28/05/2026
🚨Ariana fè yon diskou ki touchan jodia nan yon aktivite kote ki te gen tout kalite moun prezan. Nan yon tèm « Dyalòg se chimen ki mennen nan lapè ak estabilite » enfliyansez la pale ak tout kouch ak tout sektè.
Selon Ariana, dyalòg se youn nan pi gwo mwayen pou konstwi lapè ak estabilite an Ayiti. Nan yon moman kote peyi a ap travèse anpil difikilte, li fè konnen vy0lans pap janm ka ranplase pawòl, epi inite rete pi gwo fòs pèp ayisyen an.
Li eksplike dyalòg pèmèt moun koute diferans yo, respekte opinyon youn lòt epi chèche ansanm solisyon ki kapab dire lontan. Pou Ariana, yon nasyon avanse lè sitwayen li yo aksepte pale youn ak lòt avèk sajès, respè ak responsabilite.
Li souliye tou Ayiti bezwen lapè ak estabilite, men estabilite sa pa ka egziste san kolaborasyon ant lidè yo, jèn yo, fanmi yo ak tout sosyete a.
🎙️Ariana « map pale ak prèt yo, pastè yo, vodouyizan yo. Jodia Ayiti bezwen nou, lè yon pèp ap soufri Anpil, sektè espirityèl yo pa dwe rete nan silans yo. Jèn yo, nou pa dwe renmen Ayiti sèlman nan chante, sou rezo sosyo, lè gen konpetisyon spòtif men renmen Ayiti egzije plis sakrifis toujou»
Daprè li menm, li enpòtan pou nou transfòme dezakò yo an diskisyon konstriktif olye nou fè konfli, paske lè yon pèp chwazi dyalòg, li chwazi espwa, pwogrè ak yon pi bon avni tou.
Finalman, Ariana voye yon mesaj espesyal bay jèn ayisyen yo pandan li raple yo, yo se espwa demen an. Li ankouraje yo pou defann lapè, edikasyon ak inite nasyonal pou ansanm nou kapab konstwi yon Ayiti ki pi fò, pi jis ak pi estab pou jenerasyon k ap vini yo. 🇭🇹
