02/11/2026
Au kerekere, kau vakatulou saka.
Ki vale levu na Tui Naigani nai cavuti ni nomudou gone turaga.
Ena vuku ni kerekere malumalumu gole mai ena ivola mata.
Ke rawa ni dua na serekali me baleta na tinaqu dau mamarau ka yalo vinaka.
Cadra na siga ena ika tini ka walu ni Tiseba.
1946 ni yabaki me sa tadu mai ki vuravura na vua ni ketedra.
Tubutubu marama ena levu ni nona marau e sega ni rawa ni tubera.
Na wai ni mata ni marau ni sa dua na luvedrau gone yalewa.
Toso na yabaki keina kena marau.
Tevuki na ibe na yacana me sa mau.
E marama vasu dina mai na yanuyanu ko Navatu mai Kubulau.
Nabasovi na nona koro dina io ko Tavua na nona koro ni vakamau.
Kina loma ni vuvale meu sereka cake.
Na yacana dina ko Kulaniwai Yareyare.
E ratou lewe tolu na yalewa ka lima na tagane.
E ratou lewe walu kece io o koya na kena qase.
Tu donu tu na bula me vaka na nona ituvatuva.
Ko Dikulaniwai me sa curumi vakavanua.
Vua na cauravou totoka mai Lakasa e Tavua.
Rogoci na kena irogo ni yacana ko Tomasi Dravikula.
Toso na yabaki ena bula vakavuvale.
Maucokona na vakawati ni mai tolu na goneyalewa ka va na gone tagane.
Alumeci, Vaseva, Navitalai Seu, Miliana, Semi kei Eremasi na kena gone.
Io, ko Waisele na luveidrau nai matai ni sucu ka luveidrau qase.
Tubu na veisusu kina vanua vinaka.
Sa tubu na vuvale ka vaka vugoni sara.
Va na vugona au cavu baleta na yacadra.
Ni 25 na makubuna ka 15 na makubuna vakarua kara isausau vou kei viti ena veigauna ni mataka.
Au kerekere meu sereka na nona bula.
Ni marama vinaka dau mamarau ka sega ni tautauvata kei dua.
Na veiqaravi, na siwa, na cina lairo e dau kenai divi ena nona gauna.
Isa....na veiqaravi vinaka nei Tinaqu sa mai cava tu nikua.
Bikai tu na bula ena ivau ni tauvimate.
Rauta ni tolu na yabaki nona davo tu e vale.
Vakavakarau o ira na gone me baleta na nona kisi ni mate.
Siga e lokuci e kila duadua ga na tamada mai cake.
Tuvatuvaka o ira na gone mera mai siko.
Io, na bula nei tinaqu sa tekivu siro.
Au kaci Na o ira na gone era se via mai raici iko.
Era tagi lagalaga nira sobu mai sa lala nai tikotiko.
Voleka na vitu ena mataka ni Sigatabu.
Okotova na vula na ika tini ka walu.
Kaci na luvena "Na" o ira na makubumu era sa qai vakarau sobu ena wavu.
Cava tale meda qai kaya ni sa kaci na Kalou nai tavi keina veiqaravi sa tadu.
Mositi ira dina na nomu bula.
Niko marama vinaka ka sega ni dau vakaduiduitaka e dua.
Era tagi yaso nira vakavakarau mera na mai raici iko tale vakadua.
Qai seva ni sa liu o "Nana" o "Nau" era kaci sa mositi keimami dina.
Taqiri na talevoni keina drodro ni wainimata.
Na yaloi Eremasi e sega ni cegu rawa.
Na mosi ni yalona keina tagi lagalaga.
"Na" ko sa biuti keitou vakadua kei ira na ganequ vinaka.
Au kerekere meu sa laki cava.
Kina noqu loqi tobu meu vakavinavinaka.
Me soli tiko na vakacegu kina loma ni vuvale vakaturaga.
Ni sa mai cava na itavi ka sa lesu ko nomudou Na kada vakabauta nida qai laki sota tale yani ena bula ka tarava.
