒང”ངམ་མཁས་པ་བྱོན་མྱོང་ཡོད་ལ། “ཝ་མོ”འམ་བསམ་བློ་བའང་བྱོན་མྱོང་ཡོད། དུས་དེ་རིང་ཡང་བསམ་བློ་ཁོ་ན་གླེང་བའི་ཤེས་ཡོན་ཅན་ཡོད་ལ། རིག་གཞུང་རྐྱང་བ་གཉེར་བའི་ཆེད་མཁས་པའང་ཡོད། དེ་མིན་ད་དུང“རི་བོང”ཡང་ཡོད་དེ། “རི་བོང”དེ་ནི་བློ་རིག་གསལ་བ་དང་སྤྱང་གྲུང་ལྡན་པ། དུས་ལ་བསྟུན་ཤེས་པ་དང་མྱི་ལ་འགྲོགས་མཁས་པ། རང་དོན་མི་འཕྱུག་པ་དང་གཞན་དོན་མི་སེམས་པ་འབའ་ཞིག་ཡིན། “རྒང”ཡང་མ་ཡིན་ལ“ཝ་མོ”འང་མ་ཡིན་པའི“རི་བོང”བློ་ལྡན་ནི་ལོ་འདི་ཚོར་ཤིན་ཏུ་མང་ངོ་། །

ཧ་ལས་དགོས་པ་ཞིག་ལ། སྔོན་ཆད“ཝ་མོ”ཡིན་པ་ལ་ད་ལྟར“རྒང”དུ་གྱུར་པ་དང་། སྔོན་ཆད“རྒང”ཡིན་པ་ལ་ད་ལྟར“རི་བོང”དུ་གྱུར་པའང་ཉུང་ཉུང་མིན། དེ་ཡང་། “རི་བོང”བློ་ལྡན་གྱི་མཐར་ཐུག་གི་དམིགས་བྱ་ཉག་གཅིག་ནི་ཇི་སྐད་དུ། ཙ་རིའི་གནས་སྐོར་བྱེད་པ་མིང་གི་དོན། །ཚ་གྲང་དཀའ་ཐུབ་བྱེད་པ་ལྟོ་ཡི་དོན། །ཛ་ཡའི་གསུང་རབ་ཀློག་པ་ཡོན་གྱི་དོན། །ཝ་ལེར་བསམས་ན་ཐམས་ཅད་ནོར་གྱི་དོན། །ཞེས་པ་ལས་མ་འདས་སོ། །

སྤྱིར་ཡིན་ན་སོ་སོ“རྒང”ལྟ་བུའི་མཁས་པ་བཅའ་བའམ། “ཝ་མོ”ལྟ་བུའི་བསམ་བློ་བའི་བརྟུལ་ཞུགས་འཛིན་པའམ། “རི་བོང”བློ་ལྡན་ལྟ་བུའི་ཡོན་ཏན་པ་བཅའ་བ་ནི་མྱི་རང་རང་གི་འདོད་མོས་དང་གདམ་ཀ་ཞིག་ཡིན་པས། དེ་ལ་སུས་ཀྱང་ཐེ་གཏོགས་བྱེད་མི་ཆོག་ཅིང་སུས་ཀྱང“ཁ་ལག་སྲིང”མི་ཆོག་པ་བདེན་མོད། ཡིན་ནའང་བོད་རང་གི“ས་ཆུ”དང་། དུས་བབ་དང་། ཁོར་ཡུག་སོགས་ལ་དམིགས་ནས་བཤད་ན། ཁ་སང་དེ་རིང་ང་རང་ཚོ་ལ་མཁོ་ངོ་མ་ནི“ཝ་མོ”དང“རྒང”ཡིན་པ་ལས། “རི་བོང”བློ་ལྡན་གྱི་ཚོགས་ནི་མ་ཡིན་ཞིང་། ཡང་གཅིག་བཤད་ན་ང་རང་ཚོར“རི་བོང”ལས་ཀྱང“རྒང”མཁོ་ལ། “རྒང”ལས་ཀྱང“ཝ་མོ”མཁོ་བ་ཡིན་ནོ། །

ཕྱི་ལོ2026ལོའི་ཟླ5པའི་ཚེས8ལ།

ཕ་ཡུལ་གྱི་འགྱུར་ལྡོག མེ་ལྕེ། སྐད་འཕྲིན་ལས་བཤུས། ད་ལོའི་ལོ་སར་ལ་ཕ་ཡུལ་དུ་ཕྱིན་ཅིང་། ཕ་ཡུལ་ནས་རང་གི་ཤ་ཉེ་རིང་དང་གཉེན་ཉེ་དུ...
25/03/2026

ཕ་ཡུལ་གྱི་འགྱུར་ལྡོག

མེ་ལྕེ།

སྐད་འཕྲིན་ལས་བཤུས།

ད་ལོའི་ལོ་སར་ལ་ཕ་ཡུལ་དུ་ཕྱིན་ཅིང་། ཕ་ཡུལ་ནས་རང་གི་ཤ་ཉེ་རིང་དང་གཉེན་ཉེ་དུ། གྲོགས་མཛའ་བཤེས་ཀུན་ལ་ལོ་སར་གྱི་འཚམས་འདྲི་དང་བཀྲ་ཤིས་སྨོན་འདུན་ཞུ་རྒྱུ་བྱུང་བར་ཧ་ཅང་དགའ་པོ་བྱུང་། ཁོ་བོ་ནི་ལོ་སར་སོགས་ལ་མ་གཏོགས་ཕ་ཡུལ་དུ་འགྲོ་རྒྱུའི་གོ་སྐབས་ཤིན་ཏུ་ཉུང་བས་ན། སྤྱིར་བཏང་གིས་རང་གི་སྡེ་བ་ཚོ་བའི་གནས་ཚུལ་མང་པོ་ཞིག་ཤེས་ཐུབ་ཀྱི་མེད།

ལོ་སར་ནང་ཡུལ་མི་རྣམས་ལ་ཁ་བརྡ་བྱས་པ་དང་། ཁྱིམ་ཚང་སྐོར་ཞིག་ཏུ་ལོ་སར་ལ་སོང་བའི་ཚེ་ན་ཕ་ཡུལ་ལ་འགྱུར་ལྡོག་མང་པོ་བྱུང་འདུག་པ་གཞི་ནས་ཚོར། འགྱུར་བ་གང་མང་མང་གི་ཁྲོད་ནས་བདག་ལ་བག་ཆགས་ཟབ་ཤོས་ནི་གཉིས་ཡོད་དེ། གཅིག་ནི་རྒན་དར་གཞོན་གསུམ་མེད་པར“དྲ་བའི་གཅོང་རོང”དུ་ལྷུང་འདུག་པ་དང་། ཅིག་ཤོས་ནི་ཁྱིམ་ཚང་སོ་སོའི་སྒོ་ཁའི་དར་ལྕོག་མེད་པ་དེ་རེད།

དེང་སང་མྱི་རེའི་ལག་ན་ཁ་པར་རེ་དང་ཁ་པར་རེ་ལ་བྱང་བུ་རེ་ཡོད་པས། ཁྱོད་ཡུལ་གང་ལ་སོང་ཡང་ས་གང་ནས་བསྡད་ཀྱང་ཁ་པར་ལ4Gའམ5Gཡི་བརྡ་རྟགས་གང་རུང་ཞིག་ཡོད་པ་ཡིན་ན། འཇིག་རྟེན་རིལ་མོ་ནི་རང་གི་ལག་མཐིལ་དུ་གནས་པ་དང་ཀུན་ནས་མཚུངས་ཤིང་། ལྷག་པར་དུ་སྐད་འཕྲིན་དང་མགྱོགས་འཕྲིན་དང་འདར་དབྱངས་སོགས་དར་བ་ནས་བཟུང་། བོད་ཡུལ་ལ་མཚོན་ན་དྲ་བའི་རིག་གནས་དར་ཁྱབ་ཆེན་པོ་བྱུང་སྟེ། དུས་དེ་རིང་དྲ་ཚོང་ནི་དབྱར་གྱི་མཚོ་མོ་འཕྱུར་འཕྱུར་དང་། དྲ་འབར་ནི་སེང་གེ་དཀར་མོ་འགྱིང་འགྱིང་དང་། དྲ་ཇག་ནི་རུ་སྤྱང་སྔོན་མོ་འདུར་འདུར་དང་། དྲ་འབུ་ནི་ཁ་བ་བུ་ཡུག་འཚུབ་འཚུབ་ཡིན་པའོ། །

དེར་འབྲེལ་ནས་དྲ་ཐོག་གི“བླ་མ”ཟེར་བ་དང་། དྲ་ཐོག་གི“གྲུབ་ཐོབ་པ”ཟེར་བ་དང་། དྲ་ཐོག་གི“མཁས་པ”ཟེར་བ་དང་། དྲ་ཐོག་གི“ཚོང་དཔོན”ཟེར་བ་དང་། དྲ་ཐོག་གི“སྨན་པ”ཟེར་བ་དང་། དྲ་ཐོག་གི“དགེ་རྒན”ཟེར་བ་སོགས་སྤང་ལ་ཤ་མོ་བརྡོལ་བ་བཞིན་མང་པོ་བྱུང་ཞིང་། ཁ་བདེ་ལྕེ་བདེ་ཅན་པོ་དང་མགོ་བདེ་དྲན་འཕྲུལ་ཚ་བ་དེ་ཚོས་རང་རེའི་རོང་འབྲོག་མང་ཚོགས་དག་ལ་རྟག་པར་མགོ་སྐོར་གཏོང་བ་དང་། ཀླད་པ་བཀྲུ་བ་དང་། བློ་ཁ་སྒྱུར་བ་བཅས་ཀྱི་ལས་ལ་རྩེ་གཅིག་ཏུ་གཞོལ་གྱི་ཡོད་འདུག

ང་རང་ཚོའི་ཡུལ་མི་སྤུན་ཟླ་རྣམས་ལ་ཆ་བཞག་ནའང་། མང་ཆེ་བ་ཞིག་ཁ་སང་དེ་རིང“དྲ་བའི་གཅོང་རོང”ཆེན་པོ་དེའི་ནང་ལྷུང་སྟེ་ཁ་པར་ཐོག་ཅེར་ཅེར་ལ་འདུག་པར་མ་ཟད། ད་དུང་ཁོ་རང་ཚོའི་ངོས་ནས“ཝང་ཧུང”ངམ་དྲ་འབར་དག་གིས་ནི་ཅི་གསུང་ཆོས་ཡིན་ལ། “ཝང་ཧུང”ངམ་དྲ་འབར་དག་གིས་ནི་མཛུབ་མོས་གར་བསྟན་ཤར་ཡིན་པ་འདི་ཅི་འདྲའི་སྐྱོ་བ་ལ་ཨང་།

དེབ་དཀར་མཁན་པོ་ན་རེ། “ཁྱིམ་རེ་རེ་བཞིན་གྱི་སྒོ་སྟེང་དུ་དར་མདུང་རེ་སློང་བ་འདི་ཡང་བོད་ཀྱི་ཐུན་མོང་མ་ཡིན་པའི་སྲོལ་ལྟ་བུ་ཡིན་ཏེ། དེ་ཡང་ཐོག་མར་དམག་གི་རྟགས་སུ་མངོན་ལ། རྗེས་སོར་ཆོས་ཀྱི་ལས་སུ་སོང་བས། སྟོད་ན་རྒྱ་གར་དང་འདྲེས་པའི་བོད་རིགས་རྣམས་ནས། སྨད་ན་རྒྱ་ནག་གི་གྲོང་དཀྱིལ་དུ་ཡོད་པའི་བོད་ཀྱི་མི་ཁྱིམ་གཅིག་ཡིན་ཡང་རུང་། སྒོ་སྟེང་དུ་དར་ལྕོག་སློང་བའི་སྲོལ་དེ་ད་ལྟའི་བར་དུ་ཡོད”ཅེས་གསུངས་པ་ལྟར། བོད་ཀྱི་མི་ཁྱིམ་ཞིག་ལ་མཚོན་ན་ཁྱིམ་ཚང་གི་ཐོག་ཀའམ་སྒོ་ཁར་དར་ལྕོག་སློང་བའི་སྲོལ་འདི་གནའ་སྔ་མོ་ནས་མཆིས་ཤིང་། ཐོག་མར་དམག་གི་རྟགས་དང་གཞུག་ནས་ཆོས་ཀྱི་ལས་སུ་སོང་བའི་དར་ལྕོག་འདི་ཉིད་དུས་ད་ལྟར་ཡང་བོད་པའི་ཁྱིམ་ཚང་རེ་ལ་ཧ་ལམ་མེད་མཁན་དཀོན།

བོད་མི་རྣམས་ལ་ཆ་བཞག་ནས་བཤད་ན། ལོ་སར་ལ་སྒོ་སྟེང་དུ་དར་ལྕོག་སོ་མ་ཞིག་སློང་བ་ནི་ཕྱོགས་གཅིག་ནས་ལོ་གསར་པའི་ནང་སོ་སོའི་བསོད་ནམས་འཕེལ་བ་དང་རླུང་རྟ་རྒྱས་པ་དང་ཁ་ལས་དགེ་བ་དང་བསམ་དོན་འགྲུབ་པར་གསོལ་བ་འདེབས་པ་མཚོན་གྱི་ཡོད་ལ། ཡང་ཕྱོགས་གཞན་ཞིག་ནས་སྒོ་ཁར་དར་ལྕོག་བཙུགས་པ་དེས་ཁྱིམ་འདི་ཀོ་བོད་པའི་ཁྱིམ་ཚང་གཤའ་མ་ཞིག་ཡིན་པ་དེ་གསལ་པོར་མཚོན་གྱི་ཡོད།

ཡ་མཚན་པ་ཞིག་ལ་ད་ལོར་ཕ་ཡུལ་ན་དར་ལྕོག་མཐོང་རྒྱུ་མི་འདུག་ལ། རླུང་གིས་གཡོ་བའི་དར་ལྕེ་ནི་དེ་བས་ཀྱང་མཐོང་རྒྱུ་མི་འདུག གོ་ཐོས་ལྟར་ན་གོང་རིམ་ནས་དར་ལྕོག་སློང་མི་ཆོག་པའི་བཀའ་བབས་པ་རེད་ཟེར། སྐབས་འདིར་ངས་ཆུང་དུས་ཀྱི་ལོ་རེ་རེའི་ལོ་སར་འཐོན་ལ་ཉེ་བའི་ཚེ་དར་ལྕོག་དཔར་བའི་ཚུལ་དང་། ལོ་སར་ཚེས་གཅིག་ཉིན་སྒོ་སྟེང་དུ་དར་ལྕོག་བསླངས་པའི་ཚུལ་དག་དྲན་བྱུང་། དེ་མིན་ཉིན་བཟང་སྐར་བཟང་ལ་རི་རྩེ་ནས་ལྷ་བསང་ཕུད་པ་དང་། རླུང་རྟ་སྤུར་བ་དང་། དར་ལྕོག་བཙུགས་པ་སོགས་ཀྱང་ཡིད་ལ་ཝ་ལེར་དྲན་བྱུང་ངོ་། །

ཕ་མེས་ཡང་མེས་ནས་བརྒྱུད་འོང་བའི་ལུགས་སྲོལ་འདི་གྲ་མ་ཉམས་གྲུ་མ་ཆག་པར་རྒྱུན་འཛིན་བྱས་ན་ཅི་ཞིག་ལ་གནོད་འགྲོ་གི་ཡོད་ཨང་། ཁྱིམ་ཚང་རེ་རེའི་སྒོ་སྟེང་དུ་དར་ལྕོག་ལྷབ་ལྷུབ་ཏུ་བསྐྱོད་ན་ཅི་ཞིག་མེད་པ་ཆགས་འགྲོ་གི་ཡོད་ཨང་། ད་ལོར་དར་ལྕོག་སློང་མི་ཆོག་ན། སང་ལོར་བསང་ཁྲི་ཡོད་མི་ཆོག་ཟེར་རམ། སང་ལོར་བསང་ཁྲི་ཡོད་མི་ཆོག་ན། གནངས་ལོར་མཆོད་མེ་འབུལ་མི་ཆོག་ཟེར་རམ།

ཕྱི་ལོ2026ལོའི་ཟླ3པའི་ཚེས19 ལ།

07/01/2026

བུ་བསམ་གཏན་ལྷ་མོ།

ཚིག དབྱངས། ལེན་མཁན། ཧོར་བྷེ་བསོད།

བུ་མོ་བསམ་གཏན་ལྷ་མོ།
སུ་ཡི་ཆེད་དུ་མིག་ཆུ་ལྷུང་སོང་།
གང་གི་དོན་དུ་མགྲིན་པ་བརྣངས་སོང་།
སྐད་དང་ཡི་གེའི་གནས་བབ་བསམ་ནས་མིག་ཆུ་ལྷུང་སོང་།
རིགས་དང་རུས་པའི་ཐོབ་ཐང་བསམ་ནས་མགྲིན་པ་བརྣངས་སོང་།
ཁྱོད་ཀྱི་སྙན་ངག་ཅིག་གིས།
ཕ་དང་མེས་པོའི་ཟུངས་ཁྲག་གི་བཞུར་སྒྲ་ཐོས་བྱུང་།
ཁྱོད་ཀྱི་སེམས་གཏམ་ཞིག་གིས།
ལོ་དང་ཟླ་བའི་སྣང་མེད་ཀྱི་ཚོར་བ་བསད་བྱུང་།

བུ་མོ་བསམ་གཏན་ལྷ་མོ།
དགུན་གྱི་མེ་ཏོག་འདྲ་ལེ།

བུ་མོ་བསམ་གཏན་ལྷ་མོ།
ཅི་ཞིག་དོན་དུ་སློབ་ཆེན་འགྲིམས་སོང་།
གང་ཞིག་ཆེད་དུ་སློབ་སྦྱོང་བྱས་སོང་།
དབྱངས་གསལ་སོ་བཞིའི་རིན་ཐང་བསམ་ནས་སློབ་ཆེན་འགྲིམས་སོང་།
རིག་གཞུང་ནོར་བུའི་གཟི་བརྗིད་བསམ་ནས་སློབ་སྦྱོང་བྱས་སོང་།
ཁྱོད་ཀྱི་ལྷག་བསམ་ཞིག་གིས།
ཧི་མ་ལ་ཡི་མཚན་ལྗོངས་ལ་ཟླ་འོད་འཕྲོས་སོང་།
ཁྱོད་ཀྱི་གཏམ་རྒྱུད་ཅིག་གིས།
ཡར་ཀླུང་གཙང་པོའི་འགྲམ་རྒྱུད་ལ་སྦ྄ེང་ཆར་བབས་སོང་།

བུ་མོ་བསམ་གཏན་ལྷ་མོ།
ཉིན་གྱི་སྐར་ཆེན་འདྲ་ལེ།

14/12/2025

དགའ་ལྡན་ལྔ་མཆོད་ཐོག་ཁའི་རྩེ་ལ་ཡོད།།
ཐུག་པ་བག་ཐུག་ཁོག་མའི་ནང་ལ་ཡོད།།

དེ་རིང་དང་དེ་སྔོན། 😎🙏
17/11/2025

དེ་རིང་དང་དེ་སྔོན། 😎🙏

༄༅།གཞོན་ནུ་བདག་གི་གོམ་སྒྲ་དྲན་པ།གཉན། ང་རང་ཆུང་ངུའི་དུས་སུ། ངེ...
12/11/2025

༄༅།གཞོན་ནུ་བདག་གི་གོམ་སྒྲ་དྲན་པ།

གཉན།

ང་རང་ཆུང་ངུའི་དུས་སུ། ངེད་ཀྱི་སྡེ་བའི་སྟོད་སྨད་གང་དུའང་ངའི་པྲ་ཆལ་གྱི་སྣང་བརྙན་ནི། ཡུལ་མི་རྣམས་ཀྱིས་ཉམས་འཇོག་བྱེད་ས་ཞིག་ཏུ་གྱུར་ཡོད་ལ། འབྲོག་པའི་ཡུལ་སྲོལ་དང་འཆར་ཡན་གྱི་འཚོ་བའི་ཉི་འོད་ཁྲོད་ན། འཚར་ལོངས་བྱུང་དང་འབྱུང་གིན་པའི་ང་ནི། ཉིན་རེ་རེར་བསམ་བཞིན་མ་ཡིན་པར་ཀུ་རེ་དང་རྩེད་མཚར་འབའ་ཞིག་གི་ཆེད་དུ། བསམ་ཡུལ་ལས་འདས་པའི་ཉེན་ཁ་ཅན་གྱི་བསྟན་བཤིག་གི་ལས་སྣ་ཚོགས་འཕྲད་འགྲོ་བ་དང་། ན་ཚོད་མཉམ་པའི་འབྲོག་ཕྲུག་དེ་དག་དང་མཉམ་དུ། མངོན་ལྐོག་རིས་མེད་དུ་མཚར་སྣང་ཆེ་བའི་བྱ་བ་ག་གེ་མོ་ཐམས་ཅད་ལ་འགྲན་བསྒོ་བར་ཚོར་སྣང་ཤུགས་དྲག་པོ་གདའོ།།

ངེད་ཀྱི་སྡེ་བའི་མི་ཆེན་རྣམས་གྱི་མིག་ལམ་དུ། པྲ་ཆལ་གྱི་ལས་ལ་རིང་ནས་གོམས་པའི་ང་ནི། རྟག་པར་རང་གཤིས་རྩིང་པོ་ཡོད་པའི་མ་རབས་ཤིག་ཏུ་མཐོང་བ་དང་། ཡུལ་དུས་གང་དུའང་ངེད་རང་ནི་ཞི་དུལ་བག་ཡོད་དང་ལུགས་མཐུན་ཚུལ་ལྡན་གྱི་བྱིས་པ་གཞན་རྣམས་དང་འདྲ་བར། ཡ་རབས་ཀྱི་མཚན་སྙན་གསོལ་ས་ཞིག་མིན་པ་མ་ཟད། ཐ་ན་ཡ་རབས་ཀྱི་བསྔགས་བརྗོད་སོགས་དང་ཡེ་ནས་འབྲེལ་བ་མེད་པའི་ལས་སྐལ་ལ་འགྲོགས་དགོས་བྱུང་།

ནར་སོན་གྱིན་པའི་བྱིས་པ་ཞིག་ལ་མཚོན་ན་མིག་སྔུན་གྱི་སྡེ་བའི་མི་རྣམས་ནི། ནམ་ཡང་བརྒལ་དཀའ་བའི་མི་ཚོགས་སྟུག་པོ་ཞིག་ཡིན་ཏུ་ཆུག་ཀྱང་། དེ་དག་གི་ཉིན་རེ་རེའི་ཟང་ཟིང་ཁྲོད་དུ་ང་རང་ཞི་དུལ་བག་ཕེབས་ངང་རྣལ་དུ་གནས་ཐབས་བྲལ། ཐེངས་་ཤིག་ངེད་ཀྱི་སྡེ་བའི་ཀུང་ཧྲེའི་ནང་དུ་ཚོགས་འདུ་བསྡུ་རན་སྒང་ལ་འཁེལ་སོང་། དུས་སྐབས་དེར་ཚོགས་འདུ་བསྡུ་དགོས་ན། སྡེ་བའི་གླིང་བར་དུ་ཀི་ཡང་ཡང་བཏབ་ནས་བརྡ་གཏོང་བ་ལས་གློག་ཆས་སོགས་ཀྱི་སྒྲ་སྦུག་གི་ནང་དུ་འབོད་ས་མི་འདུག འགོ་དཔོན་ཨ་རྒྱལ་གྱིས་སྐད་ཤུགས་དྲག་པོས་ཀི་འདེབས་ཞོར་འདེབས་ཞོར་དུ་ཚོགས་འདུར་ཤོག་ཅེས་འབོད་ཀྱིན་པའི་སྐབས་ཏག་ཏག་ལ། ངས་ཀྱང་འགོ་དཔོན་དང་འདྲ་བར་ཤུགས་ཆེན་པོས་ཐེངས་ཁ་ཤས་ལ་ཚོགས་འདུ་འཚོག་མི་དགོས་ཀི་བཏབ་སྐད། ཨ་རྒྱལ་ལགས་ཀྱི་ཁྲོ་གཉེར་དང་སྡུག་སྐད་དྲག་པོས་ང་ནི་སྡེ་བའི་གླིང་བར་དུ་བདའ་འདེད་བྱ་དགོས་པའི་ཁ་མཆུ་དང་འཕྲད་དོ། །

ཡིན་རྒྱུ་ནི་དེང་ཐོག་ངའི་མིག་སྔུན་ན་ཀི་འདེབས་པའི་འགོ་དཔོན་ཁོང་གི་གདོང་གི་བཟོ་ལྟ་དེ་ཉིད་ལ་ཡུལ་དངོས་ནས་བལྟས་ན་ནི། ངང་ངམ་ཤུགས་ཀྱིས་དགོད་ཁ་སློང་བའི་རྣམ་པ་ཞིག་ཡོད་པ་དང་། ཤུགས་ཆེན་པོས་བཏབ་པའི་ཀི་སྐད་དེའི་མཇུག་ནི་ཐེངས་རེར་འགག་མི་འགྲོ་སྙམ་པ་བྱུང་བའི་ཚོར་བ་དེས་བསླངས་་པ་དང་། དེ་ནས་ངས་ཀྱང་འཕྲལ་མར་བསམ་ཡུལ་ལས་འདས་པའི་ལད་མོ་ཞིག་གློ་ལྡེག་ལ་གནང་དགོས་བྱུང་ཞིང་། ཚོགས་འདུ་འཚོགས་མི་དགོས་ཞེས་བསྙད་པ་དེས། འགོ་དཔོན་ཁོང་གཏིང་ནས་དཀྲུགས་བཞག་པ་ལ་དགོངས་ཡངས་ཡོང་ཐབས་ཁྱོན་ནས་མ་བྱུང་། དེ་ནས་བཟུང་འགོ་དཔོན་ལགས་དང་ངའི་དབར་དུ་གྱོད་རྙིང་མི་སོས་པ་ཞིག་ཡོད་པ་ནང་བཞིན། ཁོང་སྡོད་སའི་ཀུང་ཧྲེའི་ནང་དུའམ་མཐའ་ཁ་གང་རུང་ལ་འགྲོ་དུས། ང་ནི་རྟག་པར་རིག་པ་སྒྲིམ་ནས་འགྲོ་བ་དགོས་པ་ཞིག་ཏུ་གྱུར་ལ། གྱོད་རྙིང་དེ་རྐྱེན་བྱས་ཐོག་དུས་ཕྱིས་གོ་སྐབས་དང་བསྟུན་ནས། འགོ་དཔོན་གྱི་ཁྲོ་གཉེར་དང་སྡུག་སྐད་ལ་འཇབ་རྒོལ་གྱིས་སྐྱིན་པ་ལེན་པའི་ཆེད་དུ། མིང་ཐོབ་ཅན་གྱི་ཀུང་ཧྲེའི་ཁང་པའི་སྒེའུ་ཁུང་གི་ཤེལ་སྒོ་དག་ལ་ལྐོག་རྡོ་སྤྲད་མྱངས་པ་དང་། འགོ་དཔོན་ལགས་ཀྱི་ཁྲོ་གཉེར་དང་སྡུག་སྐད་ལ་ཡ་ལན་སྤྲོད་པའི་ཆེད་དུ། ངས་རང་ཉིད་ཀྱི་ལོ་ཚོད་ལས་བརྒལ་བའི་ཏིས་ལན་བརྩད་ཚར་བ་ལ་ངའོ་སྙམ་པའི་སྟོང་བསམ་བཅངས་སོ།། ངེད་རང་ལ་དམིགས་བསལ་དུ་ཡོད་པའི་པྲ་ཆལ་གྱི་གཤིས་ཀ་དེ། ཀུང་ཧྲེ་སོགས་ཀྱི་སྒྲོམ་གྱི་ནང་དུ་སྡུད་ཐབས་མ་ཡོད་པ་ཡིན་མི་སྲིད་ཀྱང་། དུས་སྐབས་དེར་ང་ནི་ཀུང་ཧྲེ་སོགས་ཀྱི་སྒྲོམ་གྱི་ཕྱི་རོལ་གྱི་རང་དབང་གི་ནམ་མཁའ་ཆུང་ཆུང་ཞིག་གི་འོག་ཏུ། རང་ཉིད་ལ་བདག་པའི་པྲ་ཆལ་གྱི་གཤིས་ཀ་དང་འགྲོགས་ནས་གཏོར་བཤིག་གི་ལས་སྣ་ཚོགས་ལ་འཇུག་པར་སྤྲོ། དེ་དུས་ཀྱི་གཤིས་ཀ་ནི་དོན་དངོས་སུ་མི་ཆེན་གྱི་ངོ་ཡ་ལ་ལངས་མི་ནུས་པ་ཞིག་ཡིན་རུང་། མི་ཆེན་གྱི་ངོ་ལ་བལྟས་ནས་འཚར་ལོངས་བྱུང་བ་ཞིག་ཡིན་ལ། དེ་དུས་ཀྱི་གཤིས་ཀའི་ངོས་ཀྱི་པྲ་ཆལ་གྱི་རྣམ་པ་དེ་མི་ཆེན་རྣམས་ཀྱིས་ཐུབ་ཚོད་བཏང་བ་དང་ཁ་རྡུང་བྱས་པ་སོགས་འབྲེལ་བ་ཡོད་པ་ཞིག་ཀྱང་ཡིན་སྙམ་མོ།།

ཡང་ཐེངས་ཤིག་ལ། ངེད་ཀྱི་སྡེ་བའི་ནང་ན་མིང་ལ་རྫི་ནག་ཏུ་འབོད་པའི་སྐྱེས་པ་ཞིག་ཡོད་དེ། ཁོང་ལ་གང་ནས་ཕྲད་ནའང་ངའི་ཐོག་ཏུ་རྫིག་རྫིག་ཞེ་དྲག་གནང་ནས་ང་ལ་བསྟན་བཤིག་ཅེས་དམོད་པའམ་རྔམ་ངོམ་པར་བྱེད། སྐབས་སྐབས་སུ་སྡེ་བའི་གླིང་བར་ན། རྟ་ཕོ་སྔོ་སྔོ་ཞོན་ནས་འོངས་པའི་ཁོང་མཐོང་མ་ཐག་ཏུ་ངའི་སེམས་སུ་དོགས་སྣང་ཚ་བོ་ཞིག་ངང་ངམ་ཤུགས་ཀྱིས་ཐོན་པའི་བག་ཆགས་བཞག་འདུག སྟེས་དབང་གིས་ཡིན་ནམ་ཅི། ཉིན་ཞིག་ལ་ཁོས་རྟ་ཕོ་སྔོ་སྔོ་དེ་ཞོན་ནས་ངེད་ཀྱི་སྡེ་བའི་ནང་ན་ཨ་ཁུ་སྨན་པ་ཞིག་ཡོད་པ་དེའི་སྒོར་ཐོན་འདུག་པ་ངས་དེ་མུར་མཐོང་སོང་། ཁོ་རྟ་ཐོག་ནས་བབས་ཤིང་རྟ་ཕོ་ཐད་ཀར་ཕུར་མགོར་བཏགས་ནས་ཅི་མི་སྙམ་པར་བུད་སོང་ལ། བསམ་ཡུལ་ལས་འདས་པའི་གོ་སྐབས་དེ་ནི་ཁོ་རང་གིས་ང་ལ་ཆེད་དུ་གནངས་པ་ཡིན་ནམ། ཡུན་ཙམ་འགོར་རྗེས། ང་རྟ་ཕོའི་འགྲམ་དུ་སོང་ནས་རྒྱབ་ཀྱི་ཏ་ལེན་སར་བཞག་པ་དང་། ནང་གི་དངོས་པོ་ཚང་མ་ཕྱི་ལ་རེ་རེ་བྱས་ནས་བསློགས། དེའི་ནང་ན་ཡོད་པའི་སིལ་ཏོག་དང་སྦྲང་མངར་གྱི་ཤོག་ཁུག་ཚང་མ་ཁྱེར། དེ་ནས་རྟ་ཕོའི་མགོ་ནས་སྲབ་བླངས་ཏེ་ཐད་ཀར་ས་ལ་གཡུགས་པ་དང་། རྟ་ཕོ་ལ་བསམ་བཞིན་འདྲོག་བསླངས་ནས་གང་འདོད་དུ་གློད་བཏང་། ཨ་ཁུ་སྨན་པའི་ཁང་པ་བསྐོར་ནས་རྒྱབ་ལ་སོང་ན་ཐད་ཀར་རི་ངོས་སུ་ཐོན་ཐུབ་པས་ང་གང་མྱུར་ངང་རི་ངོས་སུ་ཐོན་ཐབས་བྱས། རི་ངོས་ནས་མར་བལྟས་དུས་ངེད་ཀྱི་སྡེ་བ་ཧྲིལ་བོ་མཐོང་ཐུབ་ཀྱི་ཡོད། ངའི་མིག་ལམ་དུ་ད་ཅིའི་རྟ་ཕོ་སྔོ་སྔོ་དེ་མངོན་བྱུང་། རྒྱབ་ལ་སྒ་སྟོང་ཁུར་ཞིང་ཕོ་ཞབས་སུ་ཡོབ་ཆེན་གཡུག་ཞོར་གཡུག་ཞོར་ལ་འདྲོགས་ལངས་ནས་རྒྱུགས་ཀྱིན་པའི་རྟ་ཕོ་དེ། མི་རིང་བར་སྡེ་བའི་གླིང་བར་ཡར་མར་བརྒྱུད་དེ་མཐའ་ཟིན་སོང་། ང་རི་ངོས་སུ་ཙོག་ནས་སིལ་ཏོག་དང་སྦྲང་མངར་ལོངས་སུ་སྤྱོད་བཞིན། རྟ་ཕོ་དེ་ལ་མིག་གིས་སྐྱེལ་མ་བྱས་ནས་ཐག་རིང་ཐག་རིང་དུ་ཕྱིན་ནོ།།

ལྟད་མོ་དངོས་ནི་དེའི་རྗེས་སུ་བྱུང་དགོས་པ་ཡིན་ལ། ཨ་ཁུ་སྨན་པའི་ར་ནང་ན་ཡོད་པའི་མྱི་ལྡིང་ཕྱིར་ལ་ནམ་ཚོད་ཐོན་ནམ་སྙམ་པའི་མཚར་སྣང་དེ་ལ་བསྒུགས་ནས་བསྡད། རི་ངོས་ནས་མར་བལྟས་དུས། ཨ་ཁུ་སྨན་པའི་ར་ཡི་སྒོ་ཁ་ཐམས་ཅད་ངའི་ལག་མཐིལ་དུ་ཡོད་པའི་མི་ཚད། ཐ་ན་སྒོ་ཁར་ད་ཅི་རྟ་ཕོ་འདོག་སའི་ཕུར་བ་ཆེན་པོ་ཞིག་ཡོད་པ་དེའང་ལྷང་ངེར་མཐོང་ཐུབ། བར་སྐབས་ཤིག་ལ་ངའི་སེམས་ནང་ན་ཡོད་པའི་མྱི་ལྡིང་ཕྱི་རོལ་དུ་སླེབས་བྱུང་བས། ང་དེ་མ་ཐག་ཏུ་ཧམ་པ་ལངས་ནས་བལྟས་པ་ལ། ཁོ་ནི་རེ་ཞིག་རྟ་ཕོ་འདོགས་ས་དེར་ཧང་སངས་ནས་ལུས་སོང་། དེ་ནས་གཟོད་བྲེལ་མྱུར་ངང་ཡས་ལྟ་མས་ལྟ་ཐེངས་འགའ་གནང་རྗེས། ས་ཁ་ན་ཡོད་པའི་ཏ་ལེན་དེའི་འགྲམ་དུ་སོང་ནས་ཡར་སློག་མར་སློག་ལྟ་བུ་གནང་བ་དང་། དེའི་འཕྲོར་རྟ་ཕོ་འདོགས་སའི་ཕུར་བ་ཆེན་པོ་དེར་སྐོར་བ་ཡང་ཡང་བྱེད་ཅིང་ཅུང་ཙམ་ལ་དེ་ག་ནས་ལུས་སོང་། ཕར་བལྟས་ཚོད་ལ་ཁོའི་སེམས་ནང་དུ་དེ་རིང་གནས་ཚུལ་ཅི་ཞིག་བྱུང་སོང་བ་ཡིན་ནམ་སྙམ་པ་ལྟ་བུའི་རྣམ་པ་ཞིག་བསྟན་འདུག གང་ལྟར་གནས་ཚུལ་ཅི་ཡང་ཧ་གོ་ཐབས་མེད་པ་བཞིན་མཐའ་མཇུག་ཕུར་མགོ་ནས་སྲབ་བླངས་ཤིང་། ཏ་ལེན་ཕྲག་ཏུ་ཁུར་ནས་འཚབ་འཚུབ་ཀྱིས་བུད་སོང་། ཁོ་འགྲོ་དུས་ཀྱི་རྒྱབ་གཟུགས་ནི་ད་ལྟའང་ངའི་དྲན་པའི་ངོགས་སུ་ཝ་ལེར་བརྗེད་མི་བཏུབ་པ་ཞིག་རེད་མོད། དགོངས་ཡངས་བཟོད་གསོལ་ཞུ་བའི་དུས་ཚོད་ནི་ཤིན་ཏུ་འཕྱིས་དྲགས་སོང་། འཕྱིས་དྲགས་སོང་ཨང་། ངེད་ཀྱི་སྡེ་བའི་ནང་གི་མི་སྒེར་བ་མང་པོའི་སེམས་སུ། བག་ཆགས་མི་སྐྱིད་པ་ཨ་ཧ་མང་པོ་ཞིག་བཞག་ཡོད་དེ། ཁོང་ཚོས་རི་ངོས་སུ་རྟ་རྟོད་ཐག་གིས་བཏགས་ཡོད་པ་རྣམས་རྒྱུན་པར་གློད་ནས་བཏང་བ་དང་། སྒྲོག་ལ་བརྒྱབ་པ་དག་གང་བྱུང་དུ་བརྟོལ་ནས་མངགས། སྡེ་མི་རྣམས་ལ་ཕོག་ཐུག་བཏང་བའི་སྦྱོར་བ་དེ་དག་ནི་ལྷད་མེད་ཀྱི་རོལ་རྩེད་ཅིག་ཏུ་འཁྲུལ་སྣང་གིས་ངོས་འཛིན་བྱས་ཡོད་པ་ལས། ཀུན་སྤྱོད་ཀྱི་ངོས་ཀྱི་མི་དགེ་བའི་སྒྲིབ་པ་ཞིག་ཡིན་པའི་འདུ་ཤེས་ནི་གཞར་ཡང་སྐྱེ་མི་དཔེ་བ་དང་། གལ་ཏེ་དེ་ལྟ་བུའི་འདུན་པ་མེད་པ་ཡིན་ན་ནི། འཇིག་རྟེན་ན་རྩེད་ར་མེད་པར་གྱུར་བ་ཡིན་པའི་སྟོང་འདང་ཞིག་གིས་སྔུན་བསྐུལ་བས་ཡིན་ནོ།།

དུས་སྐབས་དེ་འདྲའི་ནང་ལ་རྩེད་མཚར་ལས་འདས་པའི་བསམ་སྦྱོར་དེ་དག་གི་ཉེས་པ་ལ་ཁྱོན་ནས་སྣང་དོགས་མེད་པར། གང་བསམ་ཅི་དྲན་གྱི་མཇུག་སྐྱོང་བ་ལ་དགའ་བའི་སེམས་པ་དེ་ཁོ་ན་སྲུང་འཛིན་བྱེད་པ་ནི་བྱིས་བློ་ཡིན་ཡིན་འདྲ་ཡང་། ཐལ་དྲགས་པའི་སྣང་ཚུལ་དེ་དག་གིས་ངེད་ཀྱི་སྡེ་མི་རྣམས་ལ་ཕོག་ཐུག་བཏང་བ་དེ་ནི་འགལ་རྐྱེན་ཁོ་ན་ཡིན་པ་ངོས་ཅི་ལ་ཟིན་ཨང་། བྱིས་དུས། ང་ཡི་བྱིས་དུས། ང་ཚོའི་བྱིས་དུས་ནི། ཕོག་ཐུག་དང་འགལ་བ། འཁོན་ལན་དང་རྩོད་པ་ཡི་རྣམ་པ་ཡོད་པ་ཞིག་ཡིན་ལ། དེ་ནི་ག་དུས་ཀྱང་ཁུ་སིམ་མེད་པའི་འཁྲུལ་སྣང་གི་རྩེད་ར་ཞིག་ཡིན། པྲ་ཆལ་གྱི་ལས་སྣ་ཚོགས་ལ་ཅི་མི་སྙམ་པར་འཇུག་པའི་བདག་གི་བྱིས་དུས་ཀྱི་འཚོ་བ་དེ་ནི། ལྷིང་འཇགས་སུ་གནས་ཐུབ་པ་ཞིག་མ་ཡིན་པར་ཉིན་རེ་རེར་རོལ་རྩེད་འདྲ་མིན་གྱི་ལས་བརྩམས་ནས་དུས་ཚོད་བསྐྱལ་དགོས་པ་ཞིག་ཏུ་གྲུབ་ཡོད། ངའི་ན་ཚོད་དང་མཉམ་པའི་རྩེད་རོགས་དེ་ཚོའི། འཆར་ཡན་གྱི་རྣམ་རིག་གྲུང་པོ་དེ་ཐམས་ཅད་ཀྱི་ནང་དུ་སིམ་འཛུལ་ཐུབ་པ་ཞིག་ཡིན་ལ། ཡུལ་དུས་གང་ཡིནའང་ང་ཚོ་སྤྱི་མཐུན་གྱི་ལས་བསོད་གཅིག་པུ་དེས། ཉིན་རེ་རེར་ངེད་ཀྱི་སྡེ་བའི་སྟོད་སྨད་ཐམས་ཅད་ལ་ལྷན་དུ་ཁྲིད་འགྲོ། དབྱར་དགུན་སྟོན་དཔྱིད་གང་ཡིནའང་། ང་ཚོའི་ན་ཚོད་དང་འཚམས་པའི་རྩེད་འཆལ་གྱི་ལས་སྐལ་དེ་ནི་གསོན་ཉམས་དང་ལྡན་པ་ཞིག་ཡིན་པར་སེམས་ལ། ཡུལ་གྱི་སྐད་དུ་རྩེད་ས་ནས་རྒྱུ་མ་འཕུད་རུང་མ་ངུ་ཞེས་པའི་ཚིག་བཙན་པོའི་རྒྱབ་བསྟེན་གྱི་སྐད་ཆ་དེ་ལ་ཁོག་རྒྱ་ཡོད་པ་ནང་བཞིན་དེ་དུས་ཀྱི་རྩེད་རོགས་དེ་ཚོར་ཚུགས་ཀ་ཅུང་ཡོད་དོ།།

ང་རང་སློབ་གྲྭར་མ་སོང་བའི་ཡར་སྔོན་དུ། ང་ལས་ཆེ་བའི་སློབ་གྲྭའི་སློབ་མ་སྐོར་ཁག་དེ་དང་ངའི་བར་ལ་རླུང་འཚུབ་ལྡང་འགོ་ཚུགས། ཁོ་ཚོ་ནི་ཤོག་ཁའི་ཚུལ་དུ་ངའི་སྟེང་དུ་ཡོང་ལ། མཉམ་རུབ་བྱེད་པ་དེ། ཁོ་ཚོའི་ལུགས་སྲོལ་དམིགས་བསལ་བ་ཞིག་ཡིན་པ་དང་། ཛ་དྲག་ཆེ་བའི་མཉམ་རུབ་ཀྱི་ཁྲོད་དུ། ངས་འཕག་འཚག་དང་རྒོལ་བ་ཡིས་རྔོ་ཅི་ཡང་ཐོགས་ཐབས་མེད། མཉམ་རུབ་ཀྱིས་ང་རང་ཕམ་པར་བཏང་ནས་ཡུལ་ལ་གཏོང་སྲིད། མཉམ་རུབ་ཀྱི་ཁྲོད་དུ་ཁ་ཁྲག་སྣ་ཁྲག་ནི་རྒྱུན་ལྡན་གྱི་སྦྱོང་བ་ལྟ་བུ་ཞིག་ཏུ་གྱུར་མྱོང་། འོ་ན་ངའི་གོ་སྐབས་ནི་གང་དུ་ཡོད་ཅེས་ན་ཁོ་ཚོའི་ནང་གི་གང་རུང་ཞིག་ལ་དཔུང་དང་ཤོག་ཁ་མེད་པར་ལྷག་དུས་ཀྱི་དུས་ཚོད་དེ་རེད། གླགས་དེ་དང་བསྟུན་ནས་མི་གཅིག་གི་སྟེང་དུ། ཤོག་ཁ་ཞིག་གི་གྱོད་བཀལ་ནས་འཁོན་ལན་རྩོད་པ་དེ་ནི་ང་ལ་ཐོབ་པའི་གོ་སྐབས་བོར་མི་རུང་བ་ཞིག་ལ་བརྩི་དགོས། ཕན་ཚུན་འཁོན་ལན་རྩོད་པའི་ཆེད་དུ་ཐེངས་ཤིག་གཞན་ལ་རྨས་སྐྱོན་ཐེབས་ཏེ། གཞུང་གིས་ངེད་ཀྱི་ཁྱིམ་ཚང་ལ་དམངས་སྒོར་ལྔ་བཅུའི་ཆད་པ་གཅོད་དགོས་བྱུང་། དུས་སྐབས་དེར་སློབ་གྲྭ་བ་སྐོར་ཁག་དེ་དང་ངའི་བར་གྱི་རླུང་འཚུབ་ནི་ཞོད་འཇགས་སུ་སོང་མེད་པར་དུས་དུས་སུ་ལྡང་ངེས་ལ། གང་ས་གང་ནས་མཉམ་རུབ་དང་ཁེར་ཐུག ཁེར་ཐུག་དང་མཉམ་རུབ་རེས་སུ་འཁོར་ནས། ནམ་ཡང་བརྩད་མི་ཚར་བའི་འཁྲུལ་སྣང་གི་རྒྱལ་ཕམ་ཞིག་བདའ་རེས་བྱེད་སྙིང་བྲོ་བའི་རྗེས་སུ་འབྲངས་ཀྱིན་ཡོད་ལ། དོན་དངོས་སུ་དེ་ནི་ང་ཚོ་ཚང་མ་ལ་ཐུན་མོང་དུ་ཡོད་པའི་འཁྲུལ་སྣང་ཞིག་ཅི་ལ་མིན་ཨང་།

བརྗོད་ཀྱིས་མི་ལང་བའི་བྱིས་དུས་ཀྱི་གཏམ་རྒྱུད་དེ་དག་ནི། ངེད་ཀྱི་སྡེ་བའི་གྲོང་བར་ནས་བཟུང་འབྲོག་པ་འདུག་སའི་རི་སུལ་ལ་ཐུག་པའི་བར་དུ་ཡོད་ཅིང་། ཡུལ་དེ་གའི་རྡུལ་འཚུབ་དང་ཉི་འོད་ཁྲོད་ནས་དཀར་ནག་དགེ་སྡིག་དང་། བཟང་ངན་ཡག་བཙོག་ཐམས་ཅད་ཀྱི་བག་ཆགས་སད་པ་རེད། ཡུལ་དེ་གའི་རྒྱུས་མངའ་ཆེ་བའི་ཕྱི་ནང་ཁོར་མོ་ཡུག་ཏུ། དགོད་སླ་ལ་ངུ་སྐྱེན་པའི་བྱིས་དུས་ཀྱི་སྒྲུང་རིང་ལྷག་ཡོད། ཡུལ་དེ་ག་ནས་པྲ་ཆལ་གྱི་གཤིས་ཀ་དང་འགྲོགས་པའི་གོམ་པ་ནི་གང་ས་གང་དུ་སྤོ་དགོས་བྱུང་། ཡུལ་དེ་ག་ནས་རང་བྱུང་ཁམས་ནི་ངེད་ཅག་གི་འཇིག་རྟེན་ཡིན་པའི་བག་ཆགས་སད་པ་རེད་ཨང་། ང་ཡི་ཆུང་དུས་ཀྱི་ལོ་ཟླ་ཕལ་མོ་ཆེ་ནི་རྨོ་མོ་ལགས་དང་འགྲོགས་ནས་ནར་སོན་པ་ཡིན་ལ། རྟག་པར་ཁ་ཏོན་དགེ་སྦྱོར་གྱི་ལས་ལ་འབད་པ་ཧུར་ལེན་པའི་རྨོ་མོ་ལགས་ཀྱི་སེམས་སུ་ང་ནི་འཇིག་རྟེན་གྱི་གཅེས་ཕྲུག་ཅིག་ཡིན་པར་སེམས་ཤིང་། ངའི་པྲ་ཆལ་དང་བསྟན་བཤིག་གི་ལས་བརྩམས་ཚད་ལ་བཟོད་སྒོམ་དང་། གུ་ཡངས་ཀྱི་འདུ་ཤེས་བཟུང་ནས་ང་རང་བསྐྱངས་པ་ཡིན།

རྨོ་མོ་ལགས་ཀྱི་དྲིན་ལ་བསྟེན་ནས་མཐའ་མཇུག་ང་ནི་སློབ་གྲྭ་བ་ཞིག་ཏུ་གྱུར་དགོས་བྱུང་། སློབ་གྲྭར་མ་སོང་བའི་ཡར་སྔོན་དུ། ངེད་ཀྱི་ཁྱིམ་ཚང་ལ་དམུ་དགེ་དགོན་དུ། ཉེ་ས་དགེ་སློང་ཞིག་ཡོད་པ་ཁོང་གིས་ངའི་ཕ་མ་གཉིས་ལ་ང་ནི་དམུ་དགེ་དགོན་པའི་གྲྭ་ས་ལ་སྐྱོལ་ཞེས་བསྐུལ་བ་དང་། ང་ལ་ཆེད་དུ་མདུད་པ་དམར་པོ་ཞིག་གནང་ངོ་།། མཚར་སྣང་ལྡན་པའི་མདུད་པ་དམར་པོ་དེ། ངའི་སྐེ་ལ་བཏགས་ནས་ང་ནི་ཐག་རིང་གི་གྲྭ་ས་གང་ཞིག་ལ་འགྲོ་དགོས་པའི་སྟོང་བསམ་གྱི་ནང་དུ་ལུས་སོང་ནའང་། རྗེས་སུ་ངེད་ཀྱི་རྨོ་མོ་ལགས་ཁྱོན་ནས་མོས་མཐུན་མ་བྱུང་བར་མཐའ་མཇུག་ཕ་མ་གཉིས་ཀྱིས་ང་རང་སློབ་གྲྭར་བཏང་བ་ཡིན། སློབ་གྲྭ། སློབ་གྲྭ་ནི་དེ་སྔོན་ང་མཉམ་རུབ་བྱེད་པའི་སྐོར་ཁག་དང་ཤོག་ཁ་སྒྲིལ་མཁན་གྱི་ཡུལ་དངོས་ཡིན་ནའང་། ཞོགས་པ་དེར་ང་ནི་ཁོ་ཚོའི་ཁྲོད་དུ་ཅིས་ཀྱང་འགྲོ་དགོས་བྱུང་བ་ལས་དབང་རེད། ཉིན་མོ་དེ་ནས་བཟུང་། ང་ནི་བོད་ཀྱི་ཡི་གེ་དང་ལས་འཕྲོ་ཡོད་པར་གྱུར་ལ། དབྱངས་གསལ་སོ་བཞིའི་སྦྱོར་ཀློག་དང་འགྲོགས་ནས་དམིགས་བསལ་གྱི་དུས་ཚོད་ཅིག་སྐྱེལ་དགོས་བྱུང་བ་དང་། དེ་སྔ་ང་མཉམ་རུབ་བྱེད་མཁན་གྱི་ཤོག་ཁ་དེ་དང་ཕན་ཚུན་གདོང་གཏད་རེས་ངང་། རིམ་་གྱིས་རིམ་གྱིས་ཕྱི་ནང་ཀུན་ལ་ཐམས་ཀྱིས་སོང་ངོ་།།

ངོ་གདོང་མི་འདྲ་བ་སྣ་ཚོགས་ཀྱི་གྲས་སུ། ང་ཡི་སྔར་གྱི་དྲན་རིག་སྐོར་ལོག་དང་པྲ་ཆལ་གྱི་གཤིས་ཀ་དེ་ནི། གནས་དུས་ཆག་མེད་དུ་ཐོལ་བྱུང་ངང་ལ་དུས་དུས་སུ་འཚུབ་མ་ཁེར་རྒྱུག་བཞིན་ལྡང་བར་བྱེད་ལ། རྟག་པར་དགའ་ཁ་མོས་པ་འདྲ་པོ་ཡོད་པ་རེ་འགའ་དང་མཉམ་པོར། མཚར་སྣང་འདྲ་མིན་སྣ་ཚོགས་ཀྱི་དབུ་རྩོམ་པར་རབ་ཅིག་སྤྲོ་བ་ཡིན་ལ། ང་ཡི་རྒྱུད་ལ་མ་བཅོས་རང་བཞིན་དུ་ཡོད་པའི་ཁ་མཚར་ཀུ་རེ་ནག་པོ་དེ་ནི། ག་དུས་ཀྱང་ལྷིང་འཇགས་སུ་གནས་ཐབས་མེད་པར་གང་དྲན་ཅི་རིག་ལ་འཇུག་པར་ཅི་བས་མོས། དེ་ལྟ་ནའང་། བོད་ཀྱི་ཡི་གེ་ཡི་བྱིན་མཐུ་དང་དྲན་སྐུལ་འོག་ཏུ་ང་ནི་གང་ལྟར་ཡང་རབ་རིབ་ཟང་ཟིང་གི་ལམ་ཕྲན་ཞིག་ཏུ་དུས་ཀྱི་གོམ་འགྲོས་ཀྱི་རྗེས་སུ་བསྙེགས་ནས་སོང་བ་ལ། བསམ་ཡུལ་འདས་པ་ཞིག་ཏུ་རྫོང་ཐོག་གི་བཅའ་སྡོད་བོད་ཡིག་སློབ་འབྲིང་ལ་འགྲོ་ཐུབ་པའི་ལས་སྐལ་དང་ལྡན་པར་གྱུར་ཏོ། །

1989ལོའི་སྟོན་མགོ་དེ་ནི་ངའི་མི་ཚེའི་ནང་གི་སྔོན་འགྲོའི་རོལ་མོ་ཁྱད་པར་བ་ཞིག་དང་འདྲ་བར། དེས་ང་རང་མི་ཚོགས་མང་བའི་ཁོར་ཡུག་དམིགས་བསལ་བ་ཞིག་ཏུ་ཁྲིད་སོང་། གང་ས་གང་འདྲ་མིན་དུ་སྣང་བའམ་རྒྱུས་མེད་ཀྱི་སློབ་བུ་བརྒྱ་ཕྲག་མང་བོའི་ཁྲོད་དུ་ཐོན་དུས། ང་ཡི་འཚུབ་མའི་རྣམ་རིག་གྲུང་བོ་དེ་ནི་བློ་ཡུལ་ལས་འགོངས་པའི་བཀག་རྒྱ་་དང་འཕྲད་པ་བཞིན་ཕྱི་ནང་ཀུན་ནས་ཡོངས་སུ་གཅུན་པར་བྱེད་ཅིང་། འགྲིག་ལམ་དང་སྲོལ་སྣ་ཚོགས་ལུགས་མཐུན་རྩིས་འབུལ་ཞུ་དགོས་པའི་ཁོར་ཡུག་ཅིག་ཏུ། བདག་གི་ལུས་ཐོག་གི་པྲ་ཆལ་གྱི་སྦྲང་ཆུང་དེ་དུས་དུས་སུ་གདོང་ཐུག་ངེས་མེད་བྱས་ནས་འགྲོ་དགོས་པ་ཞིག་ཡིན་ལ། མི་མང་གི་ཁ་རླངས་ཁྲོད་དུ། ངའི་ཆེས་ཐོག་མ་ཡི་རྣམ་འགྱུར་དེ་ཅུང་ཙམ་ལྷོད་ལ་འབབ་དགོས་པ་ཞིག་ཡིན་མོད། ཞག་དུས་མང་པོ་ཡུན་གྱིས་སོང་བ་ན་གོམས་གཤིས་སུ་གྲུབ་པའི་སྔར་གྱི་དྲན་རིག་སྐྱེན་པོ་དེ་དང་། རྩེད་མཚར་གྱིས་ཁེངས་པའི་དབང་རྩ་་ཉིད་ནི་ག་དུས་ཀྱང་འདུག་བཟོད་མེད་པར་འཕར་ལྡིང་གིས་འཚོ་དགོས་བྱུང་།


དགེ་སློབ་མང་པོའི་ཁ་མིག་འོག་ཏུ། ང་ལ་རང་གི་པྲ་ཆལ་ལས་འདས་པའི་དགའ་ཁ་མོས་ཕྱོགས་ཉག་གཅིག་ཡོད་པ་ནི། བོད་གངས་ཅན་གྱི་ཡི་གེ་ལ་སློབ་གཉེར་གནང་རྒྱུ་དེ་རེད། སྔོན་ལས་ཀྱིས་ཡིན་ནམ་ཅི། འདི་ལ་རབ་ཅིག་དགའོ།། མི་མང་གི་གསེང་ནས་བདག་གི་པྲ་ཆལ་གྱི་གཤིས་ཀ་དེ་ཉིད་གོམ་སྟབས་གཞན་ཞིག་ཏུ་བསྒྱུར་བ་ནང་བཞིན། དུས་ཕྱིས། ང་ནི་སྐད་ཡིག་ལ་དགའ་བའི་བུ་ཆུང་ཞིག་ཏུ་གྱུར་འགོ་ཚུགས་པ་དང་། ངའི་པྲ་ཆལ་གྱི་གཤིས་ཀའམ་རྣམ་རིག་དེ། ཡི་གེའི་ཁྲོད་ཀྱི་རྨི་ལམ་ལ་འབུལ་དགོས་ཐུག་པ་མིན་ནམ་སྙམ། དེ་ནས་བཟུང་། སྐད་ཡིག་གིས་ང་ལ་དྭངས་པ་འདྲེན་ཞིང་། སྐད་ཡིག་དགེ་རྒན་གྱིས་ང་ལ་བློ་སྐྱེད་འཕེལ། ངའི་གཤིས་རྒྱུད་དུ་མ་བཅོས་ལྷུན་གྱིས་ཆགས་པ་དག་སྐད་ཡིག་གི་སྙན་འཇེབས་ཡིད་དགའ་ཡི་ང་རོ་ལ་དྲངས་པ་དང་། ང་ཡི་ཆེས་ཐོག་མའི་ཕུགས་བསམ་གྱི་ཕུད་དེ་དག་བོད་སྐད་ཀྱི་ཡི་གེ་ལ་མཆོད་པ་ཡིན། བོད་སྐད་ཀྱི་ཡི་གེ་ལ་དགའ་དྲགས་པའི་རྐྱེན་གྱིས། མི་མང་གི་གསེང་ནས་བུ་ཆུང་ཞིག་ལམ་ལ་ཆས་རྩིས་བྱས་པ་འདྲ། ངའི་ལས་དབང་ནི་དེ་ལ་འབུལ་དགོས་པ་ལྟར། སྒྲུང་དང་རྩོམ་དཔེ་རྙེད་རྙེད་དུ་མར་མཇལ་བར་དགའ། དེ་དག་ལ་བྱིས་བློའི་མཚར་སྣང་གིས་གོ་བ་སྣ་ཚོགས་པ་བླངས། སྟོང་འདང་འདྲ་མིན་བཅོ་བརྒྱད་བརྒྱབ། འདི་ནི་སུ་ཡིན་ནམ། འདིས་ཅི་ཞིག་འཆད་པ་ཡིན་ནམ། འདི་བ་ཡང་སུ་ཡིན་ནམ། འདི་བས་་ཅི་ཞིག་འཆད་པ་ཡིན་ནམ། འདི་ནི་ཅི་འདྲའི་ཡིད་དུ་འོངས་པ་ལ། ངེས་པ་དོན་གྱི་སྨོན་ས་ཉིད་ནི་འདིའོ་སྙམ་པ་ཞིག་བྱུང་ངོ་།།

སློབ་གྲྭ་ཡོངས་ཀྱིས་ནངས་སྔ་མོ་རེ་རེར་ངེས་པར་སྐྱོར་སྦྱོང་མཛད་དགོས་པའི། འཇམ་དབྱངས་བསྟོད་སྤྲིན་རྒྱ་མཚོའི་སྙན་འཇེབས་གདངས་དབྱངས་དྲོད་ལྷང་ངེ་ཡོད་པ་དེ་བུ་ཆུང་བདག་ལ་དམིགས་སུ་བསྩལ་བ་བཞིན། བུ་ཆུང་བདག་ནི་འཇམ་དབྱངས་བསྟོད་སྤྲིན་རྒྱ་མཚོའི་ཚིག་གི་དྲི་བསུང་ལ་བཏགས། ཡང་ཚང་མས་ཉིན་ཉིན་ཐེངས་རེར་ལྷ་མོ་དབྱངས་ཅན་མའི་བསྟོད་པ་སྐྱོར་སྲོལ་འདུག་པ་ལ། བུ་ཆུང་བདག་ནི་ཆུ་འཛིན་དཀར་བོའི་གློག་ཕྲེང་དྲ་བ་ཅན་གྱིས་བཟུང་། བཟུང་བས་ཀྱང་ཡེ་ནས་བཏང་མ་བྱུང་ངོ་།།

བོད་སྐད་ཀྱི་རྩོམ་དེ་དག་གིས་ང་རང་གང་ལ་བསྐྱལ་བ་ཡིན་ནམ། སྙན་འཇེབས་ཉམས་རྩལ་རྫོགས་པའི་སྐྱོར་རྟ་དེ་དག་གིས། སྲིད་པའི་བུ་ཆུང་ང་ནི་སུ་ལ་མ་སྨོན་དབྱངས་གསལ་གྱི་འཕྲུལ་སྣང་དེ་ལ་སྨོན་དགོས་བྱུང་། དེ་ལྟ་དེ་ལྟར། རྒྱུ་རྐྱེན་དང་འཕྲོད་སྦྱོར་སྣ་མང་གིས་ང་ནི་བོད་སྐད་ཀྱི་རྩོམ་དེ་དག་ལ། རྗེས་སུ་ཡི་རངས་ཀྱི་སྨོན་པ་ཡོད་པའི་བུ་ཆུང་ཞིག་མ་བྱས་ཐུ་མེད་བྱུང་བ་དང་། ངའི་ལུས་ཐོག་གི་པྲ་ཆལ་གྱི་གཤིས་རྒྱུད་དེ་ཉིད་ཡི་གེ་ཡི་འཇིག་རྟེན་ཆ་མེད་ཅིག་ཏུ་སྐྱེལ་བ་ལ་དམ་བཅས། དེ་ན་བཟུང་། ང་ནི་ནམ་རྒྱུན་ཕ་སྐད་ཀྱི་བརྗོད་པ་དང་ཐག་ཉེ་བའི་སློབ་བུ་ཞིག་ཡིན་ལ། ཕ་སྐད་ཀྱི་བརྗོད་པ་གཙིགས་སུ་འཛིན་པའི་གཞོན་ནུ་ཞིག་ཀྱང་ཡིན་ནོ།།

དུས་ཚོད་ཀྱི་བསོད་ནམས་ཆེན་པོ་དེས། ང་རང་གངས་ཅན་སྐད་ཀྱི་ང་རོ་དང་འཚུབ་མའི་ལང་ཚོ་མངོན་པར་ལྡན་པའི་སྐྱེས་མཆོག་རྣམས་ཀྱི་གསུང་ངམ་རྩོམ་གྱི་རྗེས་སུ་འབྲངས་པའི་ལས་སྐལ་དེ་མངགས་མངགས་མ་བྱས་པ་དང་། བཅའ་སྡོད་སློབ་གྲྭའི་སྨྱུ་གུ་ཐོགས་པའི་སློབ་བུ་མང་པོའི་ཁྲོད་དུ། ངའི་སེམས་སུ་མ་འོངས་པར་ངའི་སྨྱུ་གུ་ཉིད་ནི། ཆུ་འཛིན་དཀར་བོའི་གློག་ཕྲེང་དྲ་བ་ཅན་གྱི་འོད་མདངས་དང་ཐག་ཉེ་བ་ཞིག་ཏུ་བློས་བསླངས་བྱས་ཤིང་། ང་རང་ཅིས་ཀྱང་བོད་སྐད་ཀྱི་འཇིག་རྟེན་དེ་ལ་དམིགས་པ་བཟུང་ནས་བསྐྱོད་དགོས་བྱུང་། ངའི་པྲ་ཆལ་གྱི་གཤིས་ཀ་དེེ་ཉིད། བོད་སྐད་ཀྱི་ཕུགས་བསམ་ལྡན་པའི་ཡི་གེའི་འཕྲུལ་སྣང་གི་བརྗོད་པ་ལ་བརྟེན་ནས་སྦྱོང་བ་མཛད་འགོ་ཚུགས་པ་དང་། ཡང་འབྲི་དེབ་ཐོག་ཏུ་ཡི་གེ་བྲི་མཁན་གྱི་བཅའ་སྡོད་སློབ་གྲྭའི་སློབ་བུ་མང་པོའི་ཁྲོད་དུ། ངའི་སེམས་སུ་མ་འོངས་པར་ངའི་འབྲི་དེབ་ཉིད་ནི། འཇམ་དབྱངས་བསྟོད་སྤྲིན་རྒྱ་མཚོའི་ཚིག་གི་དྲི་བསུང་དག་དང་འདྲ་བའི་སྐད་ཡིག་གི་བརྗོད་པ་གཞན་ཞིག་ལ་རྟོག་བཟོ་བྱས་ཤིང་། ང་རང་ངང་ངམ་ཤུགས་ཀྱིས་སྙན་དབང་གསོ་བའི་འཇིག་རྟེན་གྱི་བརྗོད་པ་དེ་ལ་འགྲོགས་དགོས་བྱུང་། ངའི་པྲ་ཆལ་གྱི་གཤིས་ཀ་དེ་ཉིད་ཆེས་དྭངས་གཙང་ཡིན་པའི་སྐད་ཡིག་གིས་ཁྲིད་སོང་ངོ་།།

དེ་ནི་ངའི་ལས་དབང་ཡིན་དགོས་ཡོད་པ་སུ་ཡིས་ཤེས། ང་རང་བཅའ་སྡོད་སློབ་གྲྭའི་སློབ་བུ་ཡིན་པས་སློབ་དེབ་ཀྱིས་དུས་དུས་སུ་ཤིན་ཏུ་གཅུན་པ་ཡིན་མོད། ང་ནི་སློབ་དེབ་ངོས་ཀྱི་རླབས་ཆེན་ཞེས་པའི་ཆོ་ལོ་ཁུར་མཁན་དེ་དག་གི་སྣང་བརྙན་ལ་མོས་གུས་བྱེད་པའི་འདུན་པ་ཡེ་ནས་མེད་དོན་ཅི། ངས་བརྗོད་འདོད་ཀྱི་ཡི་གེ་རྣམས་ནི་གྲིབ་ཀྱིས་ཟིན་མི་འོས་པའི་སྐད་ཆའི་གདངས་དབྱངས་ཤིག་ཡིན་པར་དཔེ་འཇོག་བྱེད་དགོས་ཐུག་པ་དང་། བཅའ་སྡོད་སློབ་གྲྭའི་དགེ་སློབ་མང་པོའི་མིག་མདངས་དང་རྣམ་འགྱུར་ཁྲོད་དུ་རང་ཉིད་ཀྱི་ལང་ཚོའི་སྐད་ཆ་འཚོལ་དགོས་བྱུང་། ང་ལ་ཏག་ཏག་ལས་སྐལ་གྱིས་བསྩལ་བ་ནང་བཞིན་གྱི༼གཞོན་ནུ་བདག་གི་གོམ་སྒྲ༽ཞེས་པའི་སྙན་རྩོམ་ཡོད་པར་གྱུར་བ་དང་དགེན་ལགས་ཀྱིས་རྔ་བའི་བོད་ཡིག་ཚགས་པར་ཐོག་ཏུ་སྐུར་རོགས་མཛད་ཅིང་མི་རིང་བར་རེ་འབྲས་དོན་སྨིན་བྱུང་། དེ་ནི་ངའི་ཆེས་ཐོག་མའི་ཡི་གེ་ཡི་སྙན་དབྱངས་དང་འགྲོགས་པའི་རྩོམ་ཀྱི་ལུས་བླངས་པ་ཞིག་ཡིན་པ་དང་། འཇིག་རྟེན་དུ་ཡི་གེ་ལ་བརྟེན་ནས་ཁ་གྲག་པའི་འགོ་བརྗོད་ནི་དེ་ནས་བརྩམས་སོ།།

རླུང་བུ་ཁྱོད་ནི་ཤིན་ཏུ་བསིལ་བ་དང་།། མེ་ཏོག་རྣམས་ཀྱང་ལམ་ལམ་འཕྲོ་བར་བྱེད།། མི་ཚོགས་རྒྱ་མཚོའི་རླབས་ཕྲེང་འཇགས་པ་མེད།། གཞོན་ནུ་བདག་གི་གོམ་སྒྲ་དེ་ལས་སྙན།། ལྷོ་ཡི་སྤྲིན་དཀར་ཁྱོད་ནི་གང་ལ་འགྲོ།། སྦྲང་ཆར་རྣམས་ཀྱང་ཡུལ་ལ་ལོག་པར་བྱེད།། མི་ཚོགས་རྒྱ་མཚོའི་རྦབ་ཕྲེང་འཇགས་པ་མེད།། གཞོན་ནུ་བདག་གི་གོམ་སྒྲ་དེ་ལས་སྙན།། ཆུ་མོ་ཁྱོད་ནི་རེ་སྙེག་ངང་ལ་འགྲོ།། མདུན་གྱི་ལམ་ནི་ཐག་རིང་རྒྱང་ལ་བསླེབས།། མི་ཚོགས་རྒྱ་མཚོའི་རྦབ་ཕྲེང་འཇགས་པ་མེད།། གཞོན་ནུ་བདག་གི་གོམ་སྒྲ་དེ་ལས་སྙན།། དཔྱིད་གྱི་དཔལ་མོ་ཁྱོད་ནི་གང་སར་ཐོན།། མྱུ་གུ་རྣམས་ཀྱིས་སྐད་སྙན་དྲུག་འགྱུར་སྒྲོག། མི་ཚོགས་རྒྱ་མཚོའི་རླབས་ཕྲེང་འཇགས་པ་མེད།། གཞོན་ནུ་བདག་གི་གོམ་སྒྲ་དེ་ལས་སྙན།། ང་ཡི་གོམ་སྒྲ་དེ་ལ་གཞོན་པའི་ང་རྒྱལ་ཅུང་ཙམ་ཡོད་པས་ཡིན་ནམ། སྔོན་ཆད་ཀྱི་བསྟན་བཤིག་ཚ་བོ་འདྲེས་པའི་གཤིས་ཀ་ཡི་དྲན་་ཤེས་ཀྱི་གཟུངས་དེ་ཉིད་མ་ཉམས་པས་ཡིན། དེ་ནས་བཟུང་ངས་མཆོད་བསྟོད་བྱེད་ས་ནི་ཡི་གེའི་དར་ཚོན་ཤིག་ཤིག་གཡོ་བའི་ཕུགས་བསམ་གྱི་འཇིག་རྟེན་དེ་ཡིན་དགོས་ཡོད་པ་དང་། དེས་ང་རང་རྨི་ལམ་གྲངས་མེད་ཀྱི་ཕ་མཐར་སྐྱེལ་ནུས་པའི་སྟོང་བསམ་བཅངས་སུ་བཅུག་གོ།

ཏག་ཏག༼གཞོན་ནུ་བདག་གི་གོམ་སྒྲ༽ཡི་རྐྱེན་གྱིས། ང་ནི་བཅའ་སྡོད་སློབ་གྲྭའི་སློབ་ཁུལ་གྱི་རྨི་ལམ་རྩེད་མཁན་གྱི་གཞོན་ནུ་ཞིག་ཏུ་གྱུར་བ་དང་། ངའི་ལག་གི་སྨྱུ་གུ་ནི་ཕྱིར་ལ་ལྡོག་ཐབས་མེད་པའི། བཞུར་རྒྱུན་རིང་མོ་ཞིག་ལ་མནའ་ཡ་བཅས་པ་འདྲ་བའི་ལམ་ཁ་ཞིག་ལ་བུད་ཟིན་པ་དེ་ནི་བསམ་ཡུལ་ལས་འདས་པ་ཞིག་རེད་དེ། རྨི་ལམ་གྱི་རོལ་རྩེད་དེས་ངའི་མི་ཚེའི་སྙིང་བོ་ཡོད་ཚད་དེ་ལ་བསྟིམས་དགོས་པའི་ཚད་དུ་བསྐྱལ་འཇོག་པ་ཅི་ལ་ཤེས། གོ་གསུམ་ལོའི་སྙན་རྩོམ་དེ་གཞན་སུ་ལའང་གལ་མི་ཆེ་མོད། ང་ལ་ཤིན་ཏུ་གལ་ཆེ་སྟེ། དེས་ནི་ད་ལྟའི་བར་དུ་ང་ལ་གྲོགས་མཆེད་མཛད་སོང་བས་སོ།།

གཞོན་དུས་ཀྱི་རྨི་ལམ་གྱི་རོལ་རྩེད་ཁྲོད་ང་རང་འཇམ་དབྱངས་བསྟོད་སྤྲིན་རྒྱ་མཚོའི་དྲི་བསུང་ལ་མཇལ་བའམ། ཆུ་འཛིན་དཀར་པོའི་གློག་ཕྲེང་དྲ་བ་ཅན་ལ་མཇལ་བ་སོགས་ནི་ངའི་ལས་དབང་ཡིན་ལ། མི་ཚེ་འདིར་ང་རང་སྒྲུང་གཏམ་རྩོམ་མཁན་ཞིག་ཏུ་འགྱུར་མི་སྲིད་པའི་རྒྱུ་མཚན་ཡང་གཞོན་དུས་ནས་ངའི་འཆར་ཡན་གྱི་སྣང་བ་དེ། འཇམ་དབྱངས་བསྟོད་སྤྲིན་རྒྱ་མཚོའི་དྲི་བསུང་གི་ནང་དུ་ཐིམས་སོང་བའམ། ཆུ་འཛིན་དཀར་པོའི་གློག་ཕྲེང་དྲ་བ་ཅན་གྱིས་བདག་དན་གནང་སོང་བས་མིན་ནམ་སྙམ།

གཞོན་དུས་ཀྱི་དཔེ་ཀློག་ཁྲོད། ང་ནི་དགེ་འདུན་ཆོས་འཕེལ་ལགས་ཀྱི་གློ་གྲི་ལ་དགའ་བ་དང་། ཁོང་གི་གློ་གྲི་ནི་ཡུལ་གངས་ཅན་གྱི་གློ་གྲི་ཡིན་སྙམ་ནས་དེ་ལ་རབ་ཅིག་སྨོན་པ་ཡིན། དེ་ལ་སྙན་ངག་མཁན་གྱི་ཉམས་སྣང་ཡོད་ཅིང་། ཉམས་སྣང་དེ་ནི་ཡུལ་དུས་གང་དུའང་བློ་ཐག་རྦད་དེ་ཆོད་འདུག་པ་ཞིག་ཡིན་འདུག་པ་དང་། སྤྱིར་ན་ཁོང་ཉིད་མཛེས་རྟོག་ལ་མཁས་པའི་ས་བོན་ཚང་མ་ཆེས་ཐོག་མར་སྙན་ངག་མཁན་གྱི་ས་བོན་ཡོད་པས་མིན་ནམ་སྙམ། ངའི་གཞོན་དུས་ཀྱི་རྨི་ལམ་ཁྲོད། ཐམས་ཅད་ཁ་རུབ་སྒོ་བཀག་གི་སྤྱི་ཚོགས་ཤིག་ཡིན་ནའང་། དགེ་ཆོས་ལགས་ཀྱིས་ང་ལ་གནང་བ་ཉུང་ངུ་ཙམ་གྱིས་མང་པོའི་གོ་ཆོད་པ་ཞིག་བྱུང་ངོ་།།

བཅའ་སྡོད་སློབ་གྲྭའི་སྣང་བརྙན་དང་ང་ཡི་སྣང་བརྙན་གཉི་ག་ལ་འདྲ་ས་ཡི་ཆ་ཞིག་ཡོད་དེ། གཅིག་ནི་སློབ་གྲྭ་དང་གཅིག་ནི་སློབ་བུ་ཡིན། མི་འདྲ་ས་ཡི་ཆ་ཞིག་ཡོད་དེ། ང་ནི་སློབ་མ་ཁོ་ན་ཞིག་མ་ཡིན་པར་ང་ནི་རྨི་ལམ་གྱི་མེ་སྟག་གཙུབས་མཁན་ཞིག་ཡིན། ཆུང་དུས་ང་རང་ན་ཆུང་གདོང་ལེན་རུ་ཁག་གི་གྲས་སུ་གོམ་པ་སྤོ་མ་མྱོང་བ་དེ། ང་ཡི་ན་ཆུང་བའི་བསམ་གཞིགས་དང་འབྲེལ་བ་ཡོད་ལ། སློབ་བུ་ཐམས་ཅད་ཀྱི་ནང་ནས་ལོག་ལ་བུད་དེ་སྡོད་དགོས་བྱུང་བ་དེའང། ངའི་ན་ཆུང་བའི་བསམ་གཞིགས་དང་འབྲེལ་བ་ཏན་ཏན་ཡོད་ངེས་སྙམ།

དུས་ཕྱིས། དུས་ཕྱིས་སུ། ང་ནི་སྙན་ངག་གི་སློབ་གཉེར་བ་ཞིག་ཏུ་གྱུར་བ་དང་། ཤར་ནུབ་ཀྱི་སྙན་ངག་ཐམས་ཅད་ལ་འཇུག་དགོས་བྱུང་། སྙན་ངག་པ་ནི་ཡུལ་དུས་གང་དུའང་རྣམ་ཤེས་ཀྱི་ལང་ཚོ་དེ་ཉིད། མགོ་རྨོག་དཀར་སྟེང་གི་སྲུང་མ་བཞིན་བསྟེན་མཁན་ཞིག་ཡིན་པའི་གདམས་ངག་རྒྱུད་ལ་འབྱོངས་པ་དང་། དབང་གྲགས་དང་བྲན་གཤིས་ཀྱི་མདུན་དུ་ཡིད་ལྐུགས་པའི་སྐྱེ་བོ་ཞིག་མིན་པའི་བློ་སྦྱོང་རྙེད། ང་རང་གློ་བུར་དངངས་སད་ཐེབས། ངས༼གཞོན་ནུ་བདག་གི་གོམ་སྒྲ༽དྲན། རང་ལོ་ཉེར་གསུམ་ཙམ་པ་ལ་ང་རང་དངངས་སད་ཆེན་པོ་ཞིག་སྐྱེས་བས་ཡིན་ནམ། ངས༼ལམ་གྱི་ལེའུ༽ཞེས་པའི་དེང་རབས་ཀྱི་ལྷུག་རྩོམ་སྙན་ངག་ཅིག་བཞེངས་སྐྲུན་གནང་དགོས་བྱུང་བ་དང་། བདག་གི་གོམ་སྒྲ་ནི། དེ་ནས་བཟུང་འཇགས་ཐབས་མེད་པའི་ལམ་གྱི་ལས་འཕྲོ་དང་གཏན་དུ་འཕྲད་པར་གྱུར་ཏོ།།

ཤར་ནུབ་གཉིས་ལ་བལྟས་བལྟས་རྗེས། སྐད་ཡིག་མི་འདྲ་བའི་སྙན་ངག་པ་རྣམས་ཀྱིས་མཐོང་སྣང་གི་འཇིག་རྟེན་འདྲ་ཡི་མེད་ལ། ལས་དབང་དང་འཚོ་སྡོད་ལ་བཟུང་བའི་རྣམ་འགྱུར་འདྲ་ཡི་མེད་མོད། དོན་དམ་ལ་བཟུང་བའི་ཉམས་ལེན་གྱི་འདུན་པ་ཉིད་ནི། ག་དུས་ཀྱང་དུས་ཚོད་ཀྱི་སྔོན་དུ་ཐོན་ཐུབ་པ་ཞིག་ཡིན་པར་ར་འཕྲོད་འགྲོ་བ་ཡིན། གང་ལ་རྣམ་རྟོག་དང་རྫི་གསང་གི་རྩལ་ཁ་སྐྱེན་པོ་འབར་བ་ཞིག་ཡོད་པ་དེ་ནི། སྐད་ཡིག་གང་དེའི་སྙན་ངག་གི་མཛེས་པ་དང་སད་རྟོག་ཡིན་ནོ།། དེ་བས་སྙན་ངག་ནི་སད་རྟོག་ལ་གདོང་ཕྱོགས་པའི་ཡི་གེ་ཡི་མཛེས་པ་ཞིག་ཡིན་སྙམ་སྟེ། ངས་རང་ཉིད་ལ་འཚམས་པའི་ཡིད་བརྙན་གྱི་ཚིག་མཛོད་རྩོམ་དགོས་བྱུང་བ་དང་། བདག་གི་ཡིད་བརྙན་གྱི་དཔུང་སྡེ་དེ། ཉོན་མོངས་པའི་ཐག་པ་ཡིས་བཟུང་བར་མི་ནུས་པ་དང་། རང་དབང་གི་རྗེས་སུ་སྟབས་སྟབས་པོར་འབྲངས་པ་ཞིག་ཡིན་པར་སྙམ་ཞིང་། སྣང་བ་གར་ལ་རྩེན་པའི་ཡིད་བརྙན་དེ་དག་ལ་བོད་སྐད་ཀྱིས་བཀའ་བསྒོས་དམ་བཞག་མཛད་དེ། རབ་ཏུ་གནས་པ་བྱས་སོ།། ཡི་གེའི་རོལ་མོ་དྲག་ཏུ་བྱ་བའི་ཡིད་བརྙན་གྱི་དཔུང་སྡེ་དེ་ལ་གཟུགས་སྒྲ་དྲན་རྟོག་གི་གཟི་བྱིན་བསྐྱེད་ཡོད་པས། འཕྱོ་ཤེས་སོ།།

དེ་ནས་བཟུང་། ངས་རང་ཉིད་ཀྱི་མཛེས་དཔྱོད་ཀྱི་ལུས་བླངས་ཚད་ཀྱི་ཡིད་བརྙན་གྱི་དཔུང་སྡེ་དེ། ངས་བྲིས་པ་དང་བྲི་བཞིན་པའི་བོད་སྐད་ཀྱི་སྙན་ངག་གི་སྨྲ་བརྗོད་ཡིན་ལ། དེས་བདེན་ཐུབ་ཀྱི་ལང་ཚོ་མ་ཡིན་པའི་ཚུལ་འཆོས་ཀྱི་གྲིབ་མ་རྣམས་ལ་རྣམ་རྟོག་མཐའ་གཅིག་ཏུ་བྱེད་དགོས་བྱུང་བ་དང་། གྲིབ་མ་རྣམས་ཀྱི་སྡིག་སྒྲིབ་ཕོག་མི་ཐུབ་སའི་རང་དབང་གི་ཡུལ་ཁམས་གཅིག་ུཔ་ནི་བརྩམས་ཆོས་ཁོ་ན་ཡིན་པའི་གོ་བ་རྙེད། ང་རང་སྙན་ངག་ལ་འཇུག་པའི་འདུན་པ་ནི། གཏན་ཏུ་ལྡོག་ཐབས་མེད་པར་དུས་ཀྱི་རླབས་རྒྱུན་དང་འགྲོགས་དགོས་བྱུང་ཞིང་། ངའི་བླ་སྲོག་གི་རྩ་ཁམས་ཀྱི་ཕུགས་བསམ་ལྡན་པའི་དུས་ཚོད་ཀྱི་ཁྲོད་དུ་ཐུན་མོང་མ་ཡིན་པའི་གོམས་གཤིས་ཤིག་ཏུ་གྱུར་ཚར་བ་དང་། དེ་ཉིད་རྟག་པར་ངའི་མིག་མདུན་གྱི་མཚན་ཉིད་རིག་པ་གཞན་ཞིག་དང་འདྲ་བར། བསམ་གཞིགས་ཀྱི་ཡིད་ལ་ནན་གྱིས་བསྒོམས་དགོས་བྱུང་།

དེ་རིང་ངས་རང་ཉིད་གང་ནས་འོངས་པ་ལ་བསྐྱར་དུ་ཕྱིར་རྟོག་བྱེད་དུས། ང་ནི༼གཞོན་ནུ་བདག་གི་གོམ་སྒྲ༽དང་འགྲོགས་ནས་འོངས་པ་ཞིག་ཡིན་ལ། ད་ལྟ་ད་དུང་གོམ་སྒྲ་འདི་ལ་བླ་སྲོག་གི་གཏིང་ནས་འགྲོགས་དགོས་དོན་ཅི།་དེ་ནི་ངའི་ལས་དབང་ཡིན་ལ་གཞར་ཡང་ངའི་གདམས་ང་ཡིན་ནོ།། དབང་གྲགས་ཀྱི་སྔ་སོར་ཕན་ཚུན་ལག་རྡང་སྦྲེལ་བར་གོམས་པའི་དུས་རབས་རྫོབ་ཏོ་འདིའི་ནང་། ཐལ་ཆེ་བའི་ཚུལ་འཆོས་ཀྱིིས་སོ་སོར་བསང་བསྟོད་རྒྱ་ཆེན་པོ་འབུལ་རྐྱང་གིས་ཀློག་མཁན་རྣམས་ཀྱི་ཡིད་དབང་ཅིག་ཅར་དུ་ཕྲོགས་པར་བྱེད་པའི་དུས་འདིར། ཁ་བའི་ཞིང་ཁམས་ཀྱི་ཡི་གེའི་གདུང་བ་དང་སྒྱུ་རྩལ་ཉིད་ནི་གྲིབ་ཀྱིས་བཟུང་ཚར་བ་དང་། འོ་ཅག་གིས་ཐུན་མིན་གྱི་བརྡ་བྱེད་དང་སྨྲ་བརྗོད་དང་རྟོག་པ་ཉམས་ཀྱིས་སྐྱེས་པའི་ཡིད་གདུང་གི་ཡུལ་བ་དངོས་དེ་འཚོལ་དུ་མེད་དོ།།

དེ་ནི་སྙན་ངག་ཁོ་ན་ཡིས་སྤྲུལ་ནུས་པ་ཞིག་ཡིན་མོད། དེ་ནི་སྙན་ངག་ཁོ་ན་ཡིས་སྤྲུལ་བར་མི་བཟོད། དེ་ནི་སྙན་ངག་མཁན་ཁོ་ན་ཡི་བརྡ་བྱེད་དང་སྨྲ་བརྗོད་དང་རྟོག་པ་ཉམས་ཀྱིས་སྐྱེས་པའི་རང་དབང་གི་འདུ་ཤེས་ཀྱིས་སྐྲུན་གྱི། རྣམ་པ་རིང་ལུགས་ཀྱི་ཚིག་སྦྱོར་གྱི་རྒྱང་འབོད་རིང་མོ་དེ་ག་སྤེལ་རྐྱང་གིས་རྙེད་དུ་མེད་དོ།། རྣམ་པ་གཙོར་འཛིན་གྱི་འབུད་རྡུང་དེས་ནི་ག་དུས་ཀྱང་གོམས་གཤིས་ཀྱི་རེ་བ་ཙམ་སྐོང་ཐུབ་པ་ལས། འོ་ཅག་གི་བླ་སྲོག་གི་འདུན་པའི་ཁྲོད་ཀྱི་ཡུལ་བ་དངོས་དེ་འཚོལ་དུ་མེད་ལ། དོན་དམ་གྱི་རྗེས་དཔག་གི་ཡུལ་བ་ནི་རྙེད་མི་ཐུབ་བོ།། ཡུལ་བ་དངོས་ནི་ལྟོས་མེད་ཀྱི་དག་པ་སྦྱོང་ནུས་པ་ཞིག་དང་། འཚོ་བའི་ཁྲོད་ུད་གེགས་མེད་དུ་འགྲེང་བཟོད་པ་ཞིག་ཡིན་ལ། སྐྲ་སེར་ནག་གི་སྙན་ངག་པ་ཀུན་གྱ

Address

Dharmshala
176219

Website

Alerts

Be the first to know and let us send you an email when གཟའ་ལྷག་པ། posts news and promotions. Your email address will not be used for any other purpose, and you can unsubscribe at any time.

Shortcuts

Share

Category