20/07/2023
Sa press conference ni Sen. Idol Raffy Tulfo kahapon hinggil sa isinagawang raid ng Anti-Cybercrime Group ng PNP sa isang POGO facility sa Las Piñas noong June 27, tinanong siya ng isang reporter kung ano ang gradong maibibigay niya kay President Ferdinand “Bongbong” Marcos sa unang taon nitong panunungkulan. Sinabi ni Sen. Idol na “the president is doing an excellent job.”
Pinuri ni Sen. Tulfo ang bilyon-bilyong investment pledge na nalikom ni PBBM mula sa mga gobyerno at negosyente sa kanyang mga foreign trip.
Sa kabuuan, 116 na proyekto na nagkakahalagang $62.926 billion ang nalikom ni PBBM mula sa kanyang pagbisita sa bansang Indonesia, Singapore, US, Thailand, Belgium, China at Japan.
Kabilang sa breakdown ng mga investment pledge ay ang halagang $14 billion para sa renewable energy, e-commerce, broadband technology, government housing at agriculture na nalikom ng Pangulo mula sa kanyang trip sa Indonesia at Singapore; at $1.3 billion na halaga ng commitment mula sa US para makalikha ng 6,700 na trabaho sa Pilipinas.
Sa isang taong panunungkulan ni PBBM, ayon sa survey ng Philippine Statistics Authority (PSA), ay bumaba sa 4.5% ang unemployment rate noong April 2023 mula sa 5.7% ng parehong buwan noong 2022.
Nagkaroon naman ng mas maraming job openings para sa mga kababayan natin dahil sa pag-ganda ng turismo at pagtaas ng bilang ng pasok ng international visitors sa bansa na umabot sa higit 2 milyong naitala ng Department of Tourism (DOT) mula Jan. 1 hanggang May 12, 2023.
Sa isinagawang job fairs ng iba't ibang ahensya tulad ng DOT at Department of Labor and Employment (DOLE) noong June 2023, umabot sa tinatayang 72,000 ang job openings sa iba’t ibang parte ng bansa.
Ang inflation rate naman ay bumaba sa 6.1% ng May 2023 mula 6.6% ng April 2023, ayon pa rin sa PSA.
Napansin rin ni Sen. Tulfo ang ilan sa mga magandang katangian ni PBBM na nagpapakita ng kanyang character bilang isa magaling na lider. Aniya, hindi naninisi si PBBM sa mga minana nyang problema ng bansa at hindi rin siya nagtatanim ng galit sa mga dati niyang nakatunggali sa politika.
Pinuri rin ni Sen. Tulfo ang buhos na suporta ni PBBM para sa mga OFW, partikular na ang pagsalba niya sa tatlong convicted OFW. Dalawa dito ay nakasalang na dapat sa death row pero nabigyan na nga ng pardon ng gobyerno ng UAE dahil sa letters of appeal ng Pangulo.
Dito, sinabi ni Sen. Idol, pinakita ni PBBM ang kanyang commitment at pagmamahal sa mga tinaguriang bagong bayani ng bayan.
